Ձեր վստահելի աղբյուրը

Հայաստանում հրեական, հունական, ասորական, քրդական, ուկրաինական, ռուսական, լեհական, եզդիների, գերմանական, բելառուսական, վրացական համայնքների ղեկավարները բաց նամակ են հղել երկրի վարչապետին ու Հանրային խորհրդի նախագահ Վազգեն Մանուկյանին` իրենց անհանգստությունն ու մտահոգությունը հայտնելով ՀԽ ազգային փոքրամասնությունների հարցերի հանձնաժողովի նախագահ, Բրյուսովի անվան լեզվաբանական համալսարանի ռեկտոր Սուրեն Զոլյան «անձի շուրջ կատարվող անառողջ զարգացումների» վերաբերյալ: Նամակի ներքո նրանք ստորագրել են, նաև` կնքել:

«Մեզ ՀՀ ազգային փոքրամասնությունների հասրակական կազմակերպությունների նախագահներին, խորապես հուզում է այն փաստը, որ Սուրեն Զոլյանի շուրջ կատրվող անհասկանալի զարգացումների ֆորմալ շարժառիթը Տարածաշրջանային կամ փոքրամասնությունների լեզուների Եվրոպական խարտիայի փորձագետների կոմիտեի աշխատանքին մասնակցելու համար մեկնելու հանգամանքն է»,-ասված է նամակում:

Նրանք վարչապետին խնդրում ու առաջարկում են Զոլյանին նկատողություն անելու փոխարեն, ստուգել Խարտիայով ստանձնած ՀՀ պարտավորությունների և Եվրոպայի խորհրդի նախարարների կոմիտեի հանձնարարականների կատարման ընթացքը «տարբեր գերատեսչությունների կողմից` հատկապես ԿԳՆ-ի»: Նրանք վարչապետին նաև առաջարկում են. «Օգտագործելով Ձեր բարձր դիրքը, օրենքով սահմանված պատասխանատվության կանչել իրենց գործունեությամբ Հայաստանի միջազգային հեղինակությանը վնաս հասցնող անձանց ու վերանայել ՀՀ ԿԳ նախարարի կարգապահական տույժը»:

Հիշեցննք, կրթության և գիտության նախարար Արմեն Աշոտյանի 06.04.2012թ N 160-Ա հրամանով Երևանի Վ. Բրյուսովի անվան պետական լեզվաբանական համալսարանի ռեկտոր Սուրեն Զոլյանի նկատմամբ կիրառվել է կարգապահական տույժ՝  հայտարարվել է «խիստ նկատողություն»: Ապա հետևեց հայտարարություն,  թե ԿԳՆ-ն ստուգումներ է իրականացրել համալսարանում ու խախտումներ արձանագրել:

Ս. Զոլյանն էլ իր հերթին հայտարարել է, թե դատական կարգով բողոքարկելու է նախարարի այդ որոշումը:
Քիչ առաջ մեկնարկել է ԵՊԼՀ գիտական խորհրդի ընդլայնված և արտահերթ նիստ, որի շրջանակներում նախատեսվում է քննարկում ՀՀ ԿԳ նախարարության կողմից 12.04.2012 թ.-ին կազմված «Երևանի Վ. Բրյուսովի անվան պետական լեզվաբանական համալսարանի կրթական գործունեության նկատմամբ իրականացված վերահսկողության արդյունքների մասինե ակտի վերաբերյալ: Նիստին հրավիրված են նաև ՀՀ ԿԳ նախարար պարոն Արմեն Աշոտյանը և նրա` 19.03.2012թ. N 190 Ա/Ք հրամանով ստեղծված վերահսկողություն իրականացնող հանձաժողովի անդամները:

Նախորդող հրապարակում`
Զոլյան-Աշոտյան հեռակա բանվեճը շարունակվում է