Ձեր վստահելի աղբյուրը

Ապրիլի 15-ին ավարտվել է այն վերջնաժամկետը, որը նորաստեղծ Բարձրաստիճան պաշտոնյաների էթիկայի հանձնաժողովը տվել է պաշտոնատար անձանց հայտարարագրերը ներկայացնելու համար:

Հիշեցնենք` սա այն հանձնաժողովն է, որն ինչպես արդարադատության նախարարն էր խոստանում, մանրադիտակի տակ է պահելու հարյուրավոր բարձրաստիճան հայ պաշտոնյաներին: Դեռ այս հունվարի սկզբին ձևավորված հանձնաժողովի կազմում ընդգրկվել են ՀՀ Ազգային ժողովի նախագահի առաջարկած թեկնածու Լիլիթ Պետրոսյանը, ՀՀ վարչապետի առաջարկած թեկնածու Արմեն Խուդավերդյանը, ՀՀ Սահմանադրական դատարանի նախագահի առաջարկած թեկնածու Արեգ Շուշյանը, ՀՀ վճռաբեկ դատարանի նախագահի առաջարկած թեկնածու Էմիլ Բաբայանը և ՀՀ գլխավոր դատախազի առաջարկած թեկնածու Արտակ Սարգսյանը:

Panorama.am-ի թղթակցի հետ զրույցում հանձնաժողովի նախագահ Էմիլ Բաբայանն ասաց, որ ճիշտ է, հայտարարագրերի վերջնաժամկետն ավարտվել է, սակայն փոստով դեռևս շարունակում են ստանալ հայտարարագրեր: «Դեսպաններ ունենք այլ երկրներում, նրանք նույնպես բարձրաստիճան պաշտոնյաներ են համարվում և նույնպես պարտավոր են ներկայացնել հայտարարագրեր: Նրանք հնարավոր է փոստով ուղարկել են ու դեռևս չի հասել», -փոխանցեց Բաբայանը` նշելով, որ մի քանի օր էլ կսպասեն մինչև տեղեկություններն ամբողջական լինեն:

Հանձնաժողովը ձևավորվելուց հետո նամակ-գրությամբ տեղյակ է պահել Ազգային ժողովի նախագահին, վարչապետին, որպեսզի վերջիններիս հրահանգով նրանց ենթակայությամբ աշխատող պաշտոնյաները իրենց գույքի ու եկամուտների հայտարարագիրը սահմանված ժամկետում ներկայացնեն հանձնաժողովին:

Պարտաճանաչ են գտնվել հատկապես Ազգային ժողովի նիստերին անպարտաճանաչ կերպով հաճախող պատգամավորները: Բաբայանը փոխանցեց, որ արդեն իսկ հայտարարագրեր ներկայացրել են «Բարգավաճ Հայաստան» խմբակցության նախագահ Գագիկ Ծառուկյանը, Հանրապետական խմբակցությունից Սամվել Ալեքսանյանը (Լֆիկ Սամո), Ռուբեն Հայրապետյանը (Նեմեց Ռուբո), նաև` Սյունիքի մարզպետ Սուրիկ Խաչատրյանը (Լիսկա):

Վերոնշյալ պաշտոնյաները, ինչպես հայտնի է, պատգամավորության թեկնածուներ են և, հայաստանյան օրենսդրության համաձայն, իրենց հայտարարագրերը ներկայացնում են նաև Կենտրոնական ընտրական հանձնաժողով: Սակայն Հանձնաժողովի նախագահի խոսքով, Էթիկայի հանձնաժողովին ներկայացվելիք գույքի, ունեցվածքի և եկամուտների հայտարարգիրը ավելի շատ ժամկետ է պարունակում: «Կենտրոնական ընտրական հանձնաժողովին նրանք ներկայացնում են այս պահի դրությամբ իրենց ունեցած ունեցվածքը, իսկ Հանձնաժողովին ներկայացնում են 2011-ի ընթացքում ձեռք բերածն ու օտարվածը», -բացատրեց Էմիլ Բաբայանը:

Հայտարարագրերն ստանալուց հետո, Հանձնաժողովում կսկսեն ամփոփել և եթե պարզվի, որ որևէ պաշտոնյա չի փոխանցել հանձնաժողովին իր հայտարարագիրը, ապա գրություններ կկազմվեն և կուղարկվեն դրանց վերադասներին: Այնուհետև պաշտոնյաների գույքի և եկամուտների վերաբերյալ հայտարարագրերը Հանձնաժողովում կվերլուծեն և կհրապարակեն Հանձնաժողովի առաջիկա օրերի ընթացքում ստեղծվելիք կայքէջում: «Մենք վերլուծում ենք և նոր միայն հրապարակում», -հավելեց Բաբայանը:

Հանձնաժողովի տիրույթում է գտնվում նաև բարձրաստիճան պաշտոնյաների կողմից էթիկայի կանոնների խախտումների հայտնաբերումը, էթիկայի կանոնների խախտումների մասին կոնկրետ տեղեկատվության հրապարակումը: Այդ մասին, սակայն, Էմիլ Բաբայանը լռում է: «Գործընթաց է գնում, որի մասին էս պահին չեմ կարող խոսել: Մենք նրա համար ենք, որ նյութ տանք հասարակությանը, որպեսզի հասարակությունը տեսնի` որտեղ ինչ է կատարվում: Մեր նպատակը պատժելը չէ, ճիշտ հասկացեք»,-փոխանցեց նա:

Հարակից հրապարակում. Էթիկայի հանձնաժողով. Ի՞նչ կկարողանա պահանջել Լիլիթ Պետրոսյանը Սամվել Ալեքսանյանից