Ձեր վստահելի աղբյուրը

 Հայ Ազգային կոնգրեսի անդամ Հայաստանի Լիբերալ կուսակցության անդամ Մանուշակ (Վիոլետա) Պետրոսյանը, որը որպես պատգամավորության թեկնածու, ըդնգրկված է ՀԱԿ համամասնական ցուցակում (10-րդ տեղ), առաջադրվել է նաև Երևանի թիվ 11 ընտրատարածքում: Այստեղ նրա միակ մրցակիցը Էրեբունի վարչական շրջանի նախկին ղեկավար, ՀՀԿ-ական Մհեր Սեդրակյանն է, նույն ինքը` Թոխմախի Մհերը:

Օրերս Մանուշակ Պետրոսյանի համակիրների կողմից քարոզարշավն իրականացնելու ժամանակ միջադեպ էր տեղի ունեցել, որի կապակցությամբ ոստիկանությունում այժմ հետաքննություն է կատարվում:

Ներկայացնում ենք Panorama.am-ի հարցարզույցը տիկին Պետրոսյանի հետ

-Տիկին Պետրոսյան, ինչպե՞ս եք գնահատում նախընտրական քարոզարշավը:
-Քանի դեռ ֆիզիկական ծեծուջարդ չի եղել և հույս ունեմ, որ չի էլ լինի, ընդհանուր առմամբ դրական եմ գնահատում նախընտրական քարոզարշավը: Փոքր միջադեպեր, սակայն տեղի ունենում են. մարդիկ խոչընդոտում են մեր շփումները բնակիչների հետ, շատ ակնհայտ է դա տեղի ունենում: Երեկ, օրինակ, ես չեմ եղել, եղել են մեր ակտիվներից, ովքեր շրջել և բաժանել են բուկլետներ, և ինչ-որ մարդիկ իրենց վերապահել են իրավունք, դուրս գալ և ասել, որ արգելում ենք գաք մեր փողոց, աղմուկ-աղաղակ են բարձրացրել: Նման բաներ տարածված չեն, բայց նման միջադեպեր մենք տեսնում ենք, լինում են: Կարող է մի մարդ դուրս գա և ամբողջ Հանրապետական կուսակցության անունից հայտարարի, որ այստեղ բոլորն իրենց ձայները տալու են նրանց: Դե մենք էլ նրանց ասում ենք` հարգում ենք ձեր իրավունքը, թույլ տվեք ամեն մեկն իր ընտրությունը կատարի: Այսինքն էյդպիսի «դոշ ծեծելու» աստիճանի նվիրվածություններ են լինում: Ես դա շատ վատ եմ հաամրում, ինձ համար դա ամենացածրորակ տեսակն է նվիրվածության դրսևորման:

-Երբ ձեր մրցակիցը պայքարի նման ուղի է բռնել, չե՞ք հուսահատվում
-Ես կասկածում եմ, որ իմ մրցակիցը  ուղիղ ցուցմունքներ տա, որովհետև դրանք այնքան մանր դրսևորումներ են ինչ-որ անհատների կողմից... չեմ կարծում, որ նա այդ մակարդակի իջնի և ասենք ինչ-որ մի անզուսպ կնոջ կամ տղամարդու ցուցմունք տա, որ խոչընդոտեն մեր քարոզարշավը կամ բուկլետների տարածմանը: Դա ցածր աստիճանի նվիրվածություն է: Իսկ հուսահատվելու մասին խոսք անգամ լինել չի կարող, որովհետև ես անձամբ և իմ ընկերները  88-ից այնպիսի պայքարի մեջ ենք մտել` ղարաբաղյան խնդիր, անկախությունը. այսինքն` լուրջ չէր լինի, որ մեզ նման մարդիկ հուսահատության մասին կամ մտածեին կամ խոսեին: Մենք պայքարում ենք և մինչև վերջ քաղաքակիրթ ձևով, սահմանադրական բոլոր մեր իրավունքները պաշտպանելով, մինչև վերջ պայքարելու ենք և ես վստահ եմ, որ հաղթելու ենք: Ես տեսնում եմ մարդկանց տրամադրությունները և ընդհնարապես մտածելու խնդիր չունեմ: Մենք պետք է կանխենք հնարավոր կեղծիքները: Ուրիշ որևէ խնդիր չկա:

-Ո՞ւմ եք համարում ձեր հիմնական ընտրող: Ինչպիսի՞ նկարագիր ունի նա:
-Ես հանդիպում եմ շատ տարբեր մարդկանց հետ: Ամենուրեք, միանշանակ արտակարգ ընկալում և մոտեցում կա մեր ծրագրի ու գործունեության նկատմամբ:

-Ընտրապայքարի մեջ մտած ուժերից ո՞ւմ եք համարում ձեր գլխավոր մրցակից, հակառակորդ: 
-Մեր քաղաքական մրցակիցը և հակառակորդը, բազմիցս ասել ենք, Հանրապետական կուսակցությունն է: Մենք որևիցե մեկի հետ մրցելու խնդիր չունենք:

-Իսկ «Օրինաց երկի՞րը»
-Դե, «Օրինաց երկիրը»…Ես նույնիսկ ավելորդ եմ համարում հիշատակել, լուրջ չի լինի ուղղակի

-Այս պահի դրությամբ ինչպե՞ս եք գնահատում ձեր և ձեր մրցակից ուժերի հնարավորությունները:
-Շուտով դա կերևա, եթե, իհարկե, լինեն արդար ընտրություններ: Ես վստահ եմ մեր ուժերի վրա, ես վստահ եմ ժողովրդի վերաբերմունքին ու գնահատականին Հայ Ազգային կոնգրեսի նկատմամբ և համոզված եմ, որ արդար, թափանցիկ, ազնիվ ընտրությունների արդյունքում մենք ճնշող մեծամասնություն կունենանք:

-Տիկին Պետրոսյան, ընտրություններին մասնակցող ո՞ր ուժերի հետ կարող եք հետընտրական դաշինք կազմել:
-Այսօր ապրիորի ոչինչ չենք կարող ասել, որովհետև դա խորհրդարանում կարող է որոշվել և պետք է նաև նկատի ունենալ, թե յուրաքանչյուր ուժ իր առջև ինչ խնդիրներ է դրել: Կարող է լինի համագործակցություն որոշ հարցերի շուրջ, կարող է չլինել: Այդ ամենը պարզ կլինի արդեն հետընտրական շրջանում, երբ կձևավորվի խորհրդարանը: Շատ շուտ է այդ մասին խոսելը, որովհետև համագործակցությունը ինքնանպատակ չէ: