Ձեր վստահելի աղբյուրը

Ինչպես հայտնի է՝ մայիսի 9-ին, Շուշիի ազատագրման 20-ամյակի կապակցությամբ Արցախում զորահանդես է լինելու: Զորահանդեսի նշանակության և մի շարք այլ հարցերի շուրջ Panorama.am-ը զրուցեց ռազմական փորձագետ Դավիթ Ջամալյանի հետ:

«Նախընտրական թոհուբոհին անմիջապես կհաջորդի Շուշիի ազատագրման 20 ամյակին նվիրված զորահանդեսը Ստեփանակերտում: Ականատեսն ենք լինելու հայությանը համախմբող մի հանդիսության, որի կարիքն այսօր ունեք առավել քան երբևէ»,- նշեց փորձագետը:

Ըստ նրա՝ արցախյան զորահանդեսը յուրահատուկ հաշվետվություն է լինելու սեփական ժողովրդին, որտեղ Արցախի Պաշտպանության Բանակը ներկայանալու է ակնառու ձեռքբերումներով՝ իբրև մարտական լրջագույն կենսափորձ կուտակած մարտունակ միավոր, տարածաշրջանի ռազմական հավասարակշռությունը ձևավորող կարևոր գործոն:

«Եվ այսպես. որոնք են այն ձեռքբերումները, որոնցով Արցախի Պաշտպանության Բանակը ներկայանալու է մայիսի 9-ին:
1. Վերջին տարիներին Արցախի Պաշտպանության Բանակում կատարվել են այնպիսի կառուցվածքային փոփոխություններ, որոնք թույլ են տալիս նրան հնարավոր ագրեսիայի դեպքում ռազմական գործողությունները արագ տեղափոխել հակառակորդի տարածք: Այլ կերպ ասած ստեղծվել են նոր ստորաբաժանումներ, որոնք կարելի է դիտարկել իբրև հարվածային խմբավորում ձևավորելու համար անհրաժեշտ ռեզերվ: Իսկ սա նշանակում է, որ Արցախի Պաշտպանության Բանակը Ադրբեջանի հնարավոր ագրեսիայի դեպքում չի սահմանափակվելու միայն Արցախի ներկա տարածքի պասիվ պաշտպանությամբ: Կասեցնել թշնամու առաջին, հիմնական հարվածը՝ խորը էշելոնացված պաշտպանության համակարգում հյուծել թշնամուն, ապա հակահարձակմամբ ռազմական գործողությունները տեղափոխելով ագրեսորի տարածք՝ պատերազմն ավարտելով ռազմաճակատի մեզ համար առավել նպաստավոր կոնֆիգուրացիայով քան այն ինչ ունենք այսօր: Ահա այս սցենարն է խաղարկում Արցախի Պաշտպանության Բանակն իր զորավարժություններում: Վերջին կառուցվածքային փոփոխություններն այս սցենարը դարձնում են է´լ ավելի իրատեսական:
2. Զորահանդեսին մասնակցող ստորաբաժանումները մարտական հերթապահության ահռելի փորձի տեր, թշնամու տասնյակ դիվերսիաներ խափանած, առաջնագծում դիրքեր բարելավող մարտական միավորներ են. մարտական միավոր՝ բառի բուն իմաստով:
3. Զորահանդեսին մենք կտեսնենք Արցախի Պաշտպանության Բանակի հետպատերազմյան շրջանում կայացած հրամանատարական կազմը՝ երիտասարդ գնդի հրամանատարներին, որոնք պատերազմին մասնակցել են պատանեկան տարիներին, ապա զորային հիերարխիայի բոլոր օղակներում կայանալով հասել մինչև գնդի հրամանատարի դիրքի: Կադրային այս նոր հերթափոխը Արցախի Պաշտպանության Բանակի վերջին տարիների ամենանշանակալի ձեռքբերումներից է:
4. Զորահանդեսին մասնակցող զինվորականության և Պաշտպանության Բանակի հրամանատարի միջև հոգեբանական անջրպետ չկա: Արցախում բոլորը գիտեն. եթե առաջնագծում թշնամին իրադրությունը ապակայունացնում է, եթե ստեղծվում է քիչ թե շատ վտանգավոր իրավիճակ, ապա բանակի հրամանատարը անձնակազմի կողքին է՝ դեպքի կիզակետում, որտեղ անձամբ է վերահսկում իրավիճակը: Սա մի չգրված օրենք է, ավանդույթ, որ եկել է Սեյրան Օհանյանից և որը շարունակում է Մովսես Հակոբյանը: Սա դիրքապահ զինվորականի մոտ ստեղծում է «ամուր թիկունքի» զգացողություն, վստահություն, որ բանակի հրամանատարն իր կողքին է: Այս հանգամանքը Արցախի Պաշտպանության Բանակի բարոյահոգեբանական նկարագրի առանցքային տարրերից է, զինվորականության շրջանում միասնականության մթնոլորտ ապահովող կարևոր գործոն: Արցախյան իրողություններին տեղյակ ցանկացած ոք կարող է հաստատել ասվածը:
5. Արցախի Պաշտպանության Բանակը անհրաժեշտության դեպքում կարող է արագ համալրվել տեղի ռեզերվիստներով: Կռվի բռնվելու պատրաստակամությունն Արցախում ակնառու է»,- նշեց Դ. Ջամալյանը:

Նրա խոսքերով, այս առումով վստահաբար կարող ենք փաստել, որ այսօր արցախահայությունն իրենից ներկայացնում է մի յուրահատուկ «ազգ-բանակ», ինչը թե´ Արցախի, թե´ Հայաստանի Հանրապետության կենսունակության գրավականներից է: