Ձեր վստահելի աղբյուրը

««Ժառանգության», Դաշնակցության և ԲՀԿ-ի հետ Կոնգրեսը ստեղծել է ընտրությունների վերահսկման միասնական շտաբ: Այսինքն` այդ կուսակցությունները մեր գործընկերներն են, որոնց հետ մենք համատեղ աշխատանք ենք կատարում արդեն ընտրություններ անցկացնելու համար, և շատ բնական է, որ մեր գործընկերների նկատմամբ հակաքարոզչություն չենք իրականացնելու, վիրավորանքներ չենք հասցնելու, անձնական որակումներ չենք տալու», -այսօր այդ մասին հայտարարել է Հայ Ազգային կոնգրեսի առաջնորդ Լևոն Տեր-Պետրոսյանը «Ազատություն» ռադիոկայանին տված հարցազրույցում:

Նրա խոսքով, Կոնգրեսի թիրախը Հանրապետական կուսակցությունն է և «Օրինաց երկիր»-ը:

«Եթե «Օրինաց երկիր»-ն էլ գար, մասնակցեր միասնական շտաբի աշխատանքներին և պայքարեր արդար ընտրությունների համար մեզ հետ միասին, բնականաբար, նա էլ կմտներ նույն ցանկի մեջ: Իսկ թե ինչու ենք տարբերում դա, շատ հասկանալի պատճառով. «Օրինաց երկիր»-ը եղել, կա և հայտարարում է, որ այսուհետև էլ լինելու է Սերժ Սարգսյանի ճամբարում, մասնակցելու է հաջորդ կոալիցիային: «Բարգավաճ Հայաստան»-ը այդպիսի բան չի հայտարարում: Այո, ունեն [կոալիցիոն] հուշագիր, այո, կոալիցիայից դուրս չի եկել, բայց կոալիցիան ժամանակավոր երևույթ է, կոալիցիան տևում է այնքան ժամանակ, որքան կա խորհրդարան: Մայիսի 7-ին կոալիցիան չկա: Բնականաբար, անկախ այն բանից, թե մենք ինչ հակասություններ ենք ունեցել Դաշնակցության, «Ժառանգության», «Բարգավաճի» հետ, այո, մենք նրանց ժամանակին շատ խիստ քննադատել ենք, բայց քանի որ այսօր այդ կուսակցությունները փաստորեն դուրս են Հանրապետական կուսակցության մենիշխանության դեմ, քաղաքական տգիտություն, անգրագիտություն կլինի և դավաճանություն կլինի այս ժողովրդի նկատմամբ, եթե մենք այդ հնարավորությունը չօգտագործենք և չազատվենք Հանրապետական կուսակցության և Սերժ Սարգսյանի միապետությունից», -հավելել է Տեր-Պետրոսյանը:

Ռադիոկայանը հետաքրքրվել է «Բարգավաճ Հայաստան»-ի` ավելի հեռուն գնացող ծրագրերի մեջ տեսնո՞ւմ եք, օրինակ, հաջորդ կոալիցիայի մեջ չմտնելը: Տեր-Պետրոսյանը պատասխանել է, որ հեռուն գնացող ոչ մի բան ինքը չի ուզում տեսնել այսօր: «Այսօր մենք ճակատամարտի մեջ ենք հանցավոր ռեժիմի հետ և այդ հանցավոր ռեժիմը տապալելու, նրանից ազատվելու բոլոր հնարավորությունները պետք է օգտագործենք: Ես նկատի ունեմ սահմանադրական, օրինական հնարավորությունները», -նշել է նա:

Հաջորդ հարցին, թե եթե Ազգային ժողովում մեծամասնություն չկազմի ՀԱԿ-ը, ապա ո՞ւմ են տեսնում իրենց դաշնակից, Տեր-Պետրոսյանը պատասխանել է. «Բոլորին տեսնում ենք, ովքեր կցանկանան մեզ հետ դաշնակցել: Քաղաքականությունը սա է: Քաղաքականությունը, այո, դաշնակից որոնելու արվեստ է: Մենք կփորձենք, կփնտրենք, ով կհամաձայնի մեզ հետ համագործակցել, մեծ սիրով կհամագործակցենք: Ով չի համաձայնի, թող գնա, համագործակցի Սերժ Սարգսյանի հետ»: