Ձեր վստահելի աղբյուրը

Հանրապետություն կուսակցության քաղխորհրդի անդամ Սմբատ Այվազյանը Panorama.am-ին տված հարցազրույցում ոչ հերքում, ոչ էլ հաստատում է տեղեկություններն այն մասին, որ խորհրդարանական ընտրություններից հետո Արամ Զավենի Սարգսյանը պատրաստվում է հրաժարվել իր մանդատից:

ՀԱԿ անդամ Սմբատ Այվազյանն այն կարծիքին է, որ Կոնգրեսի անդամները նվազ ձայներ ապահովելու դեպքում չպետք է մտնեն խորհրդարան. «Նրանց ճանապարհը մեկն է` դուրս գալ փողոց և գնալ դեպի նախագահական ընտրություններ»:

Անդրադառնալով Կոնգրես-«Հանրապետություն» հարաբերություններին` Սմբատ Այվազյանը պնդեց, որ իրենց կուսակցության քաղաքական կշիռը ՀԱԿ-ում եղել և մնում է նույնը, իսկ ինչ վերաբերում է Կոնգրեսի նոր քաղաքական կուրս որդեգրելուն և դրա հետևանքով Արամ Սարգսյանի հետ ունեցած տարակարծություններին ու ներքին լարվածությանը` ասաց հետևյալը. «Կարծում եմ, որ այդ հարցերը պետք է Արամ Սարգսյանին ուղղել: Իհարկե, Կոնգրեսի հետ կան տարակարծություններ` միասնական շտաբի հետ կապված և այդ տարակարծությունները կան բոլորի մոտ՝ հասարակության շերտերի, որովհետև, եթե հասարակությունը համոզված լինի, որ միսանական շտաբի երեք անդամները՝ ՀՅԴ-ն, ԲՀԿ-ն և ՀԱԿ-ը առանձին-առանձին իրականում անկեղծ են և երեքը միասնական կերպով իսկապես անկեղծ են գործելու, ապա դրանով երկրում, լրիվ այլ իրավիճակ կստեղծվեր: Չնայած, այդ շտաբի հիմնումը որոշակի նախադրյալներ ստեղծեց, բայց չմոռանանք, որ այն դեռևս չի կայանում, դեռևս չի ամբողջանում և թափ չի հավաքում»:

Հետաքրքրվեցինք նաև` ինչով էր պայմանավորված, ըստ էության, ընտրությունները բոյկոտելը, արդյոք Կոնգրեսի քաղաքական գծի փոփոխությունն էր պատճառը, որ «Հանրապետություն» կուսակցության ներկայացուցիչները հրաժարվեցին ընդգրկվել ՀԱԿ-ի համամասնական ցուցակում և նույնիսկ մեծամասնականով չառաջադրեցին իրենց թեկնածությունը: Այս կապակցությամբ Սմբատ Այվազյանը նշեց. «Ես դեռևս անցած տարվանից էի որոշել, որ ինքս մասնակցություն չեմ ունենալու Կոնգրեսի ոչ համամասնական ցուցակի կազմի մեջ, ոչ էլ մեծամասնական առաջադրման ընտրակարգով: Մեծամասնականով ես խնդիր չունեի, որովհետև դեռ 2003-ին մեծամասնականով հաղթել էի: Եվ նորից մտնել այդ պայքարի մեջ, ես դրա իմաստը չգտա: Սա էր ամբողջ խնդիրը… Իսկ «Հանրապետություն» կուսակցությունը ընտրապայքարում պասիվ չէ, մասնակցում է ընտրարշավին: Մեր թիմը աշխատում է: Բայց թե ինչ կստացվի այս ընտրությունների արդյունքում, կտեսնենք»:

Արամ Սարգսյանի կուսակիցը հրաժարվեց նաև մեկնաբանել այն լուրերը, թե առաջիկայում «Հանրապետություն» կուսակցությունը դուրս է գալու Հայ ազգային կոնգրեսից: Միաժամանակ նա չբացառեց, որ առաջիկայում հնարավոր է ամենատարբեր սցենարների զարգացում:
«Ընտրությունների արդյունքներից են կախված «Հանրապետություն» կուսակցության հետագա քայլերը»,- նշեց Սմբատ Այվազյանը` հավելելով, որ Արամ Սարգսյանի հետագա քայլերի մասին մեկնաբանություններ կարող ենք վերցնել միայն Արամ Սարգսյանից:

Այս և այլ հարցերի պատասխանները դիտեք ստորև ներկայացվող տեսանյութում, որտեղ ՀԱԿ անդամ Սմբատ Այվազյանը որոշ բացահայտումներ է անում «Հանրապետություն» կուսակցության և ՀԱԿ-ի միջև եղած տարակարծությունների, Սարգսյան եղբայրների քաղաքական հայացքների տարբերության, Ռուբեն Հայրապետյան-Արամ Սարգսյան ընկերական կապերի և այլ պաշտոնյաների հետ ունեցած իրենց կապերի մասին:

Հարցազրույցը` Սյուզի Բադոյանի