Ձեր վստահելի աղբյուրը

ՀՅԴ Գերագույն մարմինն այսօր տարածեց հայտարարություն,  որտեղ առկա ձևակերպումները թեև արտաքուստ հստակ, բայց միաժամանակ անհասկանալի են:

Հաշվի առնելով, որ Դաշնակցությունն իր ոճին հավատարիմ է և «կողմ ըլլալով՝ դեմ կըլլա», փորձեցինք հայտարարության բովանդակության վերաբերյալ լրացուցիչ մեկնաբանություններ ստանալ կուսակցության որևէ ներկայացուցչից:

Մասնավորապես, հայտարարության մեջ ասված է, որ «ՀՅ Դաշնակցությունը, որպես ինքնուրույն, հստակ սկզբունքներ դավանող քաղաքական ուժ, ընտրական արդյունքների առումով իր այս նահանջը սառնասրտորեն ձևակերպում է որպես գործունեության նոր փուլի սկիզբ` համընդհանուր պայքարի շարունակություն մինչև ամբողջական իշխանափոխություն»:

Այս ձևակերպումից պարզ չէ՝ արդյոք ՀՅԴ-ն ընդունո՞ւմ է ընտրությունների պաշտոնական արդյունքները, ստանձնո՞ւմ է այդ հարցում իր պատասխանատվությունը, թե առանց դրա, հենց այնպես նոր փուլ է հռչակում: Ի դեպ «նոր փուլի» էությունն էլ, իր հերթին, հստակ չէ. արդյոք ՀՅԴ-ն ընդունո՞ւմ է միասնական շտաբում իր գործընկեր ՀԱԿ-ի առաջարկը՝ «համընդհանուր պայքարը» շարունակել փողոցում, թե՞ «ամբողջական իշխանափոխության» այլ ճանապարհ է առաջարկում:

Ահա այս հարցերի վերաբերյալ փորձեցինք մեկնաբանություններ ստանալ, սակայն ՀՅԴ-ական Սպարտակ Սեյրանյանը հրաժարվեց որևէ մեկնաբանություն տալ. «Հայտարարությունն ինչ մեկնաբանեմ: Հայտարարությունն ինքնին արդեն կա»:

Մեր այն դիտարկմանը, որ բոլոր դեպքերում տարընթերցումների տեղիք տվող որոշ ձևակերպումներ կան և բովանդակությունը հստակ չէ, պարոն Սեյրանյանն արձագանքեց. «Հայտարարության բովանդակությունը կարդացեք: Այդ բովանդակությունից ավել, եթե ասելու բան լիներ, մեջը կլիներ: Որևէ նոր բան ավելացնելու, որևէ մեկնաբանելու բան մենք չունենք»:

Այն դիտարկմանը, որ որոշ պնդումներում լրացուցիչ բացատրության կարիք կա, նա արձագանքեց. «Ես մինչև հիմա բացատրության կարիքի տեղը չեմ գտել»:

Սպարտակ Սեյրանյանը վստահեցրեց, որ իրենց հայտարարությունը «տարընթերցումների տեղիք դեռևս ոչ մեկի մոտ չի տվել», ավելին՝ նա պնդեց, որ «հայտարարությունները չեն պարզաբանվում, եթե աշխարհում գտնեք, որ հայտարարություն անողը հետո սկսում է ասել՝ սա որ գրել ենք, նկատի ունենք սա, այ այս բառը նշանակում է սա, մտեք բառարանում տեսեք, որ այս բառի թարգամնության ճիշտը սա է…»:

Մի խոսքով՝ Սպարտակ Սեյրանյանը մեկնաբանության կարիք չտեսավ ու հորդորեց հասկանալ այնպես, ինչպես գրված է հայտարարության մեջ:

Իսկ հարցին, թե «համընդհանուր պայքար» և «ամբողջական իշխանափոխություն» հասակցությունների կիրառությունը, որոնք օգտագործվում են մեկ այլ քաղաքական ուժի կողմից, նշանակում է, որ ՀՅԴ-ն կգնա միասնական շտաբում գործընկեր այդ ուժի առաջարկած պայքարի ճանապարհով՝ Սպարտակ Սեյրանյանը պատասխանեց. «Յուրաքանչյուրն իր ուղին առաջարկում է՝ օգտվելով հայոց լեզվի բառապաշարից»:

Ցանկալի էր Սպարտակ Սեյրանյանից մեկնաբանություն ստանալ նաև հայտարարության այն գնահատականի վերաբերյալ, ըստ որի՝ «Կոալիցիայի անդամների անվան դիմաց գրանցվեցին բարձր արդյունքներ. նախ և առաջ ի հաշիվ պետական եւ վարչական լծակների ամբողջական օգտագործման ու ընտրակաշառքի վերածված աննախադեպ մեծ ֆինանսական միջոցների»։ Սակայն դա չհաջողվեց, քանզի պարոն Սեյրանյանն ակնհայտորեն տրամադրված չէր որևէ հարցի պատասխանելու: