Ձեր վստահելի աղբյուրը

Քաղաքապետարանի բնապահպանության վարչությունը թույլ է տվել հատել Նալբանդյան 106/1 հասեցում գտնվող 17 ծառերից 12, իսկ 5-ը տեղափոխել տնկարան: Սակայն այս պահին արդեն հատված են բոլոր ծառերը, միայն մեկն է արմատներով հանվել` «իբր» տնկարան տեղափոխելու համար:

Լրագրողներին ԱԺ արդեն նախկին պատգամավոր, ակտիվիստ Ստյոպա Սաֆարյանը նախ պատմեց, թե ինչ է պատահել այստեղ ժամեր առաջ.

«Բնակիչները թույլ չէին տալիս, որ տեխնիկա մտցվի տարածք` իբր գեոլոգիական աշխատանքներ կատարելու համար: Սակայն նրանք մտցրեցին ու սկսեցին հատել ծառերը: Մի ակտ ներկայացրեցին, թե պետք է հատել 12 ծառ, քանի որ այլևս պիտանի չեն, չեն մեծանում, 5-ը տեղափոխել: Սակայն որևէ փաստաղթութ, թե ուր պետք է տեղափոխվեն այդ ծառերը, կամ տարածքի բարեկարգման մասին, չկար: Նույնիսկ քաղաքապետարանի ներկայացուցիչը չկարողացավ հիմնավորել, թե ինչ ակտ է, ինչ իրավական ուժ ունի»:

Ս. Սաֆարյանը նշեց, որ դրանից հետո բոլորին դուրս հանեցին տարածքից ու սկսեցին հատել «իրենց իսկ կողմից չորացրած ծառերը»:

Այդ ընթացքում քաղաքացիները մտել են տարածք, ու կառուցապատողի ներկայացուցիչների միջև ծեծկռտուք է սկսվել:

«Ոստիկաններից պահանջեցի արձանագրել հաղորդում հանցագործության մասին: Սկզբում հրաժարվեցին անել, հետո հասկացան, որ կարող է իրավիճակը անկառավարելի դառնալ ու պահանջեցին կառուցապատողին դադարեցնել ծառերի հատումը ու ներկայացնել քաղաքապետարանի թույլտվությամբ գրություն, թե ուր են տարվելու տեղափոխվող ծառերը»,- պատմեց Ս. Սաֆարյանը:

Այնուհետև մեկ ժամ սպասել են: Բերվել է Ս. Սաֆարյանի կարծիքով «հետին թվով թվագրված մի խուժան գրություն»` բնապահպանության վարչության պետի ստորագրությամբ, ըստ որի ծառերն այլևս կենսունակ չեն ու պետք է հատվեն, իսկ 5ը` տեղափոխվեն տնկարան:

«Այդ բոլոր ծառերը բացարձակ կանաչ ծառեր էին, թթենիներ, լորենիներ, իսկ բնապահպանության վարչության պետն իր սենյակում նստած գիտի, թե որ ծառն է կենսունակ, որը ոչ»,- ասաց նա: Այդ գրությունը ներկայացնելուց հետո, շարունակվել են ծառահատման աշխատանքները: Ոստիկանները, ըստ նախկին պատգամավորի, որևէ միջամտություն չեն ցուցաբերել, թեև այդ փաստաթուղթը կասկածներ էր հարուցում:

Հարակից շենքերի բնակիչները բողոքում են, որ երեխաների համար խաղալու տեղ ընդհանրապես չկա, «խաղում են այս փոքրիկ բակում, հանկարծ կպնում մի մեքենայի, սիգնալիզացիան միանում է ու սկսվում վիճաբանությունը», սակայն ինչքան բողոքում են, ստորագրահավաք անում` դեմ արտահայատվելով որևէ շենք կառուցելու նախագծերին, ինչպես տեսնում են, անօգուտ է. «Իրենց սև գործն անում են»: Բակի երեխաները, ովքներ ներկա էին եղել նաև այսօրվա վիճաբանությունը, ասացին, որ իրենք չեն ուզում, որ այստեղ որևէ բան կառուցվի, չէին ուզում, որ ծառերը հատվի: «Բայց մեզ չեն լսում»,- ասաց երեխաներից մեկը:

Ս. Սաֆարյանը նաև ներկայացրեց այս տարածքի նախապատմություն, թե ինչպես է նախկին ոստիկանապետը ապօրինի թույլատրել քանդել ոստիկանությանը պատկանող մանկապարտեզը, այնուհետև կառավորության որոշմամբ տարածքը` 9000 քմ. համարվել է հանրային գերկա շահ: Քանդվել են նաև հարակից տարածքի տները` բարձրահարկ կառուցելու նպատակով: Ի դեպ, այսօր այդ տների բնակիչները նույնպես մասնակից են եղել այդ ծեծկռուտքին, սակայն պաշտպանել են կառուցապատողին` «թող ծառերը հատեն, որ մեզ բնակարան տան»: Շենք կառուցելու մի քանի նախագծեր մերժվել են հարակից շենքերի բնակիչների կողմից: Այդ գործում իրենց մասնակցությունն են ունեցել նաև «Ժառանգության» նախկին պատգամավորներ Անահիտ Բախշյանն ու Ստյոպա Սաֆարյանը: Տարածքում շինարարական աշխատանքները դադարեցվել են, սակայն այսօր արդեն սկսկել էին` ծառերը հատելով: Այս պահին էլ լսվում է էլեկտրասղոցի ձայնը: Տարածքում գրեթե ծառ չի մնացել, բոլորը «փռված» են գետնին:

Նախորդող նորություն` Նալբանդյան 106/1-ում հատել են ծառերը. «Ոստիկանությունը շղարշի դեր տարավ»
 Նալբանդյան 106-ի հարցը փակված չէ. Բնակիչները պատրաստվում են բողոքի