ԲՀԿ-ական պատգամավոր. «Ակազը վայեցա» մեր ժողովրդից ստոր ժողովուրդ, վայթե, չլինի»
Նախկին «Գարուն» կարի արտադրամասի աշխատակիցները մարտի 14-ին հայտարարած գործադուլից հետո խուսափում են խոսել որևէ լրագրողի հետ: Պատճառն, ըստ ամենայնի, վերջիններիս հրավիրած պիկետից հետո ղեկավար կազմի մասին եղած որոշ հրապարակումներն են:
Չճշտված տեղեկությունների համաձայն՝ պիկետին ներկա գտնված լրագրողների ներկայությունից կաշկանդված Գոհար Ենոքյանի անմիջական հրահանգով հաջորդ օրն իսկ որոշ բանվորներ ազատվել են աշխատանքից (կասկածվել են լրագրողներին պիկետի մասին տեղեկություն տրամադրելու համար):
Նախընտրական շրջանում ավելորդ լարվածությունից խուսափելու համար հենց տեղում՝ լրագրողների և Էկոնոմիկայի նախարարության ներկայացուցչի ներկայությամբ դեռևս գործող պատգամավոր «Գարուն» կարի ֆաբրիկայի սեփականատեր Գոհար Ենոքյանը և տնօրենը՝ սփյուռքահայ Քրիստիան Գելիջին խոստացել են վերանայել աշխատակիցների աշխատավարձերի հարցը:
Գործադուլից մեկ ամիս անց փորձեցինք պարզաբանումներ ստանալ գերմանահայ պարոն Գելեջիից, արդյո՞ք վերանայվել է ֆաբրիկայի՝ 12-15000 դրամ աշխատավարձ ստացող բանվորների բողոքը, սակայն վերջինիս հեռախոսն անջատած էր, բանվորներից որևէ մեկի հետ չհաջողվեց խոսել, քանի որ հասկանալի պատճառներով նրանք խուսափում էին պատասխանել մեր հարցերին:
Միակ «գործով վկան» այս դեպքում ԱԺ պատգամավոր ԲՀԿ-ական Գոհար Ենոքյանն էր, ում հավաստիացնելով, որ ԲՀԿ-ի մասին հարցեր չենք ուղղելու, համոզեցինք պատասխանել մեր հարցերին:
Նշենք, որ Գոհար Ենոքյանն այս դեպքում իրեն պատասխանող կողմ չի համարում այն պատճառով, որ ինքն իր խոսքով հանդիսանում է «Գարուն» կարի արտադրամասին սեփականատերը, և որ իբր վարձակալ Գելենջին է պատասխանատու այդ ամենի համար:
Բայց չեզոք դիրքում այս ամենին հետևող Տիկին Գոհարը ակամայից տվեց մեզ այնքան սպառիչ պատասխան, որ դա կարող էր առնվազն անել ոչ թե ինչ-որ ֆաբրիկայի դժգոհ աշխատակիցների ճակատագրով մտահոգ պատգամավորը, այլ ոչ ավել ոչ պակաս գլխավոր մեղավորը:
«Այսօր 6-7 լրագրող են զանգահարել: Ի՞նչ ա եղել որ: Գելեջին Հայաստանում է, երեկ է եկել: Գործադուլի հաշվո՞վ եք ուզում նրա հետ խոսել: Մարդիկ նորմալ աշխատում են: Երեկ մի մեքենա բարձեցին պատրաստի արտադրանքը գնաց, այօր հաջորդ մեքենան հումք ա բերել՝ նոր պարտիայի համար: Բանվորները բոլորն էլ աշխատում են: Ով էլ չի ուզեցել աշխատի՝ ազատվել-գնացել է», մեզ հետ զրույցն այսպես սկսեց Գոհար Ենոքյանը:
-Ասում են, իրականում մի քանիսին ազատել են աշխատանքից միայն այն պատճառով, որ իրենց գործադուլի մասին տեղյակ են եղել լրագրողներ ու հաջորդ օրը Ձեզ համար ոչ հաճելի հրապարակումներ են լույս տեսել:
-Դե չգիտեմ, որ տենց ա, էդ հարցերը իրա հետ զանգեք պարզեք: Ես կարող եմ ասել, որ ֆաբրիկան նորմալ իրա հունով աշխատում ա:
-Բայց ֆաբրիկան միշտ էլ իր հունով աշխատել է, և բանվորների բողոքը ֆաբրիակայի աշխատել-չաշխատելու համար չէր, այլ այն բանի, որ իրենք իրենց աշխատանքի դիմաց նորմալ չեն վարձատրվել և ոչ ճիշտ ժամանակին: Ասում էին՝ ստացել են ընդամենը 15.000 դրամ:
-Էդ հիմարություն են դուրս տվել: Ես հետո հետաքրքրվեցի իմացա, «ակազը վայեցա» մեր ժողովրդից ստոր ժողովուրդ «վայթե չլինի»: Դա հունվար ամսվա մասին է խոսքը եղել, որքանով ես իմացա, էդ մարդը դեկտեմբերի 29-ից արձակուրդ ա ձևակերպել հունվար ամսի մինչև 17-ը: Էդ մարդը լավություն ա արել, քանի որ արձակուրդային են ստացել, անմիջապես տվել է դեկտեմբերի 29-ի կողմերը, որ մարդիկ նորմալ իրենց Նոր տարին անեն: Որից հետո 17-ին եկել են աշխատանքի էնտեղ մինչև ամսվա վերջ ընդամենը մի 8 օր աշխատանքային մաքսիմում եղել, 10 օր լավագույն դեպքում:
-Ուրեմն գործադուլավորները արձակուրդի համար էին այդքան աղմկում, դժգոհում:
Կնշանակի այդ 300 բանվորներն էլ այդքան անգրագե՞տ էին, անտեղյա՞կ էին, չէի՞ն հասկանում , որ իրականում այդքան քիչ վարձատրվել են և դա արձակուրդային է:
-Դե սխալ են իրենք իրենց հաշվարկներն անում: Էդ ինչ-որ ստանում-ուտում են վռազ մոռանում են: Էլ չեն ասում, որ դա հունվարի արձակուրդայինն ա: Հունվարի փողը դուք ստացել են դեկտեմբերի 29-ին:Վերջապես եթե դուք 8 օր եք աշխատել, կարո՞ղ ա էդ մարդը էդ 8 օրվա համար 80.000 պիտի տար իրանց՝ առավել ևս, որ հատաքանակ էլ չեն ապահովել:Ինչքան ես գիտեմ, ահագին փող ինքը իրա ֆոնդից ա ավելացրել բանվորներին, որ էդքան շատ քիչ չլինի: Բայց եթե ինքը բանվորների կատարածը հաշվի առներ, սկի 15-20000 էլ իրանք չէին ստանա:Չնայած` ես ինչ եմ խառնվում, ես պռոստը էդքանը տեղյակ եմ, ասում եմ (տիկին Ենոքյանն ժամանակ առ ժամանակ հակասում է ինքն իրեն, քանի որ ինքն ընդամենը գործարանի սեփականատերն է, ով վարձակալությամբ է տվել արտասահմանցուն և հետևաբար այդքան տեղեկացված չէր կարող լինել,-Panorama.am): Լավ էլ գիտեք` Գելեջիի համարը ես իրեն չեմ մեղադրում , ինքը ճիշտ է վարվել: Թող բանվորությունը մի քիչ արագաշարժ լինի, թող աշխատի ու ստանա:
-Եթե աշխատողներից դժգոհում է ինչու՞ չի ազատում նրանց:
- Չինացիները էս նույն բանն անում են ավելի արագ, 3 անգամ ավել են հատաքանակ տալիս: Դրա համար էդ երկիրը ծաղկում ա, մենք էլ գնում ենք …..հիմա ասել էի որտեղ..
-Տիկին Ենոքյան, իրականում խնդիրը լուծվե՞ց ի վերջո, ուզում եք ասել 300 հոգին էլ չի՞ հասկացել, որ խնդիրն իրենց մեջ է:
-Այստեղ անգրագիտության հարցը չի: Եթե մի հատ էլ տենց հարց տաս, ես հենց հիմա կդնեմ տրուպկան: Ես մարդկայնորեն բացատրեցի այն, ինչ որ գիտեի:
Ձեզանից մի վիժավածք ստատիա էր գրել էր, որ Ենոքյանը նոր օմբուդսմեն է դուրս եկել… Այ վիժվածքներ, եթե դուք պատգամավորին տեսնում եք ժողովրդի պաշտպան, նրա կողքին կանգնող, ճիշտ ու սխալը տարբերող, բա ես էդ նույն գործը արեցի էնտեղ: Օբուդսմենը ո՞րն ա: Գիտեք սենսացիա՞ եք անում: Ամոթ է, մի քիչ նամուս ունեցեք, ճիշտն էլ գրեք: Բա եթե բանվորները դուրս են եկել բակ, գոռում ու լացում են, ես պատգամավոր էի, գնայի մտնեի իմ կաբինետ ու ընդհանրապես չմասնակցե՞ի, բա ավելի խայտառակ բաներ չէի լսի՞ հետո իմ մասին:
-Բայց իրականում աշխատավարձերը բարձրացրի՞ն, կարծեմ հենց պիկետի ժամանակ Ձեր ներկայությամբ Գելեջին խոստացել էր 5 տոկոսով աշխատավարձերի վերանայեր:
-Վերանայել ա, ավելացրել ա աշխատավարձերը, որքանով ես ինֆորմացիա ունեմ: Իսկ ինձ բնական ա, հետաքրքրում է էս ֆաբրիկայի աշխատանքը, քանի որ ընդեղ 500 հոգի մարդ է աշխատում, վսյո տակի սա մեծ գործ ա անում, էս տղեն: Էսօր որ թողեց գնաց 500 հոգի սոված են ման գալու, որովհետև չկա էդքան աշխատատեղ, որ ամեն մեկը գնան 80.000-180.000 դրամ փող ստանան: Էնքան ներվայնացածա Գելեջին, որ նույնիսկ ասումա ես թողելու եմ ու գնամ ստեղից, եթե ինձ չեն կարում հասկանան էնքան սոված-ծարավներ կան կգնա ու նրանց հետ կաշխատի իրան պետք ա…
Ճիշտ ա, քիչ ռոճիկով չի լինում աշխատել, ընտանիք պահել չի լինում, չի հերիքում 40000-ն էլ փող չի, 50000-ն էլ փող չի, բայց քանի որ իրանք էդ էլ չունեն, գտնում են որ ավելի լավ ա, գոնե դրանով աշխատեն (մինչ այդ Տիկին Գոհարը պնդում էր , թե 80.- 180.000 դրամ են ստանում,-Panorama.am): Էս 2-3 ամիսն է իրա մոտ դժվարություններ են եղել պատվերների հետ կապված, իրա հետ խոսեք, ինքը ձեզ կբացատրի, ես ինչի ՞ եմ իրա տեղը պատասխանում:
-Այսուհետ Դուք մանդատ չեք ունենալու, ասում էիք ՝որպես պատգամավոր եք գործադուլավորների կողքին կանգնել: Կնշանակի մանդատազուրկ եղած շրջանում, եթե նույն կոլեկտիվը կրկին խնդիրների առաջ կանգնի, Դուք չե՞ք կանգնի նրանց կողքին, չե՞ք միջամտի:
-Ինչ ապուշ բան ես խոսում …ամոթել ա, մարդու կյանքն ու կենսագրությունը պատգամավորությունով չի:
Ես որ պատգամավոր էի, էսօրվա պատգամավորները երևի կարճ պլեչիկով շալվար էին հագնում… դե ծիծաղա… որովհետև դու հլը երեխա ես: Ես մարդ եմ եղել, ղեկավար եմ եղել, ես հայ եմ, սրտացավ եմ, ժողովրդի մասին մտածող եմ, ես էն ծանր տարիներին, 90-ից մինչև 2000թ-ը, որ ոչ մի ձեռնարկություն չէր աշխատում, ես մի օր չեմ կանգնել, իմ բախտը միշտ բերել ա, միշտ արտասահմանցի պատվիրատու եմ ունեցել: Ես ուժեղ գործի խոշոր մասնագետ եմ ու մի օր իմ բանվորին տուն չեմ թողել:
-Իսկ ինչո՞վ է զբաղվելու Գոհար Ենոքյանը սրանից հետո, որ չի մտնելու խորհրդարան (Թղթ.- այս անգամ Գոհար Ենոքյանը ընդգրկված չի ԲՀԿ համամասնական ցուցակում, թեև ըստ լուրերի Ռոզա Ծառուկյանի ընկերուհին է):
-Կամաց-կամաց մոտենում ես քեզ շատ հետաքրքրող հարցին, դե հիմա ատբոյ տուր (ասաց ու անջատեց հեռախոսը,- Panorama.am):
Հ.Գ. Հիշեցնենք, որ ֆաբրիկային աշխատակիցները պիկետի ժամանակ հայտարարել էին, որ այլևս չեն հավատում ոչ ճշտապահ գերմանահայի ոչ մի խոստման, հատկապես՝ բանավոր: Նրանք գործադուլը շարունակելու են այնքան ժամանաակ, միչև փաստաթղթով չամագրվի իրենց աշխատավարձի չափը:
Լրահոս
Տեսանյութեր
ԱՄՆ-ում հրդեհների հետևանքով մոխրացել է Սահակ-Մեսրոպ հայ քրիստոնյա վարժարանը
