Ձեր վստահելի աղբյուրը

Երևանյան մանկապարտեզներում հաճախ ինքնակոչ կամ էլ ինչ-ինչ պայմանավորվածությունների արդյունքում հայտնվող լուսանկարիչներից բողոքում են թե պետական, թե մասնավոր մանակապարտեզների սաների ծնողները:

Արաբկիր վարչական շրջանի մանկապարտեզներից մեկի ծնողը դիմել է խմագրությանը.

«Հարգելի խմբագրություն, քանի որ նկատել եմ, որ դուք անուշադրության չեք մատնում մատաղ սերնդին առնչվող խնդիրները որոշեցի դիմել: Երեխաս հաճախում է մանկապարտեզ; Երկու օր առաջ առանց ծնողներին զգուշացնելու ինչ-որ լուսանկարիչներ իրենց տիկնիկային հադերձանքներով եկել և մանկապարտեզում լուսանկարել են երեխաներին: Երեխային վերցնելիս նոր միայն դատիարակը ծնողին տեղյակ է պահում այդ մասին ու նաև նշում, որ հաջորդ օրը նկարիչները կբերեն լուսանկարների նմուշները հատը՝ 2000 դրամ: Ու եթե ծնողը հավանեց կարող է գնել, նաև եթե 5 նկար ուզի կարող է վճարել 5.000 դրամ: Ուզում եմ Ձեր միջոցով պարզել, ինչու են ծնողներին դնում անհարմար դրության մեջ, եթե մոտ մեկ ամսից երեխաները լուսանկարվելու են խմբով և անհատական յուրաքանչյուր լուսանկարը 500 դրամ»:

Ծնողին բացի գումարից մտահոգում է նաև այն, թե մինչ իր երեխայի հագնելը, ովքեր են հագել այդ հանդերձները, ինչ պայմաններում են դրանք պահվում և այլն:
«Բացի այդ նաև ցանկալի է ճշտել անվճար դառնալուց հետո արդյոք օրինակա՞ն է ծնողներից պահանջել տնտեսական ապրանքներ»,-հարցնում է ծնողը:

Նոր Նորքի 4-րդ զանգվածում գործող մասնավոր, հետևաբար վճարովի մանկապարտեզներից մեկի ծնողը ևս օրեր առաջ դիմել էր խմբագրությանը նույն հարցով: Առանց նախապես տեղեկացնելու ծնողին երեխայի ինչ-որ հերոսների շորեր են հագցրել, նկարել, ապա ամենավերջում ծնողին տեղյակ պահել լուսանկարը տրամադրելու գնային պայմանների մասին:

Եվս մի դեպքի մասին պատմեց Մալաթիա-Սեբաստիա վարչական շրջանում գործող մանկապարտեզներից մեկի ծնողը, երբ առանց տեղեկացնելու ծնողին ու առանց հարցնելու նրա կամքն ու ցանկությունը, լուսանկարում են երեխային, նրա նկարով օրացույց պատրաստում` կախված դրա չափերից ծնողից պահանջում են վճարել 1000-1500 դրամ:

Ծնողներից մեկն էլ պատմեց, որ երեխայի նկարները` յուրաքանչյուրը 500 դրամ, առաջարկվել է գնել, թեև ոչ պարտադիր, այլ սեփական ցանկությամբ, բայց. «Երբ արդեն պատրաստ, թղթի վրա տպված նկարը առաջարկում են և պատկերացնում ես, որ մերժելուց հետո պատռելու են, ստիպված ես լինում այն գնել, մերժել` հոգեբանորեն ոչ մի ծնող պատրաստ չէ»,-ասաց մեր զրուցակիցը:

Խնդրի վերաբերյալ Panorama.am-ը կներկայացնի նաև քաղաքապետարանի ներկայացուցիչների պարզաբանումը: