Ձեր վստահելի աղբյուրը

«Կենտրոն» հեռուստաընկերության «Էպիկենտրոն» լրատվական ծրագրի ընթացքում նախօրեին երկու անգամ հրապարակվել են սոցիալական հարցումների արդյունքներ, որոնք վերաբերել են ընտրություններին մասնակցող քաղաքական ուժերի վարկանիշերին: Հարցումներն անցկացրել էր «ИМА-КОНСАЛТИНГ» գործակալությունը:

Վարչական իրավախախտումների մասին օրենսգրքի 40.9 հոդվածը սահմանում է, որ քվեարկության օրվան նախորդող 7 օրվա ընթացքում, ներառյալ` քվեարկության օրը` մինչև ժամը 20.00-ն, թեկնածուների, կուսակցությունների (կուսակցությունների դաշինքների) վերաբերյալ սոցիոլոգիական հարցման արդյունքներ հրապարակելը առաջացնում է տուգանքի նշանակում` ֆիզիկական անձանց նկատմամբ` նվազագույն աշխատավարձի երեքհարյուրապատիկից մինչև հինգհարյուրապատիկի չափով, հարցում իրականացնող կազմակերպության նկատմամբ` նվազագույն աշխատավարձի վեցհարյուրապատիկից մինչև ութհարյուրապատիկի չափով:

Սրա վերաբերյալ Panorama.am-ը փորձեց մեկնաբանություն ստանալ «Էպիկենտրոն»-ի խմբագիր Պետրոս Ղազարյանից:
«Դրա համար ինձ չպետք է դիմեք, պետք է դիմեք համապատասխան մարմիններին, ովքեր վերահսկում են դա: Մենք օրենքը չենք խախտել, ցանկացած խախտման պարագայում էլ պատրաստ ենք էդ բանը լուծել, պրոբլեմ մենք չունենք»,-ասաց Պ. Ղազարյանը: