Ս. Դանիելյան. Անհրաժեշտ են պետական ինստիտուտների ձևավորման նոր եղանակներ

Քաղաքական 13:47 16/05/2012

Ս. Դանիելյան. Անհրաժեշտ են պետական ինստիտուտների ձևավորման նոր եղանակներ

«Այն խնդիրը, որը ձևակերպված էր իշխանությունների կողմից` ԱԺ ընտրություններից առաջ, որ այս ընտրությունները պետք է շրջադարձ հանդիսանան և մեր քաղաքական համակարգը պետք է էապես փոխվի, ըստ էության չլուծվեց»,- այսօր անդրադառնալով ԱԺ ընտրություններին, լրագրողների հետ հանդիպման ժամանակ ասաց քաղաքագետ Անդրեաս Ղուկասյանը:

Նա կարծիք հայտնեց, որ «մեր հասարակությունը գտնվում է վախի մթնոլորտի ազդեցության տակ և մարդիկ ազատ չեն ու իրենց քաղաքական կամքն ազատ չեն կարողանում դրսևորել»:

Բանախոսը նաև նշեց, որ քաղաքական դաշտում առկա է անորոշություն և համոզմունք հայտնեց, որ իշխանություններին չի հաջողվի «ազգային վստահության կառավարություն» ձևավորել:

Իսկ ասուլիսին ներկա «Համագործակցություն հանուն ժողովրդավարության» կենտրոնի նախագահ Ստեփան Դանիելյանն էլ ընտրական գործընթացների առնչությամբ ասաց, որ կուսակցական քաղաքական համակարգն իրեն սպառել է:

Նրա կարծիքով` ընտրական համակարգը խեղված է. «Խնդիրը ոչ միայն այն է, որ մարդկանց ընտրակաշառք էին տալիս, այլ նաև այն, որ մարդկանց ստիպում էին այդ ընտրակաշառքը վերցնել և մինչև վերջին մարդը վերահսկողության տակ էր»:

Ս. Դանիելյանն իր նշած խնդիրները վերացնելու համար հետևյալ ուղին մատնանշեց. «Մենք պետք է պետական ինստիտուտների ձևավորման նոր եղանակներ գտնենք և այդ եղանակներում առաջատար դերը պետք է կատարեն ոչ թե կուսակցությունները, այլ կատարի հասարակությունը»:

«2013 թ. նախագահական ընտրությունների ժամանակ հասարակությունը պետք է փորձի լինել ինքնակազմակերպված: Սա այն հիմնական մարտահրավերն է, որը մեր հասարակության առաջ դրված է»,- ասաց նա և հավելեց, որ ինքը զգում է, որ որոշ քաղաքական գործիչներ իշխանության կողմից արդեն գործուղվում են հասարակություն, որպեսզի նոր զարգացող քաղաքական շարժումները ղեկավարեն այն ուղղությամբ, որը ձեռնտու է իշխանություններին:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: