Ձեր վստահելի աղբյուրը

ԲՀԿ-ական Վարդան Օսկանյանն իր ելույթներում բացասական է համարում այն փաստը, որ ՀՀԿ-ն նախորդ խորհրդարանական ընտրությունների արդյունքում բացարձակ մեծամասնություն է կազմել, ինչը վերջինս որակում է մենիշխանություն: Հաշվի առնելով այն փաստը, որ ԲՀԿ-ն ևս ձգտում է 50%+1, Panorama.am-ը ՀՀԿ խմբակցության պատգամավոր Գագիկ Մինասյանից խնդրեց պարզաբանել, թե արդյո՞ք հակասություն չի նկատում այն հարցում, որ ՀՀԿ-ի՝ խորհրդարանում բացարձակ մեծամասնություն կազմելը Վ. Օսկանյանը բացասական է համարում, սակայն նրա իսկ խոսքերով, ԲՀԿ-ն ձգտում է նման իշխանության:

«Այսօր քաղաքական ուժերը ու հանրությունը ըմռնումով են մոտենում ԲՀԿ-ի ընտրություններում հնարավոր առավելագույն ձայներ հավաքելու ու հաղթելու ձգտմանը: Անտրամաբանական է, սակայն, որ Օսկանյանը մեկ այլ կուսակցության, դիցուք ՀՀԿ-ի նման ցանկությունն անընդունելի և դատապարտելի է համարում», - ասաց Գ.Մինասյանը:

Անդրադառնալով Վ. Օսկանյանի այն դիրքորոշումներին թե կոալիցիան ձևական բնույթ է կրել և թե՝ պարտադիր չէ, որ կուսակցության առաջին դեմքերի մոտեցումները համընկնեն, Գ. Մինասյանը նշեց. «Հատկապես, նախընտրական քարոզչության ընթացքում դա բացարձակապես անթույլատրելի պահվածք է: Նույնիսկ այն բանից հետո, երբ պարոն Ծառուկյանը հստակ հայտարարեց, որ կոալիցիան ձևական բնույթ չի կրել, Վ Օսկանյանը շարունակում է խեղաթյուրել ԲՀԿ դիրքորոշումը, հանրությանը գցելով շփոթի մեջ: Դա անթույլատրելի և ընտրողին մոլորեցնելու անպարկեշտ գործելաոճ է»,- եզրափակեց Գ. Մինասյանը:

«Կոալիցիայում եղել են խնդիրներ, որոնք քննարկվել են և եղել են դեպքեր, որ կոալիցիոն կուսակցություններից մեկը սկզբունքորեն համաձայն չի եղել ներկայացված օրինագծին ու թույլ չի տվել, որ օրինագիծն անցնի: Իրականությանը բոլորովին չի համապատասխանում այն թեզը, որ ՀՀԿ-ի երկու գործընկերների ներկայությունը կոալիցիայում ձևական բնույթ է կրում»,- հավելեց Գ. Մինասյանը:

Պատգամավորը, որպես կոալիցիոն գործընկերների միջև եղած անհամաձայնության օրինակ հիշեցրեց. «Ամենավերջին օրինակը դա «Կանխիկ գործառույթների սահմանափակման մասին» օրինագիծն էր, որով պայքարելու էինք ստվերային շրջանառության և կորուպցիայի դեմ: Օրենքով սահմանվելու էր, որ 3 մլն. դրամը գերազանցող յուրաքանչյուր գործարք պետք է իրականացվի անկանխիք ձևով, օրենքը նաև բավականին էական ազդեցություն էր ունենալու առողջապահության և կրթության ոլորտներում ստվերային շրջանառության սահմանափակման մասով: ԲՀԿ-ի մեր գործընկերները չմասնակցեցին քվեարկությանը, դրանով թույլ չտալով, որ օրինագիծն ընդունվի: Ի դեպ եթե նրանք ձեռնպահ, կամ նույնիսկ դեմ քվեարկեին, այսօր մենք կունենայինք այդպիսի օրենք: Օրինագծի քվեարկությունից առաջ, ԲՀԿ ներկայացուցիչը հանդես եկավ հայտարարությամբ, նշելով, որ խմբակցությունը չի մասնակցելու քվեարկությանը, արդյունքում օրինագիծը չընդունվեց: Այսինքն` խոսել այն մասին, որ մեր գործընկերների ներկայությունը ձևական բնույթ է կրել, իհարկե իրականությանը չի համապատասխանել: Ես համոզված եմ, որ պարոն Օսկանյանը քաջատեղյակ է այս ամենից և միտումնավոր փորձում է հանրությանը թյուրիմածության մեջ գցել»,- ասաց Գ. Մինասյանը:

Խոսելով այն մասին, որ հանրությունը կարոտ է փոփոխությունների պատգամավորը նշեց, որ վերջին տարիներին բարեփոխումներ իրականացնող առաջամարտիկ ուժը եղել է Հայաստանի Հանրապետական կուսակցությունը, և այդ բարեփոխումները շարունակական բնույթ են կրում:

«Մենք ունենք մեր ծրագիրը, որն ամբողջությամբ տոգորված է բարեփոխումների ոգով: Այն բազմաթիվ հանդիպումներում, որ ունեցել ենք այս նախընտրական շրջանում մեր հասարակության ամենատարբեր շերտերի հետ, ես համոզվել եմ, որ ժողովուրդն իսկապես կարոտ է բարեփոխումների և ՀՀԿ-ի մեջ է տեսնում այն ուժը, որն ի զորու է բարեփոխումների գործընթացը առաջ տանել: Եվ այս առումով, եթե որևէ մեկն ուզում է գտնել բարեփոխումներ իրականացնող ուժ, ապա դա չափազանց հեշտ է` դա ՀՀԿ-ն է»,- ասաց պատգամավորը: