Ձեր վստահելի աղբյուրը

Ստամբուլում նախորդ տարի անցկացված միասեռականների, լեսբուհիների, բիսեքսուալների, տրանսվիստիտների ու տրանսսեքսուալների` LGBTT միջոցառմանը մասնակցելը Ծոմակի վրա, ըստ երևույթին, թանկ է նստել. օրերս հրկիզել են նրա «D.I.Y.» կոչվող ակումբը: Հրկիզման կազմակերպման մեջ նա կասկածում է Հ. Յ. Դաշնակցությանը: Այս մասին այսօր ասուլիսում հայտարարեց ինքը` Ծոմակը:

Հիշեցնենք` ոստիկանությունը հաղորդագրություն էր տարածել այդ մասին և տեղեկացրել, որ Ղազար Փարպեցու փողոցի թիվ 14/11 հասցեում գտնվող «Դիայվայ» ակումբում պայթյուն է եղել:
Ձեռնարկված օպերատիվ միջոցառումների շնորհիվ պարզվել է, որ մայիսի 8-ին, ժամը 05.05-ի սահմաններոմ, եղբայրներ՝ 1992 թ. ծնված Արամե և 1993 թ. ծնված Համբիկ Մ.-երը, նախնական պայմանավորվածությամբ, գույքը դիտավորությամբ վնասելու նպատակով, կոտրել են «Մեյդ Հենդ Մեյդ» ՍՊԸ «Դիայվայ» ակումբի պատուհանի ապակին և նախապես իրենց հետ բերված բենզինով լի շիշը նետել են այնտեղ, որից հետո բաց կրակով հրկիզել են շինությունը:

Ծոմակը, որը նրա բեմական կեղծանունն է, Արմինե Օգանեզովան է, որը ղեկավարում է աղջիկների «PINCET» ռոք խումբը: Նա ստամբուլյան միջոցառումից հետո շատ է հետաքրքրել «Երկիր մեդիա» հեռուստաընկերությանը և ինչպես ինքն ասաց, այդ լրատվամիջոցին տված հարցազրույցը աղավաղել են: «Ինձ խաբեցին ու իմ բոլոր խոսքերը փոխեցին, ինձ հանեցին բացարձակ թշնամի: Միանշանակ վստահ եմ, որ այդ ինտերվյուից հետո են խնդիրներ առաջացել», -նկատեց նա:

Մեր հարցին, թե այս պայթյունը ակումբի ղեկավարը կապում է Դաշնակցության հե՞տ, Ծոմակը ի պատասխան հայտարարեց. «Միանշանակ, այս ամեն ինչը շատ լավ պլանավորված էր»:

Նա ասաց, որ Արամեն ու Համբիկը, ովքեր կասկածվում են, երեկ դատական նիստում ընդունված որոշմամբ ազատ են արձակվել` մեկը գրավի դիմաց, մյուսի համար որպես խափանման միջոց ընտրվել է ստորագրություն չհեռանալու մասին:

«Ամենահետաքրքիրն այն է, որ նրանց համար գրավի գումարը մուծել են դաշնակցական պատգամավորներ Արծվիկ Մինասյանն ու Հրայր Կարապետյանը», -հայտարարեց Ծոմակը: Նշենք, որ Արծվիկ Մինասյանը Panorama.am-ին չէր ժխտել և հաստատել էր, որ գրավն ինքն է մուծել:

Լրագրողները հետաքրքրվեցին, թե Ծոմակը փաստեր ունի՞, որ հաստատ պնդում է, նա պատասխանեց. «Մենք, այո, փաստեր ունենք և կներկայացնենք ոստիկանություն: Դա շատ պարզ, ֆաշիստական երիտասարդների մի խումբ ա, որը ես դեռ չգիտեմ` ով է ղեկավարում, բայց էն որ նրանք կան ու շատ ակտիվ գործունեություն են ծավալում իրենց 30-40 հոգանոց խմբավորման մեջ, դա փաստ է»:

Նրանք, ըստ Ծոմակի, այդպիսով պայքարում են միասեռականության դեմ ու ատում են իրեն:

«Բայց չեն հասկանում, որ մարդու լինելու խնդիրն է: Մարդու լինելու խնդիրն է, կապ չունի դու միասեռական ես, հետերոսեքսուալ ես, սա մարդու անձնական կյանքի մեջ մխրճվելու նման մի բան է: Մարդիկ կան, որ ինձ իսկապես ատում են», -հավելեց պայթեցված ակումբի ղեկավարը: Նրա խոսքով, իր ակումբը համասեռմոլների ակումբ չի եղել, և նախատեսված է եղել բոլոր մարդկանց համար:

Մի շարք հասարակական կազմակերպություններ և ակտիվիստներ հայտարարություն էին տարածել, որոնք D.I.Y. ակումբի պաշտպանությամբ էին հանդես եկել և դատապարտել էին կատարվածը: «Մենք դատապարտում ենք ֆանատիկ, ֆաշիստական և ապօրինի բռնի գործողությունները: Հիշեցնում ենք, որ ՀՀ Սահմանադրության 14.1. հոդվածի պահանջով «[...]Խտրականությունը, կախված սեռից, ռասայից, մաշկի գույնից, էթնիկական կամ սոցիալական ծագումից, գենետիկական հատկանիշներից, լեզվից, կրոնից, աշխարհայացքից, քաղաքական կամ այլ հայացքներից, ազգային փոքրամասնությանը պատկանելությունից, գույքային վիճակից, ծնունդից, հաշմանդամությունից, տարիքից կամ անձնական կամ սոցիալական բնույթի այլ հանգամանքներից, արգելվում է»: Իսկ ՀՀ Սահմանադրության 47 հոդվածի համաձայն «Յուրաքանչյուր ոք պարտավոր է պահպանել Սահմանադրությունը և օրենքները, հարգել այլոց իրավունքները, ազատությունները և արժանապատվությունը: Արգելվում է իրավունքների և ազատությունների օգտագործումը […] ազգային, ռասայական, կրոնական ատելություն բորբոքելու, բռնություն կամ պատերազմ քարոզելու նպատակով»», -ասված էր ՀԿ-ների հայտարարության մեջ:

Հանրային տեղեկատվություն և գիտելիքի կարիք ՀԿ ներկայացուցիչ Մարինե Մարգարյանը այսօր ասուլիսում հայտարարեց, որ միայն Ծոմակի ակումբը չէ, որ «ահաբեկչության զոհ» է դարձել: «Եղել են նաև ակումբներ, որտեղ աֆրոամերիկացիներ են հաճախել ու այդ ակումբների պատուհանների վրա ձվեր են նետվել ու տարբեր ակցիաներ են արվել: Ուղղակի Ծոմակն է, որ ոստիկանությանը հաղորդում է տվել, իսկ մյուսները լռել են», -փոխանցեց նա: