Ձեր վստահելի աղբյուրը

Իրանում տեղի ունեցած 9-րդ գումարման Մեջլիսի ընտրություններում նախագահ Մահմուդ Ահմադինեժադի թիմի կրած պարտությունից հետո Իրանի քաղաքական շրջանակներում ակտիվորեն քննարկվում է այն հարցը, թե 2013թ-ից հետո գործող նախագահ Մահմուդ Ահմադինեժադն ինչպիսի՞ քաղաքական ճակատագիր կունենա և ո՞վ կլինի նախագահի հավանական թեկնածուն:

Իրանական ԶԼՄ-ների հաղորդմամբ՝ վերջերս Ահմադինեժադի թիմակիցների կողմից անցկացված քաղաքական խորհրդակցության ընթացքում որոշում է կայացվել, որ Մահմուդ Ահմադինեժադը պաշտոնավարման ավարտից հետո կրկին զբաղեցնի Թեհրանի քաղաքապետի պաշտոնը: (Մինչև նախագահ ընտրվելը նա եղել է Թեհրանի քաղաքապետը):

Միևնույն ժամանակ, Ահմադինեժադի քաղաքական թիմում որոշում է կայացվել առաջիկա նախագահական ընտրություններում նախագահի թեկնածու առաջադրել կամ Իրանի փոխնախագահ, Զբոսաշրջության և մշակութային ժառանգության կազմակերպության նախագահ Սայիդ Հասան Մուսավի կամ քաղաքաշինության և ճանապարհների նախարար Ալի Նիքզադին:
Թե որքանով նախագահի թիմակիցներին կհաջողվի ի կատար ածել իրենց քաղաքական նպատակները և հաջողություն արձանագրել առաջիկա նախագահական ընտրություններում, առայժմ դժվար է կանխատեսել, քանի որ, նախագահի հավանական լուրջ թեկնածուներ՝ ի դեմս Մեջլիսի ներկա և նախկին նախագահներ Ալի Լարիջանիի և Հադդադ Ադելի, ամենայն հավանականությամբ կներկայացնի ԻԻՀ հոգևոր առաջնորդ Ալի Խամենեիին սատարող ուժերը, ովքեր Մեջլիսի ընտրություններում լուրջ հաջողություն արձանագրեցին:

Հաշվի առնելով այն փաստը, որ վերջին մեկ տարվա ընթացքում Մահմուդ Ահմադինեժադը ներքաղաքական որոշ հարցերի, ինչպես նաև կառավարության վարած ֆինանսատնտեսական քաղաքականության համար Մեջլիսի կողմից բազմիս ենթարկվել է խիստ քննադատության և վերոնշյալ հարցերի շուրջ պարզաբանումներ տալու համար հրավիրվել է Մեջլիս, Ահմադինեժադի թիմակիցներին առաջիկայում քաղաքական հեշտ պայքար չի սպասվում:

Մայիսի 4-ին Մեջլիսի ընտրությունների երկրորդ փուլի նախաշեմին Ահմադինեժադի թիմի վրա ճնշումներ գործադրելու նպատակով Մեջլիսը պատգամավորների 144 կողմ, 28 դեմ և 14 ձեռնպահ ձայներով հաստատեց նախագահի իմպիչմենտի և նրան հարցեր ուղղելու մասին բարեփոխված նախագիծը: Համաձայն այդ նախագծի` նախագահին հարցեր ուղղելու գործընթացը կարող է հանգեցնել վերջինիս իմպիչմենտին:

Մեջլիսի ընտրություններում Ահմադինեժադի և նրան սատարող ուժերի, մասնավորապես` Էսֆանդիար Ռահիմ Մաշայիի (նախագահի աշխատակազմի ղեկավարն է և Ահմադինեժադի խնամին) կրած պարտությունից հետո վերջիններիս ազդեցությունը գալիք նախագահական ընտրությունների նախաշեմին անհամեմատ կթուլանա, քանի որ բացի վերը նշված գործընթացներից վերջին մեկ տարվա ընթացքում նախագահի կողմնակիցները Մեջլիսի, պետական ազդեցիկ ատյաններում բարձր պաշտոններ զբաղեցնող հոգևորականների, ինչպես նաև այլ ուժերի կողմից պարբերաբար ենթարկվում էին տարատեսակ ճնշումների (ձերբակալություններ, պաշտոնանկություններ, տարբեր ոլորտներին առնչվող քննադատություններ և այլն):

Այսպիսով վերլուծելով Մահմուդ Ահմադինեժադի քաղաքական թիմի շուրջ ստեղծված իրադրությունը, կարել է եզրակացնել, որ 2013թ. Իրանում կայանալիք նախագահական ընտրություններում հաջողություն կարձանագրի հոգևոր առաջնորդի կողմից ներկայացված թեկնածուն՝ Մեջլիսի գործող նախագահ Ալի Լարիջանին: