Ձեր վստահելի աղբյուրը

«Օրինաց երկիր» կուսակցության համամասնական ցուցակի 10-րդ հորիզոնականը զբաղեցնող Դավիթ Կարապետյանը չի ցանկանում մեկնաբանել, թե ինչո՞ւ ՕԵԿ-ն ընտրություններում սպասվածից շատ քիչ ձայն ստացավ` 5,5 տոկոս (80 690 քվե):

«Դրա գնահատականը կամ դիրքորոշումը պետք է տա կուսակցության ղեկավարը, իսկ տվյալ դեպքում դուք հարցը կարող եք տալ կուսակցության ղեկավարի մամլո խոսնակին», -Panorama.am-ի թղթակցի հետ զրույցում ասաց Դավիթ Կարապետյանը:
Մյուս հարցին, թե նա անձնական կարծիք չունի՞ ընտրությունների արդյունքների վերաբերյալ, Կարապետյանը պատասխանեց. «Մենք եկեք վերջնահաշվարկից հետո խոսենք»:

Այս պահի դրությամբ «Օրինաց երկիր» կուսակցությունը խորհրդարանում ստացած ձայների նախնական արդյունքներով ունենում է 5 տեղ, իսկ դա նշանակում է, որ Դավիթ Կարապետյանը պատգամավոր չի լինի: Այս առնչությամբ, նա նկատեց. «Ամեն ինչ կախված է կառավարության կազմից ու նաև նրանից, թե «Օրինաց երկիր» կուսակցությունը գործադիր իշխանությունում որքան կամ ինչպիսի ներգրավվածություն կունենա»:

Այսինքն, ՕԵԿ-ում չեն բացառո՞ւմ, որ կոալիցիա կկազմեն խորհրդարանական մեծամասնության հետ, հարցին, Կարապետյանը պատասխանեց. «Դրանք քաղաքական քննարկումների արդյունքում պետք է որոշվեն ու ոչինչ չեմ բացառում, բայց տվյալ դեպքում որոշում կայացնողը կուսակցության ղեկավարն է այլ կուսակցությունների ղեկավարների հետ միասին»:

Իսկ ՕԵԿ-ի նորագիր անդամն ինչպե՞ս է վերաբերում այն փաստին, որ ինչպես հայտարարվում էր, 170 հազար անդամ ունեցող կուսակցության նույնիսկ կեսը չի քվեարկել «հարազատ» կուսակցության օգտին, Կարապետյանը պատասխանեց անորոշ. «Ընտրություններում քվեարկում են ոչ միայն կուսակցության անդամները, այլ նաև ոչ կուսակցականները և տվյալ դեպքում «Օրինաց երկիր»-ն ստացել է այնքան ձայն, ինչքան քվե ժողովուրդը տվել է»:

Դիտարկմանը, թե ՕԵԿ-ական գրեթե բոլոր ներկայացուցիչները մինչև ընտրությունները հայտարարում էին, թե ի տարբերություն նախորդ խորհրդարանի, այս ԱԺ-ում ունենալու են մեծ թվով պատգամավորներ, երիտասարդ ՕԵԿ-ականը արձագանքեց. «Յուրաքանչյուր կուսակցություն ակնկալում է առավելագույնը, իսկ թե ինչքան քվե է ստանում, որոշում է ժողովուրդը»:
Մյուս հարցին, թե ընտրությունների անցկացման ընթացքը գոհացրե՞լ է Դավիթ Կարապետյանին, խախտումներ ՕԵԿ-ը չի՞ արձանագրել, նա պատասխանեց. «Այս ընտրությունները մեկ քայլ առաջ էին նախորդ ընտրություններից»:

Դավիթ Կարապետյանը մինչև վերջերս Պաշտպանության նախարարի մամլո խոսնակն էր, և հեռանալով այդ պաշտոնից նա անդամագրվեց ՕԵԿ-ին ու անմիջապես ընդգրկվեց կուսակցության համամասնական ցուցակում:

Հիշեցնենք, որ «Օրինաց երկիր» կուսակցության մարտի 3-ին կայացած համագումարում Արթուր Բաղդասարյանը դիմելով դահլիճում ներկա իր կուսակիցներին, հայտարարել էր, որ խորհրդարանական ընտրություններին ընդառաջ իրենք շատ անելիքներ ունեն, մասնակցելու են ընտրություններին միայն հաղթելու նպատակով և մի տեսակ սպառնացել. «Իմ ձեռից չեք պրծնելու, եթե լավ չաշխատեք»: Այս առնչությամբ, ինչպես նաև ընտրության արդյունքների վերաբերյալ գնահատական կամ հետագա անելիքների մասին դիրքորոշում էինք ցանկանում լսել ՕԵԿ փոխնախագահ Հեղինե Բիշարյանից կամ ամենավերջում ՕԵԿ մամլո խոսնակ Հարություն Ամիրյանից, սակայն վերջիններս երեկվանից չէին պատասխանում մեր հեռախոսազանգերին:

«Իմ ձեռից չեք պրծնելու, եթե լավ չաշխատեք». ՕԵԿ նախագահը` ՕԵԿ անդամներին
Արթուր Բաղդասարյանը խորհրդարանում ծանրակշիռ ներկայացվածության հույս ունի