Ձեր վստահելի աղբյուրը

«Ես իմ մասնագիտությամբ էդ միասնական շտաբի զոհը դարձա: Ես դարձա միասնական շտաբի կնքահայրը և զոհը միաժամանակ՝ ընդ որում, միասնական շտաբի միակ զոհը դառա ես: Չնայած խոստովանենք, էդ միասնական շտաբը առավելություն բերեց այն թիմին, որում ես ներգրավված էի որպես անկուսակցական քաղաքագետ»,-իր հետ կատարվածն այսպես բնութագրեց քաղաքագետ Հմայակ Հովհաննիսյանը, ով դեռ երկու տարի առաջ ԲՀԿ առաջնորդ Գագիկ Ծառուկյանի հետ ինչ-ինչ հանգամանքներում «ծածուկ» պայմանավորվածություն էր ձեռք բերել, որպեսզի իբրև քաղաքագետ իր գործունեությամբ քողարկված ձևով ծառայի ԲՀԿ իմիջին, ինչի դիմաց Գագիկ Ծառուկյանը պարտավորվել էր հատուցել ԲՀԿ համամասնական ցուցակի 5-րդ պատվավոր տեղը Հմայակ Հովհաննիսյանի համար «բրոնյա» անելով ու մի «թոնթոլ» հանձնաժողովի նախագահ կարգելով *(տես տեսանյութը):

Հիշեցնենք, սակայն, որ խոստումները կեսճամփին այլևս չիրականացան Հմայակ Հովհաննիսյանի համար Գագիկ Ծառուկյանի դրսևորած անակնկալ վարքի պատճառով:

ԱԺ ընտրություներից անմիջապես հետո Գագիկ Ծառուկյանն իր մոտ է կանչել Հմայակ Հովհաննիսյանին և առանց երախտիքի որևէ խոսք ասելու, պարտադրել վերջինիս ինքնաբացարկի դիմում գրել:
Մեր այն հարցին, թե ինչո՞ւ , այդուհանդերձ ժողովրդի քվեն ստացած պատգամավոր Հ. Հովհաննիսյանը չհարգեց իր և րի ընտրողի իրավունքը և չփորձեց մտնել ԱԺ, այնուհետ դուրս գալ, պարզապես ԲՀԿ խմբակցությունից, ասաց. «Ես չարհամարհեցի իմ ընտրողին, ես սպառիչ բացատրություն տվեցի նրանց իմ ինքնաբացարկի դիմումը գրելուց հետո, իսկ ես այդ դիմումը գրել եմ շատ ծանր ու դժվարին պայմաններում: Եվ այսօր էլ հայտարարում եմ ամենայն պատասխանատվությամբ՝ պարտավորվում եմ առաջիկա 5 տարիների ընթացքում ԱԺ-ում շրջանառության մեջ դրվող բոլոր հարցերի, նախագծերի վերաբերյալ հայտնել իմ տեսակետը, որպես ժողովրդի կողմից ընտրված պատգամավոր»:

Ինչ իմաստ կունենա Հմայակ Հովհաննիսյանի ելույթները, հնչեցրած տեսակետները ԱԺ պատերից դուրս, երբ նա չի ունենա լծակներ, հարցին, այսպես պատասխանեց. «Ես չեմ ունենա կոճակ, բայց կունենամ ԱԺ-ից դուրս կարծիք հայտնելու հնարավորություն, ես կհայտարարեմ, թե ինչպես ես կքվեարկեի ասենք այս կամ այն օրինագծի վերաբերյալ: Իսկ եթե այդպիսի դեպքերում իմ հնչեցրած տեսակետները, պարզվի, որ համընկնում են ԲՀԿ քաղաքական թիմի մոտեցումների հետ, ուրեմն դա կնշանակի ինձ ինքնաբացարկ պարտադրելը և ինձնից մանդատ վերցնելը ճիշտ չէր»:

«Սերժ Սարգսյանն, ըստ էության, զրկեց ԲՀԿ-ին մտավոր ներուժից, ի դեմս ինձ՝ Հմայակ Հովհաննիսյանի, և վարչական ռեսուրսներից՝ նախագահական ընտրություններին ընդառաջ: Եվ ես իր այդ քայլը համարում եմ միանգամայն տրամաբանական՝ իշխող ուժի շահերից ելնելով»,-այսպիսի կարծիք հայտնեց ԲՀԿ համամասնական ցուցակով պատգամավոր ընտրված, սակայն ինքնաբացարկ ներկայացրած Հմայակ Հովհանիսյանը:

Panorama.am-ի հետ զրույցում Հմայակ Հովհաննիսյանը սկզբում գրեթե վստահ հայտարարեց, որ ԲՀԿ համամասնական ցուցակից «իրեն հեռացնելու պահանջը ԱԺ ընտրություններից հետո դրվել է Բաղրամյան 26-ից», իսկ հետո խոստովանեց, որ դա այսպես ասած, վարկած է, որը մամուլում շրջանառության մեջ է դրվել «շահագրգիռ անձի կամ ուժի միջոցով՝ արդարացնելու իրենց քայլերը և Հմայակ Հովհաննիսյանի միտքն ու մաղձն ուղղելու Բաղրամայն 26 հասցեի ուղղությամբ», դրանով իսկ, ըստ Հմայակ Հովհաննիսյանի, դաշտում «ևս մեկ բողոքավոր, աբիժնիկ ունենալու և դիվիդենտներ շահելու ԲՀԿ-ի օգտին»: