Ձեր վստահելի աղբյուրը

Երևանի քաղաքապետ Տարոն Մարգարյանի ֆեյսբուքյան էջը ողողված է Երևանի կենտրոնում գտնվող ու պատմամշակութային հուշարձանների ցանկում ընդգրկված Փակ շուկայի ճակատագրին առնչվող հարցերով, մեղադրանքներով: Սակայն քաղաքապետի կամ նրա ֆեյսբուքյան էջը վարողների կողմից այդ հարցերը մնում են անարձագանք. Կամ նրանց չի հետաքրքրում կատարվածը, կամ վայելում են ոչ աշխատանքային օրվա հանգիստը:

Նախօրեին գիշերը, ժամը 22-ի սահմաններում Փակ շուկայի տանիքը բոլորի համար անսպասելի սկսել են քանդել` այդպիսով խախտելով քաղաքապետարանի կողմից կազմված արձանագրությունը աշխատանքները դադարեցնելու մասին:

Դեռ մարտի 2-ին քաղաքապետարանի աշխատակիցները պարզել էին, որ կառույցի սեփականատեր «Թիվ 1 շուկա» ՍՊԸ-ն տարածքում կատարվող վերանորոգման աշխատանքների շրջանակում առանց համապատասխան թույլտվության առկայության նախաձեռնել է շինության տանիքի փայտաշեն հատվածի փոխարինման աշխատանքներ: «Վարչական իրավախախտումների վերաբերյալ» ՀՀ օրենսգրքի 154-րդ հոդվածի առաջին մասով կազմվել է արձանագրություն` առանց թույլտվության տանիքի ծածկի քանդման աշխատանքներ իրականացնելու համար: Դրանից հետո աշխատանքները դադարեցվել էին և ինչպես հավաստիացրել էին,տարածքը վերցված է «խիստ հսկողության տակ»:

Ազգային ժողովի դաշնակցական պատգամավոր Լիլիթ Գալստյանը քաղաքապետ Տարոն Մարգարյանից հետաքրքրվում է «պարոն քաղաքապետ, էս սև գործի համար ո՞վ է պատասխան տալու, մինչև ո՞ւր, ինչքա՞ն»: Մեկ այլ օգտատեր էլ հռետորական հարցադրում է անում. «Պարոն Մարգարյան, շարունակե՞նք հավատալ, թե նախընտրական շրջանն արդեն անցել է, ձեզ համար մեկ է»:

Նախօրեին գիշերը լուրը տարածվելուց անմիջապես հետո «Facebook» սոցիալական ցանում ստեղծվեց «Փրկենք փակ շուկան» քաղաքացիական նախաձեռնություն, որը տարածել է հետևյալ հաղորդագրությունը. «Ինչպես հայտնի է, շարունակվում է վանդալիզմը Գլխավոր պողոտայի վրա գտնվող ծածկած շուկայի հանդեպ: Չնայած պաշտոնայների կեղծ հավաստիացումներին, թե շուկայի տարածքում շինարարական աշխատանքները դադարեցված են, երեկ երեկոյան հերթական անդառնալի վնասն է հասցվել ճարտարապետական այդ կոթողին, ինչը արձանագրել են տեսախցիկները: Բոլոր նրանք, ովքեր անտարբեր չեն ճարտարապետական կոթողի ապագայի նկատմամբ, կարող են միանալ քաղաքացիական հավաքին, որը տեղի կունենա մայիսի 28-ին, ժամը 11:00-ին, շուկայի դիմաց: Հավաքվենք և քննարկենք մեր անելիքները ծածկած շուկան վանդալիզմից փրկելու նպատակով»:

Այս պահին, ինչպես շուկայի մոտից փոխանցում է Panorama.am-ի թղթակիցը, ամբողջությամբ քանդված են շուկայի ներքին հատվածն ու տանիքը: Առայժմ կանգուն են միայն արտաքին պատերը: Ոչնչացված են նաև ճակատային հատվածի աստիճանները, այդ մասում մոտ 5 մետր խորությմաբ փոս է փորված: Տարածքում այս պահին, սակայն, շինարարությունը դադարեցված է, շինարարներ կամ տեխնիկա չկա: Տարածքը հսկում են բազմաթիվ ոստիկաններ:

Panorama.am-ի թղթակցի հետ զրույցում Մարդու իրավունքների պաշտպանի լրատվական ծառայությունից տեղեկացրին, որ նախօրեին գիշերը իրենց արագ արձագանքման խումբը եղել է դեպքի վայրում, սական այդ ժամանակ շինարարական աշխատանքներ չեն իրականացվել: