Ձեր վստահելի աղբյուրը

Ինչպես հայտնի է՝ 2007 թվականի ընտրությունների արդյունքում Հայաստանում 4 ուժեր ձևավորեցին քաղաքական կոալիցիա (2009-ին ՀՅԴ-ն դուրս եկավ կոալիցիայից), որի հիման վրա ստեղծվեց կոալիցոն կառավարությունը: Հաշվի առնելով այն փաստը, որ մանավանդ նախընտրական փուլում կառավարությանն ուղղված քննադատությունը բավականին շատ է, Panorama.am-ը փորձեց ընտրություններին մասնակցող կուսակցություններից և դաշինքներից ճշտել նրանց մոտեցումներն առ այն, թե կոալիցիոն կառավարության աշխատանքների կամ որևէ նախարարի կոնկրետ գործունեության համար ով է պատասխանատու:

Հայաստանի Հանրապետական կուսակցության Գործադիր մարմնի անդամ Գագիկ Մինասյանը նշեց, որ ցանկացած նախարարի գործունեության համար պատասխանատու և՛ կառավարությունը, և՛ կուսակցությունը, որը առաջադրել է վերոնշյալ նախարարին, և՛ կոալիցիան, որը ծնել է կառավարությունը:

«Բոլորն էլ անխուսափելիորեն պատասխանատվություն են կրում ինչպես բացթողումների, այնպես էլ հաջողությունների համար»,- նշեց նա:

Հայաստանի Դեմոկրատական կուսակցության ղեկավար Արամ Գասպարի Սարգսյանը նշեց, որ նախարարների գործունեության համար պատասխանատու է և Կառավարությունը, և՛ կուսակցությունը, որը նշանակել է նախարարին,

«Այստեղ բաժանել` ում մեղքն է ավելի շատ, չեմ կարծում, որ ճիշտ է: Եթե կառավարությունը դժգոհ է նախարարի աշխատանքից, պետք է հարց բարձրացնի այդ նախարարին ազատելու փաստը: Այստեղ մեկը մյուսի վրա մեղքը գցելը կարծում եմ, սխալ է:

Հայաստանի կոմունիստական կուսակցության առաջին քարտուղար Ռուբեն Թովմասյան ևս նշեց, որ և՛կառավարությունը, և՛ նրան առաջադրող կուսակցությունը պատասխանատու են նախարարի գործունեության համար:

«Երկուսն էլ պատասխանատվություն կրում են: Նախ, կուսակցությունը պետք է ուսումնասիրի, թե ում է առաջադրում, իմանա նրա պատրաստակամությունը` արդյոք այդ բնագավառին համապատասխանում է, թե` չէ, նրա ունակությունը կառավարման համակարգում, կրթությունը, ունի՞ աշխատանքային փորձ, թե չունի, ինչպե՞ս կարող է նա մարդկանց հետ աշխատել և այլն: Այս բոլորը պետք է իմանա կուսակցությունը: Կառավարությունն էլ իր հերթին է պատասխանատու: Նախարարը հո չեկա՞վ ու ձախողեց: Ինչ-որ մի ժամանակահատված հետո կառավարությունը զգացել է, որ ձախողում է: Կառավարությունն էլ իր հերթին պետք է գնահատական տար դրան»,- ասաց նա:

«Միավորված հայեր» կուսակցության նախագահ Ռուբեն Ավագյանը ընդգծեց, որ նախարարի գործունեության համար առաջինը պետք է պատասխան տա նրան առաջադրած կուսակցությունը

«Եթե կուսակցությունը նրան առաջադրում է, ապա պետք է վստահ լինի, որ նա կյանքի կկոչի կուսակցության հիմնադրույթները, այն խոստումները, որը կուսակցությունը տալիս է»,- ընդգծեց նա:

ՀՅԴ նախընտրական քարոզչության համակարգող, նախկին Սոցապ նախարար Աղվան Վարդանյան հարցի առնչությամբ նշեց. «Ո՞ր կառավարության մասին է խոսքը… եթե ներկայիս կառավարության մասին է, ուրեմն զանգեք այսօրվա նախարարներին, այսօրվա կառավարության դեպքում ես չգիտեմ ով է պատասխանատու:

Մեր հարցապնդմանը, թե սովորաբար ինչպես պետք է լինի, Աղվան Վարդանյանը նույն զգուշավորությամբ կրկին անորոշ պատասխան տվեց. «Սովորաբար չի լինում, լինում, կան կոնկրետ դեպքեր՝ նայած թե Ձեր հարցը որտեղից է գալիս, ինչից հետո է դա Ձեզ հետաքրքրում»:

Փորձեցինք կապնվել նաև ԲՀԿ մամլո խոսնակ Բաղդասար Մհերյանի հետ, սակայն վերջինս այդպես էլ մեր մեր հեռախոսազանգին չպատասխանեց, իսկ ԲՀԿ ղեկավարի մամուլի խոսնակ Խաչիկ Գալստյանի հեռախոսն անջատված էր:

Panorama.am-ի հետ զրույցում ՕԵԿ մամուլի խոսնակը նշեց, որ այդ հարցով կապնվենք կուսակցության փոխնախագահ Հեղինե Բիշարյանի հետ, սակայն վերջինիս հեռախոսն անջատված էր: ԱԺ պատգամավոր Հովհաննես Մարգարյանը ևս զանգերին չպատասխանեց:

Վերոնշյալ հարցի կապակցության հնարավոր չեղավ կապնվել «Ժառանգություն» կուսակցության ներկայացուցիչների հետ:

Ինչևէ։ Եթե անգամ պատասխանեն զանգերին, դժվար թե շատ տարբեր պատասխաններ տային. Անտրամաբանական կլինեին այլապես դրանք։ Ու կառավարության աշխատանքն էլ անբավարար չի գնահատվել, որքան հիշում եք։ Ի տարբերության հասարակության գնահատականի։ Ինչ է ասելներս` կամ սա հիշեք, հարգելի կառավարություն և հարգելի կուսակցություններ, ու հետագայում չաշխատող նախարարին հանեք, որ կուսակցության աչքին երևա ով է մեղավոր ու ով է պատասխանատու, կամ էլ հիմա զուսպ եղեք մեղավորներ փնտրելիս ու իզուր ձեր աչքում ձեզ մի հակասեք։

Նախորդիվ`  Զաքարյան. ՀՀԿ-ն գնաց քաղաքական ուժերի կոնսոլիդացման ճանապարհով ակնկալելով նաև համաչափ պատասխանատվություն իր մյուս գործընկերներից