Ձեր վստահելի աղբյուրը

Այսօր առավոտյան Ախալցխայի Սբ. Գրիգոր Լուսավորիչ եկեղեցում տեղի է ունեցել Հայոց ցեղասպանության զոհերի հիշատակին նվիրված Սբ. Պատարագ: Պատարագին մասնակցել են քաղաքի ու շրջակա գյուղերի հայերը: Այս մասին Panorama.am-ի հետ զրույցում պատմեց ջավախքցի Նարինեն:

Նա նաև պատմեց, որ պատարագից հետո նրանք Հայաստանի պետական դրոշները ծածանելով ու Հայոց ցեղասպանությունը դատապարտող բազմաթիվ պաստառներով ու շարժվել են դեպի Հովհաննես Թումանյանի անվան հայկական դպրոց, որպես անհամաձայնության նշան նրանց հետ ովքեր վերևներից արգելել են դպրոցներին մասնակցել ամենամյա սգո երթին:
 
«Այդպիսի արգելք կար, բայց հայերը կարողացան իրենց հարգանքի տուրքը մատուցել»,- ասաց նա` շարունակելով, որ երթով նրանք հասան մինչև Մարդա թաղամաս, որտեղ և տեղադրված է Ցեղասպանության զոհերին նվիրված խաչքար հուշակոթող:

Արգելքի մասին Panorama. am-ին պատմեց նաև Ազգային ժողովի ջավախահայ պատգամավոր Շիրակ Թորոսյանը. «Ախալցխայի հայկական գյուղերի բոլոր դպրոցներին և հայ հասարակությանը արգելվել էր մասնակցել Հայոց ցեղասպանության (Armenian Genocide) զոհերի հիշատակը ոգեկոչող միջոցառմանը:

Նախորդ տարիներին պատգամավորը նման դեպք չի հիշում: «Նախորդ տարիներին նման դեպք չի եղել: Ես հիշում եմ, որ մի տարի Ախալցխայում տեղի հայերն ուզում էին ցեղասպանությանը նվիրված հուշակոթող տեղադրել, խնդիր առաջացավ, բայց հետո հուշակոթողը տեղադրվեց», -փոխանցեց նա:

Նրա խոսքով, կատարվածը «տգեղ երևույթ է» և վատ նախադեպ կարող է լինել: «Ես կուզեի հավատալ, որ սա առաջին ու վերջին դեպքը կարող է լինել, որովհետև սա ոչ միայն ստվեր է նետում հայ-վրացական հարաբերությունների վրա, այլև առաջին հերթին սրում է Ջավախքի հայության ու վրաց պետության փոխհարաբերությունները, որովհետև այսօր հայությունը էմոցիոնալ է շատ և յուրաքանչյուր հայ ձգտում է այդ օրը տուրք տալ Մեծ եղեռնի նահատակներին, բայց գործընկեր պետությունը արգելում է նրանց մասնակից լինել այդ միջոցառումներին», -հավելեց Շիրակ Թորոսյանը:

Նրա խոսքով, պետք է ամեն ինչ անել, որ նման բան չկրկնվի և որ «Ջավախքի հայության իրավունքների հարգումը լինի այդ երկրի քաղաքականության մաս»:
 
Հարցին, թե մասնավորապես ի՞նչ պետք է անել, Թորոսյանը պատասխանեց. «Ես միշտ ասել եմ` Վրաստանի հետ կառուցվող քաղաքականությունը պետք է լինի համարժեք Հայաստանի նկատմամբ վարվող քաղաքականությանը` բոլոր հարցերում և նաև ազգային խնդիրներում: Եթե մենք Վրաստանին հարգում ենք որպես հարևան, բարեկամ երկիր, աշխատում ենք վեր մնալ քննադատություններից, բայց ձեռնպահ ենք մնում, որպեսզի չնեղացնենք մեր հարևաններին, ապա նրանք երբեք դրանով չեն կաշկանդվում և նախագահից սկսած ցանկացած պաշտոնյա կարող է Հայաստանի հասցեին վիրավորական հայտարարություններ հնչեցնել»:

Նշենք, որ Կենդանի մատյանում «javakhk» բլոգերը տեղեկացրել էր, որ ապրիլի 23-ին Ախալցխայի Ռեսուրս կենտրոն էին հրավիրվել Ախալցխայի բոլոր հայկական գյուղերի ու քաղաքի դպրոցների տնօրենները: «Ռեսուրս կենտրոն ժամանած տնօրեններին խստիվ արգելեն են դասերի ընթացքում մասնակցել ապրիլ 24-ի Ցեղասպանության հոգեհանգստյան Պատարագին և սգո միջոցառումներին, որոնց նախորդ տարիներին առանց որեւէ խոչնդոտների մասնակցում էին»:



Լուսանկարները` «javakhk»-ից