Ձեր վստահելի աղբյուրը

Ամեն տարի նույնն է. հենց մոտենում է ամառը, բոլորը հայացքներն ուղղում են դեպի տուրիստական գործակալություններ ու հանգստի համար նախընտրելի տարբերակ որոնում թե Հայաստանում, թե արտերկրում: Երբեմն, ինչպես պնդում են տուրօպերատորները, քաղաքացիները վերջնական կանգ են առնում արտերկրում հանգիստն անցկացնելու տարբերակի վրա, քանի որ այն, նախ, երբեմն գնային առումով այդքան էլ չի տարբերվում հայրենիքի հանգստյան տների առաջարկներից, իսկ բացի այդ էլ` ի վերջո արտասահման է:

Հայաստանյան ուղղությունները հիմնականում գերադասում են միջին տարիքի անձինք կամ փոքր տարիքի մեկ-երկու երեխա ունեցող ընտանիքները: Այս մասին Panorama.am-ի հետ զրույցում ասաց երևանյան տուրիստական գործակալություններից մեկի տնօրեն Լուսինեն: Ընդ որում նրանք, ովքեր հանգիստն անցկացնում են Հայաստանում սովորաբար ոչ պակաս գումար են ծախսում, քան եթե որոշեին ընտանիքով մեկնել արտերկիր, քանի որ, նշեց մեր զրուցակիցը` «Հայաստանի որ ծայրամասում էլ հանգստի մեկնած լինես, միշտ կգտնվեն ընկերներ ու ազգականներ, որոնք ցանկություն կհայտնեն ձեզ հետ մի քանի օր անցկացնել, գալ ձեզ այցի, ինչն իր հետ խնջույքներ կազմակերպելու անհրաժեշտություն է առաջ քաշում` պատիվ տալ, իսկ սա արդեն հավելյալ գումար է»:

Լուսինեի խոսքով, այս պահին արդեն կարելի է ուրվագծել, թե այս ամառ ո՞ր ուղղություններն են ամենից մեծ պահանջարկ վայելելու, քանի որ քաղաքացիները սկսել են ոչ միայն հետաքրքրվել, այլև նախապես պատվիրել ու գնել ուղեգրեր: Այսպես, Հայաստանում առաջատարները շարունակում են մնալ Ջերմուկն ու Դիլիջանը և սա չնայած այն բանի, որ գները շարունակ աճում են և նվազման միտում չի նկատվում:

Օրինակ, ցածր զբաղվածության շրջանում ( այս շրջանը սկսվում է ամանորի տոներից հետո ու ընդգրկում է մինչ օգոստոս ընկած ժամանակահատվածը) Ջերմուկի հյուրանոցներում գիշերավարձը մեկ անձի համար 3-անգամյա սնունդով սկսվում է 18 հազարից, իսկ սեզոնին` 25-30 հազար դրամից: Եթե նախապատվությունը տրվի առողջարաններին, ապա այստեղ գումարը, հասկանալի է, ավելի բարձր է` 25-35 հազար դրամ ոչ սեզոնին, իսկ սեզոնին` 30-45 հազար դրամ: Բնական է, որ գները տատանվում են թե առաջարկվող ծառայությունների, և թե առողջարանային պայմաններից ելնելով, իսկ բացի զուտ գիշերելուց ու սնվելուց նմանատիպ վայրերը այլ, հավելյալ վճարով ծառայություններ ևս մատուցում են: Հասկանալի է նաև, որ երկու հոգով նմանատիպ վայրում ընդամենը մեկօրյա հանգիստը ընտանեկան բյուջեի վրա կնստի շուրջ 100 հազար դրամ կամ` 200-250 ԱՄՆ դոլար (հետևաբար 10 օրը` 2000-2500 ԱՄՆ դոլար):

Ինչ վերաբերում է արտասահմանյան հանգստին, ապա հայաստանցիները ավելի շատ գերադասում են մեկնել ծովափնյա հանգստի ու վայելել ոսկեգույն ավազն ու արևի ջերմությունը, քան զբոսնել եվրոպական թանգարաններով… թեև Եվրոպայի պատմամշակութային ուղղությունները միշտ էլ եղել են պահանջված:

Panorama.am-ի հարցախույզի արդյունքում պարզեցինք, որ այս պահի դրությամբ հիմնական պահանջարկը «վայելում են» Անթալիայի ու Դուբայի ուղղությունները: Ինչ վերաբերում է վերջինիս, ապա հատկապես ամռան ամիսներին այս ուղղությունը մատչելի է զուտ այն պատճառով, որ այդ ամիսներին հանգստավայրում շատ շոգ եղանակ է ու դրա հաշվին գինն էլ նվազում է: Սակայն, պատմեցին տուրօպերատորները, մեր քաղաքացիների ցանկությունների վրա դա որևէ կերպ չի անդրադառնում.
«Երբ մենք զգուշացնում ենք, որ ամռան ամիսներին, հատկապես օգոստոսին այս ուղղությունը սովորաբար հետին պլան է մղվում եղանակի պատճառով, նրանք հակադարձում են` ամենուրեք օդափոխիչ համակարգ է դրված, չենք նեղվի: Ու ուղեգրերը սպառվում են հենց այդ սկզբունքով: Բացի այս` Դուբայը նաև շոփինգի համար իդեալական հանգստավայր է»,- նշեց Լուսինեն:

Ի դեպ, հանգստանալ ցանկացողների համար բավականին հետաքրքիր ու համեմատաբար նորաձև ուղղություն է համարվում էքզոտիկ Թաիլանդը, որը նաև մատչելի է` միջինը 1800 ԱՄՆ դոլար 10-14 օրվա հանգիստ մեկ անձի համար: Նորություն է նաև Շրի Լանկան: Ինչ վերաբերում է Թունիսին, ապա այս աֆրիկյան տուրիստական ուղղությունը ևս նմանատիպ գնով է առաջարկում հանգիստ` 1800-2500 ԱՄՆ դոլար մեկ անձի համար, սակայն ի տարբերություն այլ ուղղությունների սրա առավելությունն այն է, որ ինչպես և աֆրիկյան այլ ուղղություններում, այստեղ ևս գործում է «ALL INCLUSIVE» տարբերակը:

Իսկ ահա դեպի հին ու բարի Եվրոպա հայաստանցի զբոսաշրջիկներին գրավելու համար տուրիստական որոշ գործակալություններ դիմում են տարատեսակ հնարքների ու նույն փաթեթով առաջարկում և’ զբոսնել եվրոպական մայրաքաղաքների թանգարաններում կամ էլ նեղլիկ փողոցներում ուղղակի գարեջուր խմել, և վայելել ծովափնյա հանգիստը: Իհարկե, այս դեպքում գները ամենքին չէ, որ մատչելի են, բայց ինչպես նշեցին տուրիստական գործակալության ներկայացուցիչները` պահանջարկի պակաս չի նկատվում:

Այդօրինակ ուղղություններից մեկը դեպի Պորտուգալիա է, բայց մինչ Լիսաբոն հասնելը ձեզ կառաջարկվի մեկ օր մնալ Չեխիայի մայրաքաղաք Պրահայում, էքսկուրսիայի կտանեն, թանգարան էլ, այնուհետ կմեկնեք Լիսաբոն, որտեղ կանցկացնեք 4 օր և դարձյալ` էքսկուրսիաներ, լիսաբոնյան հմայիչ երեկոներ և այլն և դրանից հետո միայն 10 գիշեր կանցկացնեք Ալղարվե կոչվող ծովափնյա հանգստավայրում` բնության գողտրիկ անկյունում: Այս հրաշք փաթեթը երկու անձի համար կարժենա միջինը 4000 եվրո, սակայն ի տարբերություն աֆրիկյան կամ թուրքական հանգստավայրերի` հավելյալ գումար էլ կպահանջվի սննդի համար, քանզի փաթեթը սնունդը իր մեջ չի ներառում:

Մեկ հարց ևս էինք առաջ քաշում մեր հարցախույզի ժամանակ` բանկերը մի քանի տարի է իրենց հաճախորդներին առաջարկում են հանգստի մեկնել ապառիկ տարբերակով` վճարելով ուղեգրի գումարը մաս-մաս ամիսների ընթացքում: Ըստ այդմ էլ հետաքրքրվեցինք, թե որքանո՞վ են մեր հայրենակիցները գերադասում հանգստի մեկնելու համար էլ, այսպես ասած, գործ բռնել բանկերի հետ ու մտնել տոկոսադրույքի տակ: Սակայն մի քանի տուրիստական գործակալությունների ներկայացուցիչների հետ զրուցելուց հասկացանք, որ գոնե այդ մի քանիսում նման ճանապարհով ուղեգիր դեռևս որևէ քաղաքացի ձեռք չի բերել: