Ձեր վստահելի աղբյուրը

«Տպագիր մամուլի մոնիտորինգ՝ խորհրդարանական ընտրությունների շրջանում» ծրագրի շրջանակներում կատարված ուսումնասիրությունը ցույց է տվել, որ հայաստանյան տպագիր մամուլը մեծ հետաքրքրություն է ցուցաբերել ընտրական գործընթացների նկատմամբ: Մամուլում արձանագրվել են անհավասարակշիռ, իրադարձությունների սուբյեկտիվ և ընտրանքային լուսաբանման դեպքեր: Այս մասին ասուլիսում ասաց Հասարակայնության հետ կապերի հայաստանյան ասոցիացիայի գործադիր տնօրեն Տաթևիկ Փիրումյանը:

Հիշեցնենք, որ Հասարակայնության հետ կապերի հայաստանյան ասոցիացիան ԵԱՀԿ երևանյան գրասենյակի կողմից իրականացվող և Եվրամիության կողմից ֆինանսավորվող «Աջակցություն Հայաստանում 2 ընտրական գործընթացներին» ծրագրի շրջանակներում իրականացրել է «Տպագիր մամուլի մոնիտորինգ՝ խորհրդարանական ընտրությունների շրջանում» ծրագիր. 2,5 ամիս դիտարկվել է հայաստանյան 16 թերթերի այն հրապարակումները, որոնք վերաբերում են ընտրական գործընթացներին: Մոնիտորինգը սկսվել է մարտի 12-ից, դիտարկվել են այն թերթերը, որոնք ունեն 3000 և ավելի տպաքանակ և հանրապետական սպառում («Իրատես դե ֆակտո», «Ազգ», «Իրավունք», «Հայոց աշխարհ», «Հայկական ժամանակ», «Երկիր», «Ժամանակ»,«Ժողովուրդ», «Չորրորդ ինքնիշխանություն», «Հրապարակ», «168 ժամ», «Առավոտ», «Հայացք», «Օրակարգ», «Голос Армении», «Новое Время»):

Հասարակայնության հետ կապերի հայաստանյան ասոցիացիայի փորձագետ Արմեն Մինասյանն ասաց, քարոզարշավի ընթացքում մամուլում ընտրություններին վերաբերող հրապարակումների տեսակարար կշիռը կազմել է 38,3 տոկոս:
Միաժամանակ նա նշեց, որ մամուլն ավելի շատ իրականացրել է քարոզչական, քան տեղեկատվական գործառույթ: Քաղաքական ուժերի և գործիչների օգտին կամ ի վնաս բացահայտ կամ քողարկված քարոզչություն պարունակող նյութերի ծավալը թերթերից շատերի մոտ գերազանցել է հրապարակումներից մեկ երկրորդում:

Ըստ Ա. Մինասյանի, բոլոր թերթերում մեծ տոկոս են կազմել բացասական շեշտադրումներով վերնագրերը, հրապարակումների հեղինակների կողմից շատ են եղել մեկնաբանությունները: Նա նշեց, որ մոնիտորինգի ընթացքում պարզ է դարձել, որ ընդհանրապես, մեծ ծավալ են կազմում բացասական բնույթի հիշատակումները. այն թերթերում, որոնք ընկալվում են որպես իշխանական լրատվամիջոցներ, հիմնական բացասական շեշտադրումներով անդրադարձել են ընդդիմադիր կուսակցություններին, և հակառակը, իսկ «Ժառանգության» կուսակցության վերաբերյալ երկուսի դեպքում էլ բացասական շեշտադրումները շատ են եղել:

Քանակական առումով դիտարկված ժամանակահատվածում տպագիր մամուլում ամենաշատ հիշատակվողը եղել է ՀՀԿ-ն, այնուհետև` ԲՀԿ, ՀԱԿ, «Ժառանգություն», ՕԵԿ, ՀՅԴ, մյուս երեք կուսակցություններին (ՀԿԿ, ՀԴԿ, «Միավորված հայեր») նկատելիորեն քիչ են անդրադարձել: Իսկ մայիսի 5-ին` լռության օրը, «Չորրորդ ինքնիշխանություն», «Ժողովուրդ» թերթերն խախտում են կատարել, այսինքն` իրականացրել են քարոզչություն, հակաքարոզչություն:

«Մոնիտորինգը ցույց է տալիս, որ տպագիր մամուլը նախընտրական շրջանում իրականացրել է ավելի շատ քարոզչություն, քան լրատվություն, իսկ ժամանակի ընթացքում գնահատական ու քարոզչություն պարունակող նյութերի տեսակարար կշիռը ավելացել է, նաև ավելացել է բացասական գնահատականներ ներառող և առանձին ուժերի դեմ հակաքարոզչություն իրականացնող նյութերի քանակը»,- ասաց Ա. Մինասյանը:

Նախորդող նորություններ` Մոնիթորինգ. Տպագիր մամուլը նախընտրական այս շրջանում ավելի շատ իրականացնում է քարոզչական, քան տեղեկատվական գործառույթ
Մարտի 12-ից դիտարկվում են այն թերթերը, որոնք ունեն 3000 և ավելի տպաքանակ և հանրապետական սպառում