Ձեր վստահելի աղբյուրը

Այսօր «Հիդրոէներգոնախագիծ ինստիտուտի» սեփականատեր, գործարար Սենիկ Ջուլհակյանը լրագրողներրի հետ հանդիպման ժամանակ հայտարարեց, որ պատրաստվում է դատի տալ ԲՀԿ համամասնական ցուցակի իններորդ հորիզոնականը զբաղեցնող, Քաղաքագետների միության նախագահ Հմայակ Հովհաննիսյանին զրպարտությունների և մեղադրանքերի համար:
Նշենք, որ երեկ լրագրողների հետ հանդիպման ժամանակ Հ.Հովհաննիսյանը հայտարարել է, թե Սենիկ Ջուլհակյանը, ով ծագումով Գորիսից է, «իբր թե ներդրող ու բարերար, ով ամպագորգոռ հայտարարում է, թե պատրաստվում է փրկել «Հիդրոէներգոնախագիծ ինստիտուտը», առաջարկել է վաճառել Քաղաքագետների միության զբաղեցրած տարածքը: Հ. Հովհաննիսյանի խոսքերով՝ ինքը մերժել է այդ առաջարկը, որից հետո փակել են իր տարածք ելումուտ անելու հնարավորությունը։  Հ.Հովհաննիսյանը նաև ասել է, որ Ջուլհակյանի հետևում կանգնած է Սյունիքի մարզպետ Սուրիկ Խաչատրյանը:

Ս.Ջուլհակյանը նշեց, որ այս ամենը իրականությանը չի համապատասխանում: Նրա խոսքերով` ինքն անձամբ ճանաչում է մարզպետին, ով պատերազմի ժամանակ եղել է իր հրամանատարը, սակայն Ս.Խաչատրյանի հետ աշխատանքի բերումով ոչ մի կապ չունի: «Ես հանդիսանում եմ ինստիտուտի 100% բաժնետերը և խնդրում եմ այդ ամենը չխառնել այս պատմության հետ»,- ասաց Ս.Ջուլհակյանը և ավելացրեց. «Ես կողմ եմ բիզնես աշխարհում ոչ քաղաքական մոտեցումներին։ Ես կողմ եմ, որ յուրաքանչյուր հայ իր ավանդը ներդնի հայրենիքում, բայց ես դեմ եմ երեկվա կատարված իրադարձություններին, որի արդյունքում մեր գխավոր տնօրենը հայտնվել է հիվանդանոցում»:

Ս.Ջուլհակյանը նշեց, որ ինքը թույլ չի տա, որ Հ.Հովհաննիսյանի նման մեկն անպատվի իրեն ու անպատիժ մնա։ «Ես ոչ մի քաղաքական հակումներ չունեմ։ Եվ տեսնելով իր կուսակիցների լոզունգները, չեմ կարծում, որ իր կուսակիցները կիսում են նրա այդ հայացքները»,- ասաց նա: Ինստիտուտի սեփականատերը ընդգծեց, որ արդեն իսկ 200 մլն դրամի ներդրում է կատարել այդ ինստիտուտի վրա, նույնիսկ Հ.Հովհաննիսյանին առաջարկել է ավելի լավ տարածք գնել Երևանի կենտրոնում, որպեսզի հնարավոր լինի բարելավել ինստիտուտի հնարավորությունները։

Ասուլիսին մասնակցում էին նաև ինստիտուտի մի շարք աշխատակիցներ, ովքեր հայտարարեցին, որ իրենց կարծիքով այս ամենը քաղաքական ենթատեքս ունի։ Նրանք տեղեկացրին, որ այդ շենքում տարիներ շարունակ տեղակայված է եղել ինստիտուտը, սակայն վերջին տարիներին այդ տարածքը մաս-մաս վաճառվել է ու ինստիտուտը երկար ժամանակ վարձակալությամբ է այնտեղ աշխատել, մի կերպ իր գոյությունը պահպանելով։ Միայն այն բանից հետո. երբ Ս. Ջուլհակյանը դարձել է ինստիտուտի սեփականատեր, մարվել են ինստիտուտի հին պարտքերը, իսկ աշխատակիցների միջին աշխատվարձն այսօր 250 հազար դրամից ավելի է։ Ս.Ջուլհակյանն էլ նշեց, որ ինքը բազմաթիվ բիզնեսներ ունի, բայց պարտավոր չէ դրանց մասին տեղեկատվություն ներկայացնել, քանի որ դա իր գաղտնիքն է։ Սակայն ասաց, որ բիզնես ունի թե Ռուսաստանում, թե Չեխիայում: Ս. Ջուլհակյանը, նաև ներկայացրեց տեղեկանքներ, թե ինչքան գումար է փոխանցվել Հայաստան և ինչքան ներդրում է կատարվել նշյալ ինստիտուտի համար։

«Ոնց կարելի է զրպարտել։ Կոլեկտիվում վաստակաշատ մարդիկ են աշխատում, իսկ Հ. Հովհաննիսյանն իրավունք չունի զրպարտել։ Բացի այդ դա նրա գործը չի, թե սեփականատերն ինչ ֆինանսներ ունի», - ընդգծեցին աշխատակիցները։

Ի դեպ աշխատակիցները ասացին, որ այսօր հանդիպել են Հ.Հովհաննիսյանին և առաջարկել են մասնակցել այսօրվա ասուլիսին, սակայն նա շատ կոպիտ արտահայտություններով է նրանց պատասխանել` ասելով, թե «Դուք Լֆիկի ծախու կանայք եք»: «Ինչպես կարող է նման մարդը պատգամավոր դառնալ, երբ նա նման արտահայտություն է թույլ տալիս 80 տարվա ավանդ ունեցող վաստակաշատ կոլեկտիվին։ Նա այսօր թույլ տվեց նույնիսկ հրել մեզ։ Այդ ամենը մենք նկարահանել ենք, նա պետք է պատասխան տա այդ ամենի համար։ Մենք այդ արարքի համար պատրաստվում ենք դատի տալ Հ.Հովհաննիսյանին», - ասացին կոլեկտիվում աշխատող կանայք:

Նրանք նաև հայտնեցին, որ Հմայակ Հովհաննիսյանը զավթել է ինստիտուտին պատկանող մոտ 155 քմ տարածք։ Նրան պատկանում է ընդամենը 455 քմ տարածք, մինչդեռ հիմա նա զբաղեցնում է մոտ 600 քմ։ Իսկ իրենց պահանջն այն է, որ Հ.Հովհաննիսյանը վերադարձնի 155քմ-ը:

Ի դեպ, Ս.Ջուլհակյանը ասուլիսի ժամանակ զանգահարեց Հայ Առաքելական եկեղեցու Չեխիայի հոգևոր հովիվ Բարսեղ վարդապետ Փիլաչյանին, ով ըստ Հ.Հովհաննիսյանի, իբր թե նամակ է գրել, որում նշած է, թե Ջուլհակյանը վտանգավոր է հասարակության համար: Հայր Բարսեղը հեռախոսազրույցի ժամանակ ասաց, որ ինքը Հ.Հովհաննիսյանին չի ճանաչում: «Խնդրում եմ իմ անունը չշոշափել անձնական կամ քաղաքական շահարկումների մեջ: Որևէ նամակ չի եղել և լինել չի կարող, խնդրում եմ չշահարկեն և չվարկաբեկեն հայ եկեղեցականի անունը»,- ասաց Հայր Բարսեղը: