Ձեր վստահելի աղբյուրը

Մամուլի հրապարակած տեղեկությունների համաձայն` Քաղաքագետների միության նախագահ, ԲՀԿ համամասնական ցուցակի 9-րդ հորիզոնականում ներկայացված Հմայակ Հովհաննիսյանի գլխին սև ամպեր են կուտակվել, ինչը սպառնում է նրան ի վերջո մնալ առանց պատգամավորական մանդատի: Պատճառը իբր նա է, որ Հ.Հովհաննիսյանը ԲՀԿ-ականների շրջանում հայտարարել է` «Ծառուկյանն Աստված չէ, որ ինձ ստիպի հրաժարվել մանդատից», ինչը, բնական է, դուր չի եկել Գագիկ Ծառուկյանին:
Արդյոք եղել է նման հայտարարություն ու արդյոք Հմայակ Հովհաննիսյանը կմնա առանց մանդատի միայնակ իր գաղափարների հետ` Panorama.am-ի հարցազրույցը ՔԳՄ նախագահի հետ:

-Պարոն Հովհաննիսյան, իսկապե՞ս նման բան կա, Գագիկ Ծառուկյանն իսկապե՞ս չի ցանկանում Ձեզ տեսնել ԱԺ ԲՀԿ խմբակցությունում:
-Հասկանալի է, որովհետև անձերը ստորադասվում են խնդիրներին ու նպատակներին…

-Այսինքն դա այդպես է:
-Ի՞նչ է նշանակում չի ուզում տեսնել… եթե նա ինձ հրավիրել է մասնակցել նախընտրական պայքարին ու այդ մասնակցությունը եղել է բավականին ակտիվ հրապարակային, ապա ի՞նչ պատճառաբանություններ կարող են լինել: Միայն մեկ բան. խնդիրները և նպատակները վերանայվում են, ուստև պետք է վերանայվի նաև իմ մասնակցության ձևաչափը: Նորից եմ ասում` ես իմ մասնակցությունը ստորադասում եմ այն նպատակների իրականացմանը, որոնք իմ գաղափարների հիմքում են: Եթե ես դրանք ընդունում և կիսում եմ, ապա իմ մասնակցությունը կարող է լինել արդյունավետ, ինչի մասին վկայում է իմ խորհրդարանական անցյալը: Իսկ եթե չեմ կիսում, ապա լինելով գաղափարի մարդ…

-Այլ կերպ ասած, եթե «Բարգավաճ Հայաստանը» Հանրապետական կուսակցության հետ միասին կոալիցիա կազմի, ապա Դուք կհրաժարվե՞ք մանդատից:
-Հարցը կոալիցիան չի: Ընթանում են բանակցություններ և այդ բանակցությունների ընթացքում ցանկալի է, որպեսզի լինի միասնական պատկերացում այս բանակցություններից ակնկալվող արդյունքների վերաբերյալ: Եվ այդ մոտեցման շրջանակում պետք է նայել, թե ինչ տեսակետներ ունեն ԲՀԿ-ական թիմակիցները: Դրանց շրջանակում ես հետևում եմ զարգացումներին և մինչև մայիսի 24-ը, եթե նման հարց լինի` ես հայտարարությամբ հանդես կգամ:

-Ձեր այս տեսակետը, գաղափարները ԲՀԿ-ական թիմակիցներից որևէ մեկը կիսո՞ւմ է, տեղյա՞կ եք:
-Ես ինքս կուսակցության անդամ չեմ և դրա համար այդպես չեմ կարող ասել, թե ի՞նչ կարծիքներ կան ԲՀԿ-ի ներսում… դա ավելի լավ գիտեն կուսակցության ղեկավար մարմնի անդամները: Համենայնդեպս ես գաղափարական, քաղաքական հենքի համագործակցության ջատագով եմ եղել իմ գործունեության ողջ ընթացքում:

-Պարոն Հովհաննիսյան, Դուք հայտարարել ե՞ք, թե` Ծառուկյանն Աստված չէ, որ ինձ ստիպի հրաժարվել մանդատից:
-… Իսկ ո՞ր քաղաքական գործիչը կարող է հավակնել Աստծո կարգավիճակին: Եթե նույնիսկ արել եմ, ապա մահկանացուները…

-Խնդրում եմ պատասխանեք` այո կամ ոչ:
-Չեմ կարծում, որ այդ արտահայտությունը կարող է պատճառ դառնալ նման քայլի համար…. Ավելի ծանրակշիռ պատճառներ են միշտ ընկած նման որոշումների հիմքում, որոնք ենթադրում են թիմի կազմի մեջ կատարվող փոփոխությունները:

-Այսինքն Դուք նման հայտարարություն իսկապես արել եք, բայց Գ.Ծառուկյանը դրա պատճառով չէ, որ նման որոշում կարող է կայացնել: Այդպե՞ս:
-Հնարավոր է և արել եմ, որովհետև իսկապես ես գտնում եմ, որ միայն Աստծո քայլերն են, որ անմեկնելի են, իսկ մահկանացուները պետք է կանխատեսելի քայլեր կատարեն:

-Երբ Դուք համաձայնեցիք ընտրապայքարի գնալ ԲՀԿ-ի համամասնական ցուցակում, Ձեր հիմնական նպատակը գաղափարն էր, որի համար պատրաստ եք զոհել խորհրդարանում լինելը, թե մանդատ ստանալը ու այդպիսով ԱԺ ամբիոնին վերադառնալը:
-Գիտեք ինչ…. Իմ խորհրդարանական գործունեությունը պահանջված է հասարակության կողմից, ես դա տեսնում եմ ամեն քայլափոխի և այն բանից հետո, երբ 2010թ-ին ես իմ թեկնածությունը հանեցի, հաշվի առնելով, որ Նիկոլ Փաշինյանը գտնվում է նեղության մեջ նրա օգտին, այդ ժամանակ ես տեսա, թե որքան մեծ է մարդկանց ձգտումը տեսնել ինձ խորհրդարանում: Եվ ուղղակի պարտավոր էի այդ ձգտմանը գնալ ընդառաջ: Եվ իհարկե, եթե ունենայի համապատասխան ֆինանսական հնարավորություններ, ապա կառաջադրվեի մեծամասնական ընտրակարգով` դա ավելի արդյունավետ է քաղաքագետի գործունեության համար: Սակայն ես այդ հնարավորությունները չեմ ունեցել…

-Իսկ պարոն Ծառուկյանը չէ՞ր կարող օգնել, դիմե՞լ եք նրան այդ աջակցությունը ստանալու համար:
-Պարոն Ծառուկյանն ինձ հրավիրել է մասնակցել ցուցակով և հրավերը բավականին պատճառաբանված հիմնավորել է: Ես իմ լուման եմ ներդրել այն ծանրակշիռ արդյունքում, որն արձանագրել է ԲՀԿ-ն ընտրություններում:
Ես ընտրվել եմ պատգամավոր և այսօր էթիկայի նորմերին հարիր չի լինի, եթե գնահատականներ տամ, թե ինչպե՞ս է ստացվում, որ մարդիկ նայում են ցուցակին, ընտրում են ցուցակն ըստ անձերի կազմի, բայց հայտնվում են Ազգային Ժողովում լրիվ այլ անձինք: Դա իմ կողմից էթիկայի կանոնների խախտում կլիներ, եթե այդ հարցն այդ համատեքստում քննարկեի…

-Բայց փաստորեն նման նկատառում ունեք, որը նաև Ձեզ մտահոգում է, սակայն էթիկային տուրք տալով դա չե՞ք բարձրաձայնում:
-Ես միակը չեմ, որ ինքնաբացարկ… ըը…

-Ներկայացրե՞լ:
-Ըը… գուցե ներկայացնի:

-Ճի՞շտ է, որ ինքնաբացարկի դիմումները գրվել են, այդ թվում և Ձեր կողմից, նախքան ընտրությունները և ցանկության դեպքում դրա տակ պետք է միայն ժամկետն ավելացնել:
-Ոչ-ոչ, այդպիսի բան չկա:

-Բայց հիմա ինքնաբացարկի դիմում արդեն գրե՞լ եք:
-… ես կհայտարարեմ այդ մասին… մինչև մայիսի 24 –ը օրենքով ես այդ հնարավորությունն ունեմ:

-Պարոն Հովհաննիսյան, դատելով Ձեր գաղափարներից այդուհանդերձ կգնաք ինքնաբացարկի, քանի որ շատ հավանական է, որ կոալիցիան իրականություն դառնա:
-Եթե տեսնեմ, որ այդ քայլը պատճառաբանված է և չի դիտվի հասարակության կողմից իբրև դասալքություն, քանի որ ես դասալիք չեմ, ես կգնամ ինքնաբացարկի: Ընտրողների քվեն, որ տվել են ինձ, հարգում եմ, բայց եթե ծանրակշիռ հանգամանքները ինձ ստիպեն, ապա ես մանդատից կհրաժարվեմ… ես մանդատից կառչած չեմ, այսինքն ոչ թե մանդատից, այլ դեպուտատական կարգավիճակից:

-Ե՞րբ եք անձամբ հանդիպել պարոն Ծառուկյանին:
-Մի քանի օր առաջ:

-Այն, ինչ նոր ինձ ասացիք, այդ բոլորը նրան ներկայացրե՞լ եք, ինքը տեղյա՞կ է Ձեր մոտեցումներին:
-Ոչ… իմ մոտեցումներն եմ շարադրել, իմ ընկալումները: Ես առաջարկել եմ դրանք հաշվի առնել և կշռադատել, թե որքանով են դրանք համահունչ այն նպատակներին ու խնդիրներին, որոնք ինքը դնում է կուսակցության քաղաքական թիմի առջև:
Ասեմ, որ բանակցային այն գործընթացը, որ գնում է ՀՀԿ-ԲՀԿ միջև, դրա արդյունավետությունը ես իմ մոտեցումներով կամ գաղափարներով չէի ցանկանա կաղապարել, որովհետև դա նրբանկատ չէր լինի իմ կողմից: Եվ միաժամանակ ես ինքս, որպես քաղաքագետ, չեմ կարող մտնել այդ բանակցությունների արդյունքների համար պատասխանատվության դաշտ, որովհետև դրանք տարվում են միջկուսակցական հարթության վրա, իսկ ես կուսակցական չեմ: