Ձեր վստահելի աղբյուրը

Երևանում Հանուն երկխոսության և զարգացման մշակութային բազմազանության համաշխարհային օրվա և Հայաստանում լեհական օրերի շրջանակներում ցուցադրվել է «Գալիցիայի երեք պատմությունները» փաստագրական ֆիլմը, որ հանդիսատեսին ստիպել է խորը անձնական ճանապարհորդություն անցնել դեպի այն մարդկանց ամենօրյա կյանքը, ովքեր պայքարում են պատերազմի, ատելության և իրար մոտ ապրող ազգերի միջև հակամարտության հետևանքների դեմ: Միջոցառման կազմակերպմանը աջակցել էին նաև Հայաստանում ՄԱԿ-ի գրասենյակը, Լեհաստանի և Ուկրաինայի դեսպանատները և Փարաջանովի թանգարանի ղեկավարությունը, հայտնում են ՄԱԿ-ի հայաստանյան գրասենյակից:

Այս փաստագրական ֆիլմը յուրօրինակ կերպով նկարագրում է Երկրորդ համաշխարհային պատերազմի ընթացքում և դրանից հետո Արևելյան Եվրոպայի Գալիցիա տարածաշրջանում (այժմ բաժանված է Լեհաստանի և Ուկրաինայի միջև) տեղի ունեցած իրադարձությունները: Դարեր շարունակ Գալիցիան եղել է էթնիկ խմբերի հայրենիքը` ոչ միայն ուկրաինացիների և լեհերի, այլև հայերի և հրեաների:

Ֆիլմը հարգանքի տուրք է մատուցում բազմաթիվ անհայտ հերոսների հիշատակին, հասարակ մարդիկ, ովքեր, անտեսելով վեր խոյացող սարսափի ու վտանգի սպառնալիքները, արել են այն, ինչ ճիշտ էր, և ոչ թե այն, ինչ հեշտ էր: Ֆիլմը պատմում է մի հրեական ընտանիքի մասին, որը նախընտրեց փրկել իր ոխերիմ թշնամուն` մի ուկրաինացի կնոջ, ով իր երկրի փրկության համար համբերությամբ տարավ իր երեխաների առևանգումը, և մի լեհ քահանայի, ով վտանգեց ամեն ինչ, որպեսզի վերջ տա եկեղեցական ծուխը քայքայող աղանդավորական ատելությանը:

«Գալիցիայի երեք պատմությունները» ֆիլմը ցուցադրվել և մեծ հաջողություն է ունեցել Կաննի, Համբուրգի կինոփառատոնների շրջանակներում, ինչպես նաև Միացյալ Նահանգներում, Ուկրաինայում և Կանադայում: Իսկ այսօր, ֆիլմի կովկասյան պրեմիերայի ժամանակ, Փարաջանովի թանգարանը լի է եղել հանդիսատեսով:
Ֆիլմը ռուսերեն թարգմանել է Սամվել Ավետյանը, իսկ կրկնօրինակվել է հայկական «Ֆորմիկա» ընկերության կողմից: