Ձեր վստահելի աղբյուրը

Քվեարկության արդյունքների մասին բոլոր տեղեկությունները հրապարակային են, տեղադրված են Կենտրոնական ընտրական հանձնաժողովի կայքէջում և ամբողջ հանրապետությունում առկա չէ որևէ մարզ, որտեղ ամրագրվել է 100 տոկոս մասնակցություն: Այդ մասին այսօր հայտարարեց Կենտրոնական ընտրական հանձնաժողովի նախագահ Տիգրան Մուկուչյանը` այդպիսով պատասխանելով Հայ Ազգային կոնգրեսի անդամ Արամ Մանուկյանի երեկվա հայտարարությանը:

Հիշեցնենք, որ Մանուկյանը երեկ Ազատության հրապարակում հանրահավաքի ժամանակ հայտարարել էր, որ ԿԸՀ-ն «խայտառակ թվեր» է ներկայացնում ընտրություններին մարդկանց մասնակցության մասին և նշել, որ «կան ընտրատարածքներ, որտեղ ավելի շատ մարդիկ են մասնակցել, քան կան ցուցակներում: Օրինակ, Վայքում մասնակցությունը եղել է 100 տոկոս, Արագածոտնում, ուշադրություն, 102 տոկոս մասնակցություն: Այստեղ գյուղերից մեկում ցուցակում կար 84 մարդ, բայց քվեարկել է 86-ը»:

Մուկուչյանի խոսքով, ԿԸՀ-ն ըստ ընտրատեղամասերի տվյալներն ստացել է Ընտրատարածքային ընտրական հանձնաժողովներից էլեկտրոնային եղանակով, և չի բացառվում, որ այդ ժամանակ սխալ մուտքագրված տվյալներ լինեն:

«Հենց դա է պատճառը, որ ընտրական օրենսգիրքը այդ գործառույթի անունը դրել է արդյունքների նախնական հրապարակում: Որովհետև նախնական հրապարակումից մինչև վերջնական հրապարակում կա ժամկետ, որի ընթացքում բոլոր փաստերն ու փաստաթղթերը ստուգվում են», - հավելեց Մուկուչյանը:

100 կամ 102 տոկոս մասնակցությամբ մարզեր չեն եղել, բայց եղել են ընտրատեղամասեր, օրինակ 10/34 ընտրատեղամասը, որը քրեակատարողական հիմնարկ է և որի ցուցակում եղել են 34 քաղաքացիներ: Ավելին, քվեարկության օրը մեկ մարդ ևս տեղափոխվել է ՔԿՀ, ինչի պատճառով էլ այդքան մասնակցություն է եղել, բայց քվեարկության մասնակիցների թիվը չի հասել 100-ի:

«Նշվում էր, որ տեղամասում մասնակիցների թիվը կազմում է 102 տոկոս, ստուգվել է արձանագրությունը և փաստվել, որ առկա է մուտքագրմամբ ամրագրված մեխանիկական սխալ: Երբ համադրում ենք թվային տվյալները, ստացվում է, որ սխալը մեխանիկական վրիպակի արդյունք է` եղել է 84 ընտրող ըստ ցուցակի, մասնակցել է 66 ընտրող, սակայն հրապարակվածում մեխանիկական սխալի արդյունքում նշվել է 86 թիվը», Մանուկյանի հայտարարությանը պատասխանեց ԿԸՀ նախագահը:

Ինչ վերաբերում է հանրահավաքում ՀՀՇ նախագահի հայտարարությանը Վայքի մասին, երբ Մանուկյանն ասել էր, որ այստեղ 100 տոկոս մասնակցություն է արձանագրվել, Մուկուչյանն ասաց, որ Վայքում կա գյուղական մեկ համայնք կա, որտեղ բնակվում են 80 ընտրողներ: «Նշված պարագայում բոլորն էլ մասնակցել են քվեարկությանը և այժմ տեղամասային ընտրական հանձնաժողովի ներկայացրած արձանագրությունը ընտրատարածքային հանձնաժողովի կողմից դարձվել է քննարկման առարկա, որով պետք է պարզվի, թե որքանով է այդ տեղեկությունը համապատասխանում իրականությանը», հայտարարեց Մուկուչյանը` շեշտելով, որ չկա որևէ մարզ, որտեղ ամրագրվել է 100 կամ դրանից ավելի մասնակցություն: