Ձեր վստահելի աղբյուրը

Երևանյան «D.I.Y.» ակումբի հրկիզման համար մեղադրվող Արամեհ և Համբիկ Խաբազյանների ազատ արձակման դիմաց գրավը մուծել են ոչ թե դաշնակցական պատգամավորներ` Արծվիկ Մինասյանն ու Հրայր Կարապետյանը, այլ տղաների ծնողները: Այդ մասին Panorama.am-ի թղթակցի հետ զրույցում տեղեկացրեց տղաների փաստաբան Մելանյա Առուստամյանը:

«Գրավի գումարը պատգամավորներ Արծվիկ Մինասյանը և Հրայր Կարապետյանը չեն մուծել, նրանք հանդես են եկել անձնական երաշխավորությամբ, սակայն նախաքննական մարմինը մերժել է այն: Գրավը մուծվել է տղաների ծնողների կողմից: Այդ փաստը հաստատվում է անդորրագրով, որը գտնվում է քրեական գործում», -փոխանցեց տիկին Առուստամյանը:

Նրա համար տարօրինակ է` ինչպես է ակումբի սեփականատեր Արմինե Օգանեզովան` Ծոմակը, փակ դատավարության ընթացքում հնչած հայտարարությունները հրապարակում մամուլի ասուլիսում: Նշենք, որ հենց Ծոմակն էր ասուլիսում հայտարարել, որ Մելանյա Առուստամյանը, ասել է, որ Արամեհ Խաբազյանի գրավի գումարը մուծել են ԱԺ պատգամավորներ Արծվիկ Մինասյանը և Հրայր Կարապետյանը:

«Դատարանում կատարած իմ հայտարարությունը ձայնագրվել է և նախաքննության ավարտից հետո, վստահաբար կարող եմ ձայնագրությունը ներկայացնել հանրությանը: Վստահ եմ, որ Ծոմակը լսել և ընկալել է իմ հայտարարությունը այնպես, ինչպես ես եմ հայտարարել: Սակայն մամուլին ներկայացրել է իրեն ձեռնտու տարբերակով», -նշեց փաստաբանը:

Ավելի վաղ Panorama.am-ի հետ զրույցում դաշնակցական Արծվիկ Մինասյանը հաստատել էր, որ գրավն ինքն է մուծել և ասել, որ ինքը երաշխավորություն է տվել, որ այդ երիտասարդները չեն խուսափի ու կմասնակցեն բոլոր իրավական գործընթացներին: Մեր այս դիտարկմանն ի պատասխան, տիկին Առուստամյանն ասաց, որ պատգամավորները պատրաստ են եղել երաշխավորել երիտասարդների համար, սակայն նախաքննական մարմինը չի բավարարել նրանց միջնորդությունը:

Նրա խոսքով, ինքը որպես փաստաբան, հստակ մարտավարություն ունի և պարբերաբար օգտվում է անձնական երաշխավորության ինստիտուտից, այդ պատճառով էլ դիմել է պատգամավորներին, նրանք էլ պատրաստակամություն են հայտնել երաշխավոր կանգնել տղաների համար: Մելանյա Առուստամյանն ասաց նաև, որ բացի երկու դաշնակցական պատգամավորներից ինքը մեկ ուրիշ պատգամավորի ևս դիմել է ու ստացել նախնական համաձայնություն երաշխավոր կանգնելու մասին: Իսկ թե ով է այդ պատգամավորը, տիկին Առուստամյանը չի շտապում բացահայտել:

«Երբ մյուս երկու պատգամավորները տվեցին համաձայնություն երաշխավոր կանգնել, էլ երրորդ պատգամավորի երաշխավորության կարիքը չզգացվեց: Երաշխավոր կանգնելու համար անձը պետք է հանրության վստահությունը վայելի: Նա կարող է լինել նաև գրող, մտավորական: Ստացվում է, որ այդ մարդիկ ընկան պատմության մեջ: Փաստորեն, սրանով վտանգում են այս ինստիտուտի կայացմանը: Այսինքն` եթե մարդը անձնական երաշխավորությամբ հանդես գա, նշանակում է հովանավո՞ր է արարքին», - նկատեց մեր զրուցակիցը:

Ծոմակին հասցված վնասը հաշվարկների արդյունքում կազմել է 3 մլն դրամ, և բացի 1 մլն դրամ գրավը, Համբիկի ծնողները, որպես դեպոզիտ, դատարանին վճարել են նաև 4 մլն դրամ:

«Մենք դա մուծել ենք, որպեսզի եթե հանկարծ հետագայում հաստատվի դատավճռով, որ տղաները մեղավոր են, վնասն արդեն հատուցված լինի: Բացի այդ, դատարանը խափանման միջոցը որոշելու հարցում որպես հիմք ունեցել է նաև այս հանգամանքը: Տղաների ծնողները գրել են դիմում այն մասին, որ սա դեռ չի նշանակում, որ իրենք կատարել են հանցագործությունը: Եթե պարզվի, որ մերոնք չեն կատարվել, այդ գումարը ենթակա է վերադարձման: Եթե մենք Ծոմակին ուղարկեինք գումարը, կնշանակեր մենք ընդունում ենք մեր մեղքը, բայց մենք մուծել ենք դատարանի դեպոզիտ, որպեսզի դատարանը լրացուցիչ երաշխիք ունենա, որ կալանք կիրառի», -հավելեց տիկին Առուստամյանը` նկատելով, որ տղաները ուսանողներ են և իրենց անհրաժեշտ էր, որպեսզի ազատ լինեին ու մասնակցեին քննաշրջանին:

Հարցին, թե արդյոք տղաներն ընդունե՞լ են իրենց մեղքը, փաստաբանը, նախաքննության գաղտնիությունից ելնելով, հրաժարվեց պատասխանել:

Փաստաբանին զայրացրել է նաև Ծոմակի հայտարարությունը, թե Մելանյա Առուստամյանը դաշնակցական է: «Ես ՀՅԴ անդամ չեմ, ուղղակի այդ կուսակցությանը ես ընդունում եմ, դրա համար այդ հայտարարությունը չեմ ընդունում իմ հասցեին հասցված վիրավորանք: Ուղղակի այդպիսի հայտարարությունը խոչընդոտում է իմ մասնագիտական գործունեությանը», -նշեց փաստաբանը:

«Միայն Ծոմակի ակումբը չէ, որ «ահաբեկչության զոհ» է դարձել». Ծոմակը մեղադրում է Դաշնակցությանը

Էսկալացիա է սկսվել. Պաշտպանը` «D.I.Y»-ի հրկիզմանը հաջորդած դեպքերի մասին