Ձեր վստահելի աղբյուրը

Խորհրդարանական ընտրություններից հետո, որոշ հրապարակումների համաձայն, Հայ Ազգային կոնգրեսում տարաձայնություններ են սկսվել, և քաղաքական որոշ շրջանակներում հատկապես տարակուսանք է առաջացրել այն, որ Կոնգրեսում հայտարարում են, որ խորհրդարանական ընտրությունները լեգիտիմ չեն ու միաժամանակ չեն բոյկոտում ԱԺ աշխատանքները: Այս և այլ հարցերի շուրջ Panorama.am-ը զրույցել է ՀԱԿ անդամ Զոյա Թադևոսյանի հետ:

-Ի՞նչ իրավիճակ է այս պահին Հայ Ազգային կոնգրեսում:
-Ես անկեղծ եմ ասում, այս պահին որևէ տարաձայնության մասին տեղյակ չեմ և մասնակից էլ չեմ նման տարաձայնությունների, հետևաբար որևէ պարզաբանում տալ չեմ կարող:

-Դուք համաձա՞յն եք ՀԱԿ-ի կողմից վարվող այս քաղաքականության հետ` մի կողմից հայտարարվում է, որ ընտրությունները լեգիտիմ չեն, մյուս կողմից էլ չեն բոյկոտում խորհրդարանական աշխատանքները:
-Ամեն դեպքում, եթե Կոնգրեսում ներկայացված քաղաքական բոլոր ուժերի կարծիքը հաշվի առնվեր, հետո որոշում կայացվեր, ավելի ճիշտ ճանապարհը դա կլիներ: Առայժմ այդպիսի որոշում չի կայացվել և Կոնգրեսի հայտարարությունը եթե այդ ճանապարհով է ընթանում, որ լեգիտիմության պակաս կա, բայց պետք է վերցնել մանդատները, ես սա ուղղակի որպես քաղաքացի կարող եմ գնահատել այսպես` մասնակից լինել ոչ լեգիտիմ գործընթացների, որը պետք է ծավալվի Ազգային ժողովում: Բայց ես գտնում եմ նաև, որ կան լրիվ իրական հիմքեր այս ընտրությունները չեղյալ հայտարարելու համար, քանի որ Ընտրական օրենսգրքի 66-րդ հոդվածի 5-րդ կետը ոտնահարվել է: Այնտեղ նշվում էր, որ թանաքը, որը պետք է դրվեր ընտրողների անձնագրերում, պետք է անհետանար 12 ժամ հետո, բայց անհետացավ անմիջապես, ինչը նշանակում է, որ Կենտրոնական ընտրական հանձնաժողովը խախտել է օրենքը և այդ ճանապարհով հնարավորություն տվել ընտրակեղծարարներին, ուրիշների փոխարեն քվեարկողներին կրկնակի, բազմակի անգամ մասնակցել ընտրություններին և դրանով էլ ապահովել ընտրությունների բարձր մասնակցություն: Սա հիմք է տալիս ուղղակի չեղյալ համարելու այս ընտրությունները: Այո, ոչ լեգիտիմության խնդիրը այս ընտրությունների սկսվեց հենց առավոտյան, երբ թանաքը սկսեց անհետանալ:

-Դուք անձամբ, տիկին Թադևոսյան, ինչպե՞ս եք գնահատում Կոնգրեսի քայլը, ձեր հետագա համագործակցությունը Կոնգրեսի հետ տեսնո՞ւմ եք:
-Իհարկե, տեսնում եմ: Ես Կոնգրեսի անդամ եմ, «Ժողովրդի իշխանությունը» մնում է Կոնգրեսի կազմում և կմնա ցանկացած պարագայում: Որովհետև, եթե մենք հաղթանակի դափնիները կարող էինք կիսել, ապա ցանկացած տարաձայնություն ևս պետք է կիսենք:

-Այսինքն, այնուամենայնիվ, տարաձայնություններ կան:
-Չէ, ես այս պահին տարաձայնության մասին տեղեկացված չեմ, անկեղծ եմ ես ձեզ հետ: Ես չգիտեմ ինչ տարաձայնություն կա, մամուլում ինչ-որ տարբեր կարծիքներ կան: Ես չգիտեմ` որքանով են դրանք հիմնավորված, համենայնդեպս քաղաքական խորհուրդը նիստ չի հրավիրել և այդ կապակցությամբ ես ինֆորմացիա պաշտոնապես չունեմ: Իսկ ինչը պաշտոնապես չի հասել ինձ, պաշտոնական տեղեկություն չեմ ստացել, ես մնացածը համարում եմ ոչ ճիշտ տեղեկություն:

-Հանրահավաքում Փաշինյանը հայտարարեց, որ վերցնում են մանդատները և մասնակցելու են խորհրդարանական աշխատանքներին: Դա պաշտոնական հայտարարություն չէ՞
-Տեր-Պետրոսյանն ասաց, որ վայր է դնում մանդատը, իսկ Փաշինյանն ասաց, որ վերցնում է:

-Տիկին Թադևոսյան ես կուզեի բացատրեիք, թե որն է  լոգիկան, ըստ ձեզ՝  մի կողմից հայտարարել, որ ընտրությունները լեգիտիմ չեն, մյուս կողմից` մասնակցել խորհրդարանական աշխատանքներին:
-Գիտեք, այս պարագայում նրանք ցուցակի անդամներ են և իրավունք ունեն յուրաքանչյուրը իր կարծիքը հետագայում ԱԺ աշխատանքներին մասնակցության վերաբերյալ հայտնել: Դա անձի խնդիր է, որովհետև մենք հուրախություն ինձ համարում եմ մարդու իրավունքները հարգելու ճիշտ քայլ, երբ մեր ցուցակի անդամներից և ոչ մեկից չեն վերցրել հրաժարականի դիմում, ինչպես արվում է մնացած բոլոր կուսակցություններում: Հենց այդ խնդիրն էլ ինքնին ենթադրում է, որ յուրաքանչյուրն ազատ է նաև իր կամքն ազատ արտահայտելու հետագայում ԱԺ աշխատանքներին մասնակցության առումով: Գտնում եմ, որ յուրաքանչյուրն իրավունք ունի դա անելու, և ես կիսում եմ նրանց մոտեցումները, չեմ կարող ոչ դատապարտել և ոչ էլ այլ վերաբերմունք արտահայտել: Նորմալ եմ վերաբերվում:

-Նախընտրական քարոզարշավի ժամանակ ԲՀԿ-Կոնգրես ներքին համագործակցություն կար. Դուք ինչպե՞ս էիք վերաբերում դրան
-Ես գտնում եմ, որ մեր քարոզչությունը պետք է լիներ ագրեսիվ:

-Քաղտեխնոլոգներից մեկը կարծիք էր հնչեցրել, որ մայիսի 8-ի հանրահավաքում Լևոն Տեր-Պետրոսյանի ելույթը կարապի երգն էր, և հնարավոր է, որ նախագահական ընտրություններում նա չառաջադրի իր թեկնածությունը: Դուք ի՞նչ կարծիքի եք:
-Ես այդ կարծիքին չեմ: Տեր-Պետրոսյանն ունի այնքան ասելիք, որ որևէ մեկը նրա ասելիքների տասը տոկոսն էլ չի կարող ասել: Տեր-Պետրոսյանն ունի դեռ շատ գործեր և կարծում եմ, որ մենք կկարողանանք առաջին նախագահին համոզել, որպեսզի նա իր թեկնածությունը անպայման դնի: