Ձեր վստահելի աղբյուրը

«Այդ հայտարարությունը ծիծաղելից բացի այլ կերպ չեմ կարող համարել: Դա իրականության հետ կապ չունեցող, լղոզված, դիլետանտական հայտարարություն է: Ընտրությունների ողջ կամպանիան հօդս ցնդեցրեց միասնական շտաբի նախագծողների իրական ռեժիսուրան ու սցենարը»,- մեկնաբանելով միասնական շտաբի եզրափակիչ հայտարարությունը՝ Panorama.am-ի հետ զրույցում ասաց ԱԺ փոխնախագահ Էդուարդ Շարմազանովը:

Նրա խոսքերով, փաստն այն է, որ և՛ ԱՊՀ, և՛ միջազգային դիտորդները, և թե՛ ԱՄՆ պետքարուղարությունը բարձր են գնահատել անցկացված ընտրությունները՝ համարելով, որ դրանք ընթացել են արդար, ժողովրդավարական ու մրցակցային պայմաններում:

«Ավելին, կային դիտորդներ, ովքեր այս ընտրությունները համեմատում էին Կենտրոնական եվրոպայում անցկացվող ընտրությունների հետ: ԵԺԿ նախագահ պարոն Մարտենսը նախօրեին, իր ուղերձով շնորհավորելով ՀՀԿ-ին, ասաց, որ Հայաստանում անցկացվել են որակյալ ընտրություններ: Ինչ վերաբերվում է ընտրակաշառքի դեպքերին, դրանք զանգվածային բնույթ չեն կրել: Ես բոլորին խորհուրդ եմ տալիս խոսել բացառապես փաստերով, քանի որ հայտնի է, որ ոստիկանությունը ընտրակաշառք բաժանողներ է ձերբակալել, իսկ դրանց մեջ ՀՀԿ-ի համար կաշառք բաժանողներ չեն եղել: Միասնական շտաբի հայտարարությունն ավելի շատ նման է «Կարապի վերջին երգին»»,- ասաց Է. Շարմազանովը:

Հարցին, թե այդ դեպքում ինչո՞վ եք պայմանավորում նման հայտարարության հնչեցումը, վերջինս ասաց. «Իսկզբանե այդ միասնական շտաբի իրական նպատակը ոչ թե եղել է ընտրական գործընթացների նկատմամբ վերահսկողության սահմանումը, այլ շոուների կազմակերպումը, ինչպես նաև ընտրական գործընթացների վրա ստվեր գցելը: Սակայն, ի հեճուկս այդ շտաբի, ընտրական ողջ կամպանիայի ու բուն քվեարկության օրը և՛ լրատվամիջոցները, և՛ ոստիկանությունը, և թե՛ դատախազությունը շատ օպերատիվ ու թափանցիկ աշխատել են: Հիմա ես եմ ցանկանում հարց հնչեցնել. երբ նրանք խոսում եմ կրկնակի քվեարկությունների կամ այլ կեղծքիների մասին, ապա ինչպես է հնարավոր նման բան իրականացել, երբ ամեն ընտրատեղամասում նույն այդ ուժերը և՛ հանձնաժողովի անդամներ ու ղեկավարներ են ունեցել, և՛ վստահված անձինք, էլ չեմ ասում միջազգային և տեղական դիտորդական կազմակերպությունների մասին: Ո՞ւր են այն 1700 տեսախցիկները, որոնք այդ օրը նկարահանումներ էին իրականացրել, ինչու դրանք համատարած կեղծիքներ չեն ֆիքսել, այնպիսի կեղծիքներ, ինչի մասին խոսում են միասնական շտաբի ներկայացուցիչները: Թե՞ իրենք համարում են, որ իրենց վստահված անձինք կամ հանձաժողովի անդամները «մեխի գլուխ են եղել» ու ոչինչ չեն նկատել: Ինչի իրենց կողմից նշված այդ կեղծիքների մասին քվեարկության օրը ոստիկանությունում հաղորդում չեն տվել, ինչի ժամանակին դրա մասին չեն խոսել, որ այսօր նման լղոզված հայտարարություն են տարածում»: