Ձեր վստահելի աղբյուրը

Կրթական համակարգում տեղի են ունեցել բազմաթիվ բարեփոխումներ, սակայն բովանդակային առումով դրանք դեռևս այնքան էլ բարեհաջող չեն ընթանում: Այս մասին այսօր լրագրողների հետ հանդիպման ժամանակ ասաց «Եվրասիա» համալսարանի ռեկտոր, գիտությունների դոկտոր, պրոֆեսոր Սուրեն Օհանյանը: Նրա խոսքերով` առաջիկա 3 տարում Հայաստանը ստանձնել է Բոլոնիայի քարտուղարությունը, դա նշանակում է, որ հանրապետության բոլոր բուհերը պետք է ապահովված լինեն որակական չափանիշներով:

Անդրադառնալով պետական և ոչ պետական բուհերի համար ստեղծված հավասար պայմաններով մրցակցային դաշտին, որը հնարավորություն է տալիս հավասար պայմաններ ստեղծել բոլոր դիմորդների և ուսանողների համար, Ս.Օհանյանը նշեց, որ այս հարցում կառավարությունը շտապողականություն ցուցաբերեց: Նշենք, որ այս տարվանից սկսած դիմորդին հնարավորություն կտրվի հավասար պայմաններով մասնակցել պետական և ոչ պետական բուհերի հավատարմագրված կրթական ծրագրերի ընդունելության մրցույթին: Դա նշանակում է, որ միասնական քննության արդյունքները անցողիկ կլինեն նաև ոչ պետական բուհերում:

«Մենք պահանջում էինք, որ գոնե չորս-հինգ տարի հավասար դաշտում աշխատեինք, հետո նոր միացյալ կրթական համակարգի անցնեինք»,- ասաց Ս.Օհանյանը: Ըստ նրա` համակարգին անցնելուց հետո այս տարի ոչ պետական բուհերում ավելի քիչ դիմորդներ կլինեն, սակայն նա հույս հայտնեց, որ հաջորդ տարի դիմորդների թիվը կավելանա:

Նա նշեց նաև, որ ՀՀ-ում այսօր կան 8-12 ոչ պետական բարձրագույն ուսումնական հաստատություններ, որոնք կարող են մրցակցություն ապահովել: Ըստ Ս.Օհանյանի`«Եվրասիա» համալսարան այսօր պահին դիմել է 11 դիմորդ, սակայն ռեկտորը ակնկալում է, որ երկրորդ փուլում դիմորդների թիվը կավելանան: «Եթե ոչ պետական բարձրագույն ուսումնական հաստատությունները մնան առանց դիմորդների, ապա քաղաքական իմաստով մեր երկրի համար դա այնքան էլ ձեռնատու չի լինի: Կարծում եմ, որ կառավարությունն ամեն ինչ կանի, որպեսզի ոչ պետական ուսումնական հաստատությունները դիմորդներ ունենան»,- ասաց Ս.Օհանյանը: