Ձեր վստահելի աղբյուրը

Մաշտոցի պուրակում բնապահպան ակտիվիստները կմնան այնքան, մինչև իրենց աչքով կրպակները ապամոնտաժված տեսնեն: Մինչ շոշափելի արդյունքը չտեսնեն, հաղթանակը չեն նշելու: Իսկ պայքարի հաջորդ կանգառը լինելու է Թեղուտը:
Այս մասին Panorama.am-ին հայտնեցին բնապահպան ակտիվիստները, որոնց մի մասը դեռ այգում է ու քննարկում է տեղի ունեցածը:

Հիշեցնենք, որ այսօր Մաշտոցի պուրակ է այցելել ՀՀ նախագահ Սերժ Սարգսյանը: Նա քաղաքապետ Տարոն Մարգարյանին ասել է, որ այգում տեղադրված կրպակները գեղեցիկ չեն, «և լավ կլինի, որ ձևը գտնես, այս ամենն ապամոնտաժեք»:

«Այսօրվա որոշումը մեր համառ պայքարի արդյունք էր: Սա այն նախադեպն է, երբ հանրությունն իր իրավունքները պաշտպանելու համառությամբ ու ձգտումով հասավ իր ուզածին: Համարում եմ, որ մենք մեր այգին ետ գրավեցինք օլիգարխիկ համակարգից»,-ասաց ակտիվիստներից Արման Բաբայանը:

Բնապահպաններից Սոսեն ասաց` շատ ուրախ է ու ոգևորված: «Այս հաղթանակն ավելի է մեզ ոգևորում, որպեսզի շարունակենք մեր պայքարը նույն ոգով: Թեղուտը դեռ մեզ է սպասում»,-ասաց Սոսեն, ինչին հետևեց մի քանի ակտիվիստների արձագանքը` «ոչ միայն Թեղուտը, բոլոր անօրինականությունները վերացնելով պետք է շարժվենք առաջ, այնպես, որ Սահմանդրությունը մեր երկրում գործի»:

Նրանցից մեկն էլ նկատեց, թե նույնիսկ կրպակների ապամոնտաժումից հետո այգի հաճախ են այցելելու, որովհետև «մշակութային այգի է դարձել, նոր մթնոլորտ է ձևավորվում այստեղ, շարունակելու ենք մեր միջոցառումները: Պայքարի արդյունքում ձեռք բերած այգի է, և դա մեզ համար խորհրդանշական է»:

Ակտիվիստներից մեկն էլ դժգոհեց, թե այսօր այգի են եկել նույնիսկ այնպիսի հեռուստաընկերություններից, որոնք ոչ մի անգամ չեն եղել այգում ու չեն լուսաբանել իրենց պայքարը: «Մենք մեջքով կանգնեցինք դեպի նրանց, ոչ մի հարցի չպատասխանեցինք»,-ասաց ակտիվիստը:

Բնապահպաններից մեկը բարձրացավ սալիկների վրա ու ընթերցեց երկրի ղեկավարի պաշտոնական կայքում տեղադրված հաղորդագրությունը: Ընթերցումը ընդհատվում էր երբեմն դժգոհ բացականչություններով, երբեմն` ծափահարություններով: Երիտասարդներն հատկապես դժգոհ էին փաստից, որ երկրի ղեկավարը շնորհակալություն է հայտնել այգում կարգը պահպանող ոստիկաններին:

Ընթերցումից հետո, բոլորը սկսեցին բացականչել` «Այգին մերն է, այգին մերն է»: Իսկ նրանցից մեկն էլ նկատեց, թե «աչք շոյող ու սիրուն չեն նաև Հյուսիսային պողոտայի շենքերը, պետք է դրանք էլ ուրեմն ապամոնտաժել»:

Այգում այս պահին էլ ոստիկաններ կան: Նրանք հսկում են կրպակները: Այգու տարածքում բարեկարգման աշխատանքներ են ակտիվորեն ընթանում: Իսկ նույն այգու` փողոցի մյուս կողմում գտնվող հատվածն ուղղակի անմխիթար վիճակում է` չգործող շատրվաններ, քանդած մայթեր ու սալիկներ, կուտակված աղբ, կոտված աղբաման…


Լուսնկարները` Լիլիան Գալստյանի