Ձեր վստահելի աղբյուրը

Մեծ Բրիտանիայի և Հյուսիսային Իռլանդիայի Միացյալ Թագավորությունում ՀՀ արտակարգ և լիազոր դեսպան՝ Կարինե Ղազինյանի հարցազրույց է տվել «ԲԻ-Բի-Սի» լրատվական գործակալությանը: Ստորև ներկայացնում ենք հարցազրուցից հատվածներ:

-Վերջին իրադարձությունը, որը տեղի ունեցավ Ղարաբաղում՝ ռազմական շքերթն էր՝ նվիրված Շուշիի ազատագրման 20-րդ տարելիցին: Ադրբեջանական կառավարությունը այն նկարագրում է որպես սադրանք և մի բան, որը չի կարող օգնել խաղաղ գործընթացին: Արդյո՞ք ճիշտ էր նման ռազմական շքերթ իրականացնելը:

-Իհարկե, ճիշտ էր: Լեռնային Ղարաբաղը երիտասարդ, 20 տարեկան, դե-ֆակտո, անկախ ժողովրդավարական պետություն է: Ինչպես գիտեք` մայիսի 9-ը ֆաշիզմի նկատմամբ տարած հաղթանակի օրն է, իսկ մեզ համար՝ նորանկախ Հայաստանի համար՝ նաև Շուշիի ազատագրման օրն է: Ցանկանում եմ նշել, որ Ղարաբաղը հաղթանակ տարավ պատերազմում, բայց մեզ համար կարևոր է տարածաշրջանում խաղաղության հաղթանակը: Նորմալ է, որ նման միջոցառումը նշվում է: Շուշին հայկական հնադարյան քաղաք է:

-Շատերը պնդում են, որ Հայաստանի շահերից է բխում, որպեսզի ստատուս քվոն պահպանվի և Հայաստանը չի շտապում այդ հարցում որոշում կայացնել:

-Ես համամիտ չեմ նման տեսակետի հետ: Մենք շատ ենք ցանկանում այս գործընթացում առաջ գնալ, ահա թե ինչու, երբ ԵԱՀԿ Մինսկի խմբի համանախագահներից որևէ մեկը նախաձեռնությամբ է հանդես գալիս, իսկ վերջին երկու տարիների մի շարք նախաձեռնություններով է հանդես եկել ՌԴ նախկին նախագահ Դ. Մեդվեդևը, մենք միշտ մասնակցել ենք: Ճիշտ չէ այն տեսակետը, թե Հայաստանը շահագրգռված չէ այս հարցում: Մտահոգիչ է այն հանգամանքը, որ Ադրբեջանը սպառազինության ներկրումն անընդհատ մեծացնում է: Երբ 1991-ին պատերազմ եղավ, Հայաստանը ոչ հարուստ էր, ոչ էլ ռազմական առումով ուժեղ, բայց մենք պայքարել ենք մեր ժողովրդի ազատության համար: Մենք չենք ճանաչել Կոսովոն, որովհետև առանց Լեռնային Ղարաբաղը ճանաչելու չէինք կարող նման քայլի գնալ: Մեզ համար դա լավ նախադեպ է: Եթե Կոսովոն կարող է անկախ լինել, ինչո՞ւ չի կարող անկախ լինել Ղարաբաղը:

-«Եվրատեսիլ 2012» երգի մրցույթը Հայաստանի համար լավ առիթ էր, լավ ժեստ՝ Բաքու ուղարկել Հայաստանի ներկայացուցչին՝ ցույց տալու, որ հնարավոր է երկու պետությունների միջև նորմալ հարաբերություններ: Բայց Հայաստանը որոշեց չօգտվել այդ հնարավորությունից:

-Ես համոզված եմ, որ Հայաստանն ուներ իր պատճառները: Ես մանրամասներին ծանոթ չեմ, սակայն ինչպես նշեցի, մենք ցանկանում ենք բանակցություններ, մենք ցանկանում ենք համագործակցություն: Ես կարող եմ իմ անձնական փորձից օրինակ բերել: Ես Հայաստան-ԵՄ Ասոցացման համաձայնագրի գլխավոր բանակցող էի, և երբ բազմակողմանի ծրագրեր էին լինում, և երբ որ Ադրբեջանը և Հայաստանը միասին պետք է մասնկացեին այդ ծրագրին, Հայաստանը հայտարարում էր, որ պատրաստ է մասնակցել այդ ծրագրին, Ադրբեջանը միանգամից հրաժարվում էր:

Հիշեցնենք, որ Հայաստանի հանրային հեռուստաընկերությունը Բաքվում կայանալիք «Եվրատեսիլ» մրցույթին Հայաստանի մասնակցության վերաբերյալ հանդես է եկել հայտարարությամբ, նշելով, որ Հայաստանի հանրային հեռուստաընկերությունը չի կարող պատվիրակություն ուղարկել Ադրբեջանի մայրաքաղաք Բաքու ու մանրամասնել. «Թեև Ադրբեջանի իշխանություններն անվտանգության երաշխիքներ խոստացան մասնակից բոլոր երկրներին, բայց օրեր առաջ Ադրբեջանի նախագահն այդ երկրներից մեկի համար «բացառություն արեց»` հայտարարելով, թե Ադրբեջանի թիվ մեկ թշնամին աշխարհասփյուռ հայությունն է: Փաստացի կարող ենք արձանագրել, որ «Եվրատեսիլը» հյուրընկալող երկրի նախագահը պաշտոնապես հայտարարում է, որ բոլոր հայերը, այդ թվում նաև նրանք, ովքեր ընդգրկված պետք է լինեին «Եվրատեսիլի» պատվիրակության մեջ, Ադրբեջանի թշնամիներն են:

Հետևաբար, որևէ տրամաբանություն չկա մասնակից ուղարկել մի երկիր, որտեղ նրան դիմավորելու են որպես թշնամու: Սա մեզ համար սկզբունքային խնդիր է:

Համոզված ենք, որ այն մթնոլորտը, որը ձևավորվել է նմանատիպ և այլ հակահայկական հայտարարությունների և գործողություններին ֆոնին, չի կարող հավասար պայմաններ ապահովել «Եվրատեսիլին» մասնակցող բոլոր երգիչների համար, ինչը, մեր պատկերացմամբ, մրցույթի հիմնական բաղադրիչներից մեկն է: Մենք հետագայում էլ շարունակելու ենք մասնակցել «Եվրատեսիլին» և ներկայացնելու Հայաստանը համաեվրոպական երգի այդ մրցույթին»,-ասված է տարածած հայտարարության մեջ:»

Տեսանյութն`  այստեղ: