Ձեր վստահելի աղբյուրը

Վաղը կայանալու է «Եվրատեսիլ-2012» երգի միջազգային մրցույթի եզրափակիչ փուլը, սակայն Հայաստանի Հանրային հեռուստաընկերությունը՝ որպես Եվրոպական հեռարձակողների միության լիիրավ անդամ և Եվրատեսիլ երգի մրցույթի պաշտոնական հեռարձակող, դեռևս հստակ որոշում չի կայացրել` ցուցադրելու է այն, թե ոչ:

«Հավանաբար, երևի այո»,- Panorama.am-ի հետ զրույցում ասաց Եվրատեսիլի հայկական պատվիրակության ղեկավար Գոհար Գասպարյանը` պատասխանելով այն հարցին, թե Հանրային հեռուսաընկերությունը վերջնական որոշում կայացրե՞լ է` ցուցադրելո՞ւ, թե՞ չի ցուցադրելու մրցույթի եզրափակիչ փուլը:

Հիշեցնենք, որ Եվրոպական հեռարձակողների միությունը տուգանել է Հայաստանին  Բաքվում անցկացվելիք «Եվրատեսիլ» երգի մրցույթին մասնակցելուց հրաժարվելու համար: Որոշման արդյունքում` Հայաստանը պետք է վճարի մասնակցության համար նախատեսված գումարը, ինչպես նաև որպես տուգանք այդ գումարի 50 տոկոսը: Բացի այդ Հայաստանի Հանրային հեռուստաընկերությունը պարտավոր կլինի ուղիղ եթերում և առանց դադարների ցուցադրել մրցույթի եզրափակիչ փուլը, հակառակ պարագայում, Հայաստանը կարող է զրկվել «Եվրատեսիլ 2013»-ին մասնակցելու իրավունքից:

Հիշեցնենք նաև, որ Հայաստանի հանրային հեռուստաընկերությունը Բաքվում կայանալիք «Եվրատեսիլ» մրցույթին Հայաստանի մասնակցության վերաբերյալ ավելի վաղ հանդես է եկել հայտարարությամբ, նշելով, որ Հայաստանի հանրային հեռուստաընկերությունը չի կարող պատվիրակություն ուղարկել Ադրբեջանի մայրաքաղաք Բաքու:

«Եվրատեսիլ-2012» միջազգային մրցույթին մասնակցել է 42 պետություն, եզրափակիչ են անցել 20-ը` Լիտվան, Բոսնիա Հերցոգովինան, Սերբիան, Ուկրաինան, Շվեդիան, Մակեդոնիան, Նորվեգիան, Էստոնիան, Մալթան, Թուրքիան, Ռուսաստանը, Իսլանդիան, Հունաստանը, Ալբանիան, Ռումինիան, Կիպրոսը, Դանիան, Հունգարիան, Մոլդովան և Իռլանդիան, նաև մրցույթի կանոններով միանգամից եզրափակչում ելույթ կունենան Գերմանիա, Իսպանիա, Ֆրանսիա, Իտալիա, Անգլիա, անցած տարվա հաղթած երկիրը` Ադրբեջանը:

Նախորդող նորություններ`  Բաքվում կայանալիք «Եվրատեսիլը» հնարավոր է հայաստանցիներն էլ դիտեն