Հետընտրական սպասումների նախընտրական ազդակները
Բուռն սկիզբ արձանագրած նախընտրական պայքարը վերջին օրերին զգալի պասիվություն է արձանագրում: Առաջին հայացքից դա կապված է, հավանաբար, Հայաստանի քաղաքական կյանքում մեծ պահանջարկ ունեցող սենսացիաների, բացահայտումների, խոստովանությունների և նմանատիպ այլ անակնկալների սպառման հետ: Թվում է, թե իր անարդյունավետությունը փաստեց նաև նախընտրական շրջանում երկրի սոցիալական կյանքին առնչվող հարցերի քննարկումը, որն ավարտվեց՝ կարծես, այդպես էլ չսկսած:
Մյուս կողմից, առնվազն այն քաղաքական ուժերի համար, որոնք պատրաստվում են մասնակցել հաջորդ տարվա նախագահական ընտրություններին, ԱԺ ընտրությունները պետք է որ լինեն առաջին հերթին քաղաքական, այլ ոչ թե տնտեսական կապիտալ կուտակելու միջոց: Մինչդեռ նման հավակնություն ունեցող մի շարք ուժերի համար այդ մտադրությունը մնաց միայն հայտարարությունների մակարդակում, և անցնող ընտրապայքարը, կարծես թե, չդարձավ քաղաքական կապիտալի կուտակման փուլ: Դա կարող էր արվել թեկուզ և քաղաքացիական գիտակցությամբ կայուն ընտրազանգված ձևավորելու միջոցով, թեպետ շատ այլ եղանակներ էլ կան:
Քաղաքական մի շարք ուժերի՝ վերջին շրջանում հնչող հայտարարություններում նկատվում է ակնարկ հետընտրական հնարավոր զարգացումներին: Տպավորությունն այնպիսին է, որ ընտրողի համար կարևորը ընտրություններն են, իսկ թեկնածուների համար՝ հետընտրական իրավիճակն ու զարգացումները: Կարծես թե քաղաքական ուժերը ընտրություններից ավելի մեծ սպասումներ ունեն, քան ընտրողները: Վերջիններիս շրջանում այս, ինչպես և համապետական նշանակության շատ այլ ընտրությունները ընկալվում են հիմնականում առօրյա հիմնախնդիրների մակարդակում: Վկայությունը՝ «Ձեր մոտ է՞լ են ասֆալտ արել ու մանկական հրապարակ բացել» ընտրությունների առնչությամբ քննարկվող ամենատարածված հարցերից մեկը:
Այն մասին, որ քաղաքական զարգացումների հիմնական շեշտը փոխանցվել է հետընտրական շրջան, վկայում է նաև այն հանգամանքը, որ քաղաքական ուժերը հիմնականում ձեռնպահ են մնում այս փուլում կտրուկ և պատասխանատու հայտարարություններից՝ չփակելու նոր ԱԺ-ում իրենց համար այլ ուժերի հետ դաշինքներ կազմելու կամ, ընդհակառակը, համագործակցությունից հրաժարվելու հնարավորությունները: Թեպետ հատկապես քաղաքականության պարագայում գրեթե ոչինչ միանշանակ կանխատեսելի չէ:
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
