Ձեր վստահելի աղբյուրը

Այսօր ասուլիսում Հայ Ազգային կոնգրես կուսակցությունների դաշինքի անդամ, ՀՀՇ նախագահ Արամ Մանուկյանը դարձյալ, պայմանավորվածության համաձայն, հրաժարվել է մեկնաբանել «Ժառանգության» կողմից հնչող հայտարարությունների և միասնական շտաբից հեռանալու մասին:

«Ես որևէ այլ կուսակցության, բացի Հանրապետականից ու «Օրինաց երկիր»-ից, ինձ համար թիրախ չեմ դարձնելու, ամեն ինչ անում են, ստիպում են խոսել, մեկնաբանել, բայց ես այդպիսի չարիք չեմ գործի», -հայտարարեց Մանուկյանը: Փոխարենը Արամ Մանուկյանը խոսեց «Բարգավաճ Հայաստան»-ի մասին և հայտարարեց, որ այդ կուսակցությունը փորձում է ինքնուրույն գործել, անկախանալ Հանրապետական կուսակցությունից և կապ չունի նախկին նախագահ Ռոբերտ Քոչարյանի հետ:

«ԲՀԿ-ն ուժ է, որը պայքարում է կեղծիքների դեմ և փորձում է դառնալ ինքնուրույն քաղաքական ուժ, անկախանալ Հանրապետականից: Իսկ Ռոբերտ Քոչարյանը նրանց հետ կապ չունի, այսպիսի քաղաքական գործիչ Հայաստանում չկա, ունեմ հստակ փաստեր, որ այդ մարդը որևէ քաղաքական ուժերի չի կպնի և ոչ մի ուժ չի ցանկանում նրա հետ աշխատել` և արտահայաստանյան, և հայաստանյան», -հայտարարեց Մանուկյանը:

Ավելին, նա գովեց ԲՀԿ-ին, որովհետև այդ կուսակցության ներկայացուցիչները նաև իրեն են օգնել` Քանաքեռում ընտրացուցակները մաքրելով: «Քանաքեռում էդ մարդիկ ցուցակներ են մաքրել, թող Հանրապետականը ցուցակները մաքրեն, ընտրությունենրի վերահսկողությունը ապահովեն, մարդկանց վրա բռնություն չկիրառեն, էդ մասին ասենք: Իմ ուզածը արդար, նորմալ ընտրություններ անցկացնելն է», -հավելեց Մանուկյանը:

Ինչ վերաբերում է խորհրդարանական ընտրություններին մասնակից քաղաքական ուժերի ընտրվելու հավանականությանը, Մանուկյանն ասաց, որ խորհրդարան կանցնեն բացի իրենցից, ՀՅԴ-ն, ԲՀԿ-ն: «ՕԵԿ-ին գցելու են, ՕԵԿ-ին հանգիստ կարելի է պաշտոն տալ, Արթուրիկը ոչ մի փսոց չի հանի», -հայտարարեց ՀԱԿ անդամը:

Հիշեցնենք` ՀԱԿ առաջնորդ Լևոն Տեր-Պետրոսյանը Աբովյանում հայտարարել էր, որ նախընտրական քարոզարշավի ընթացքում ՀԱԿ-ը քննադատության թիրախ չի դարձնելու Հ. Յ. Դաշնակցությանը, «Բարգավաճ Հայաստան»-ին, «Ժառանգության»-ը: