Ձեր վստահելի աղբյուրը

«Քարոզարշավի ամենասկզբից ասել ու ասում եմ նաև հիմա, քարոզարշավի վերջին օրը` ես չեմ եկել այստեղ ձայն խնդրելու համար, քանի որ եթե չլինեմ քաղաքականության մեջ, ապա կզբաղվեմ իմ գործերով, ավելի հանգիստ կլինեմ: Բայց իմ սիրտը ցավում է երկրի համար, ես ու իմ երեխաները այս երկրում ենք ապրելու ու ես ուզում եմ, որ հայ մարդը լավ ապրի»,- Շիրակի մարզի Ազատան գյուղում ընտրազանգվածի հետ հանդիպմանը հայտարարեց «Բարգավաճ Հայաստան» կուսակցության նախագահ Գագիկ Ծառուկյանը:

Ինչպես և անցած քարոզարշավային մեկ ամսվա ընթացքում այստեղ ևս ԲՀԿ առաջնորդը ամենից շատ կարևորեց ժողովրդի հավատը առ այն, որ ընտրություններին մասնակցելով ու քվեարկելով հնարավոր է փոփոխությունների հասնել երկրում և ամենևին էլ պետք չէ լսել նրանց, ովքեր պնդում են, թե ամեն բան որոշված է և ընտրողի քվեն ոչինչ էլ չի փոխելու: Դա, ըստ Գ.Ծառուկյանի, ասում են այն մարդիկ, որոնք պաշտոն ու փող այսօր ունեն ու վախենում են դա կորցնել, քանի որ ժողովրդի ակտիվությունը ընտրություններին բնական է փոփոխություն կբերի:

Ավելին` հիշատակեց Ալեքսանդր Մակեդոնացու օրինակը, ով խնդրել էր, որ իրեն հուղարկավորեն ձեռները պարզած վիճակում, որպեսզի ամենքը տեսնի, որ աշխարհի տիրակալը իր հետ ոչինչ չի տանում:

«Հայաստանում առկա խնդիրները մեզ քաջ հայտնի են` գործազրկություն, արտագաղթ: Բայց մի հավատացեք նրանց, ովքեր ասում են, թե վաղը աշխատատեղերի խնդիրը վերջնականապես կլուծվի: Այդպես չի, կլուծվի 5 կամ 3 տոկոսով, իսկ հետո, ընթացքում նաև մնացածը: Ինչ մնում է արտագաղթին, ապա մարդիկ փախենում են երկրից, որովհետև ապրուստի միջոց չունեն, չեն կարողանում պահել իրենց երեխաներին, օրվա գումար նորմալ չեն աշխատում: Երկիրը զարգացնելու, ծաղկացնելու համար անհրաժեշտ է, որ Հայաստանում չորս-հինգ միլիոն բնակչություն լինի, արդյունաբերություն- արտադրություն զարգանա, իսկ եթե արտագաղթ է ինչպե՞ս կզարգանա »,- իր խոսքում նշեց Գ.Ծառուկյանը:

Որպես տեսլական նա այնպիսի Հայաստանի համար է պայքարում, շարունակեց ԲՀԿ առաջնորդը, որում արտագաղթը այլևս չի լինի և փոխարենը հազարավոր հայորդիներ կվերադառնան հայրենիք:

ԲՀԿ նախընտրական ծրագրում կարևոր թիրախային ուղղություն է նաև հարկային օրենսդրության փոփոխությունը, որը շատ է խեղդում այսօր փոքր ու միջին բիզնեսը. «Հարկային այնպիսի պարտավորություններ պետք է լինեն, որ մարդը օրական ընդամենը 3-5 հազար դրամ աշխատելով ստիպված չլինի մտածել, թե ինչպե՞ս է միանգամից եռամսյակի հարկեր վճարելու: Ըստ այդմ էլ ստիպված չլինի պարտք վերցնելու ու տոկոսի տակ ընկնելու»,- մասնավորեցրեց ԲՀԿ առաջնորդը:

Թերևս հաշվի առնելով այն տարածաշրջանը, որտեղ Գ.Ծառուկյանը քարոզարշավի վերջին հանդիպումներն է անցկացնում, ազատանցիներին դիմելով նա ասաց. «Իմ թիմակիցներին կպնողը իմ հետ է գործ ունենալու»:

Նշենք, որ Ազատանում հանդիպման ժամանակ Գ.Ծառուկյանին ուղեկցում էր ոչ միայն ԱԺ ԲՀԿ-ական փոխխոսնակ Սամվել Բալասանյանը, ով ներկայացնում է Ազատանը ընդգրկող թիվ 35 ընտրատարածքը, այլև Գյումրին ընդգրկող մյուս ընտրատարածքից ընտրված ու դարձյալ առաջադրված ԲՀԿ-ական պատգամավոր Մարտուն Գրիգորյանը: Ինչպես հայտնի է, վերջինիս ու Գյումրու քաղաքապետ Վարդան Ղուկասյանի հարաբերությունները, մեղմ ասած, լարված են ու նման հայտարարությունը, այն էլ ընտրությունների նախօրեին ու հենց այդ տարածքում գուցե հստակ հասցեատեր ուներ:

Ինչ վերաբերում է Սամվել Բալասանյանին, ապա վերջինս մեծամասնականով այս ընտրատարածքում առաջադրված միակ թեկնածուն է ու երբ Գ.Ծառուկյանը նրան ներկայացնում էր ժողովրդին (թեև նա քաջ հայտնի է ազատանցիներին, որովհետև գործող պատգամավորն է), հավաքվածները բուռն ծափահարություններով ընդունեցին այդ ելույթը:
Գ.Ծառուկյանի հաջորդ կանգառը Ամասիայում և Աշոցքում է: