Ձեր վստահելի աղբյուրը

«Գորիս» քրեակատարողական հիմնարկում գտնվող զինծառայող Սուրեն Կիրակոսյանը մահամերձ չէ, կյանքին վտանգ չի սպառնում: Այս մասին Panorama.am-ի հետ զրույցում հայտնեց Արդարադատության նախարարության քրեակատարողական վարչության հասարակայնության հետ կապերի բաժնի պետ Գոռ Ղլեչյանը:

«1989թ. ծնված Սուրեն Կիրակոսյանը «Գորիս» քրեակատարողական հիմնարկ է տեղափոխվել այս տարվա ապրիլի 7-ին ՊՆ ռազմական ոստիկանության 8-րդ կայազորային Եղեգնաձորի քննչական բաժնից: Ըստ իր հայտարարության, ինքը հացադուլ է արել ապրիլի 5-ից: Երբ տեղափոխվել է քրեակատարողական հիմնարկ, դիմում է գրել այն մասին, որ ինքը շարունակում է հացադուլը»,-ասաց մեր զրուցակիցը, նշելով, որ նա այժմ մյուս հացադուլավորների պես առանձին սենյակում է, բժիշկների հսկողության տակ է, առողջական վիճակը բավարար է:

Նշենք, որ այսօր Կիրակոսյանի մայրը, Զվարթ Կիրակոսյանը, ըստ որոշ լրատվամիջոցների, առավոտյան ՀՀ նախագահի նստավայրի մոտ ցանկացել է իրեն նետել ՀՀ նախագահ Սերժ Սարգսյանի շարասյունի մեքենաներից մեկի տակ: Դեպքի վայրում ներկա ոստիկանները հեռացրել են նրան` թույլ չտալով անել դա: Ըստ epress.am-ի, մայրը պատմել է, որ երեկ «Գորիս» ՔԿՀ-ում այցելել է որդուն, որից հետո հասկացել է, որ նա մահամերձ է:
«Չէ, չէ , նորմալ է, նորմալ, կյանքին վտանգ չի սպառնում»,-ասաց Ղլեչյանը:

Զինդատախազության դատախազ Գրիգոր Հովհաննիսյանը, ով հսկողություն է իրականացնում Եղեգնաձորի կայազորի զինդատախազության քրեական հետապնդման ոլորտում գործունեության նկատմամբ, այն կարծիքին է, որ հարցը փորձում են շահարկել:

Նա պատմեց, որ Սուրեն Գրիգորի Կիրակոսյանին ներկայումս մեղադրանք է առաջադրված Քրեական օրենսգրքի 361 հոդվածի 4-րդ մասով / զորամասը կամ ծառայության վայրն ինքնակամ թողնելը. եթե ինքնակամ բացակայությունը տևել է մեկ ամսից ավելի, բայց զինվորական ծառայությունից ժամանակավորապես խուսափելու նպատակով` պատժվում են կարգապահական գումարտակում պահելով` մեկից երեք տարի ժամկետով, կամ ազատազրկմամբ` մեկից չորս տարի ժամկետով/:
Դատախազն ասաց, որ զինվորը մեկնել է արձակուրդ նախորդ տարվա սեպտեմբերին, չի վերադարձել, նրա նկատմամբ հայտարարվել է հետախուզում, միայն այս տարվա փետրվարին են գտել ու կալանավորել: Պարզվում է, առաջին անգամ չէ, երբ Կիրակոսյանը ինքնակամ լքում է զորամասը կամ արձակուրդ գնալիս չի վերադառնում:

Դատախազի խոսքով, մինչ այս 2009-ի հունվարի 27-ին Կոտայքի քննչական բաժնի կողմից հարուցված է եղել քրեական գործ ՔրՕր-ի 327 հոդվածի 1-ին մասով` հերթական զորակոչից խուսափելու համար, որի վարույթը հետագայում` հունիսի 3-ին կարճվել է, «անձը ներվել է, հնարավորություն է տրվել, որ գնա ծառայի»: Հենց հաջորդ օրը նա զորակոչվել է Հրազդանի զինկոմի կողմից իքս զորամաս, որոշ ժամանակ անց անձը ինքնակամ լքել է զորամասը, բացակայելով մեկ ամսից ավելի, որի համար դատապարտվել է:

«Դատապարտվել է մեկ տարի կարգապահական գումարտակում պահելով, պատիժը կրելու ընթացքում պայմանական վաղաժամկետ ազատվել է փետրվարի 14-ին Կոտայքի մարզի ընդհանուր իրավասության դատարանի կողմից, դրանից հետո ուղարկվել է ծառայությունը շարունակելու Սիսիանի զորամասերից մեկում»: Այստեղ Կիրակոսյանը երեք անգամ, մեր զրուցակցի խոսքով, ուղեգրվել է հոսպիտալ` հետազոտման և բուժում ստանալու նպատակով. «Պաշտպանության նախարարի հատուկ ցուցում անցել է ամբողջական հետազոտություն և կարելի է ասել, շատ մեծ ուշադրության է արժանացել հոսպիտալում` և հետազոտման, և բուժման առումով»:

«2010-ի սեպտեմբերի 11-ին մինչև սեպտեմբերի 26-ը նրան տրվել է արձակուրդ: Սակայն արձակուրդից Կիրակոսյանը չի վերադարձել, առանց հարգելի պատճառների բացակայել է, փաստի առթիվ հարուցվել է քրեական գործ, խափանման միջոց է ընտրվել կալանավորումը և հայատարարվել է հետախուզում: Դրանից հետո քրեական գործը կասեցվել է, կասեցման ընթացքում արդեն այս տարվա փետրվարի 22-ին անձը հայտնաբերվել է: Փաստորեն 5 ամիս անձը ինքնակամ բացակայել է զորամասից»,-ներկայացրեց Գ. Հովհաննիսյանը:

Զինծառայող Կիրակոսյանը հայտնաբերվել է Հրազդան քաղաքում` ոչ իր տանը: «Որպես մեղադրյալ ցուցմունք չի տվել, միայն կցկտուր մի քանի նախադասությամբ ասել է, որ այդ ընթացքում որևէ բուժհիմնարկ չի դիմել, ինչը անտրամաբանական է, քանի որ, մոր պատմելով, իր որդին այդ ամբողջ ժամանակ հիվանդ է եղել ու նրան նորմալ բուժօգնություն չի ցուցաբերվել, դրա պատճառով էլ որդին փախել է: Անտրամաբանական է, որ այդ փախուստի ընթացքում նա, որևէ բուժօգնության և բուժհիմնարկ չի դիմել»,-ասաց դատախազը, ապա նշեց, թե հայտնաբերվելուց հետո զինծառայողը կրկին ամբողջական հետազոտություն է անցել:
Փաստորեն պետության կողմից զորակոչից խուսափելու համար նա մեկ անգամ ներվել է, երկրորդ անգամ ինքնակամ լքել է զորամասը, ապա` անընդհատ եղել է հոսպիտալներում` բուժհետազոտություն, զննում և այլն, դրանից հետո կրկին 5 ամիս ժամկետով լքել է զորամասը:

Ինչ վերաբերում է զինվորի մոտ հետազոտությունների արդյունքում հայտնաբերած հիվանդություններին, ապա ըստ ռազմաբժշկական փորձաքննության, Կիրակոսյանի մոտ հայտնաբերվել են «պիգմենտագորտնուկային խալեր, մազային որքին/ երբ խալի վրա մազ է աճում/, աճուկային շրջանում սնկախտ:

Ըստ փորձաքննության եզրակացության, խալերը բնածին են, իսկ սնկախտը և մազային որքինը ձեռք է բերել կյանքի ընթացքում` մինչև զորակոչը: Նրա մոտ հայտնաբերվել են նաև ձախ ուսագոտու շրջանի, ձախ բազկի և կրծքավանդակի վրա պիգմենտային խալեր, ինչպես նաև զույգ երիկամներում քարեր` 0.2-0.3 սմ չափերով: Խալերը բնածին են, եղել են զորակոչից առաջ, իսկ միզաքարային դիաթեզը առաջացել է ծառայության ընթացքում: Սնկախտը բուժվել է հոսպիտալում, դուրս է գրվել առողջացումով: Համաձայն այս բոլոր ախտորոշումների, Կիրակոսյանը պիտանի է ոչ շարային ծառայության: Նշվել է, որ խալերը աննշան խանագարում են ուսապարկ և զենք կրելուն:

«Այսինքն` Սիսիանում ծառայության ընթացքում նա ոչ նշանակվել է մարտական հերթապահության, ոչ պահակային ծառայության, վերակարգերում չի եղել»,-բացատրեց դատախազը: Գ. Հովհաննիսյանի խոսքով, Կիրակոսյանին առաջարկվել է նաև խալերի վիրահատություն իրականացնել: «Այդ վիրահատությունը կատարվում է զուտ վիրահատվողի ցանկությամբ, տևում է 30-40 րոպե, Կիրակոսյանը հրաժարվել է»,-ասաց դատախազը:

Այս պահին Կիրակոսյանը կալանավորված է, ինչպես նշեցինք, գտնվում է «Գորիս» ՔԿՀ-ում, դատաքննությունը դեռ սկսված չէ: