Ձեր վստահելի աղբյուրը

«Ակնհայտ է, որ ադրբեջանական դիվերսիաների և պետքարտուղար Քլինթոնի այցի միաժամանակյա լինելը պատահական զուգադիպություն չէր: Կարծում եմ կատարվածը հարկավոր է դիտարկել պաշտոնական Բաքվի ինչ-ինչ քաղաքական հաշվարկների, մասնավորապես «պատերազմի շանտաժի» համատեքստում»,- անդրադառնալով Ադրբեջանի կողմից իրականացված դիվերսիոն գործողությանը՝ Panorama.am-ի հետ զրույցում ասաց ռազմական փորձագետ Դավիթ Ջամալյանը:
Հիշեցնենք, որ ադրբեջանական դիվերսիոն խումբը թիկունքից հարձակում է իրականացրել Չինարի գյուղի մերձակա հայկական հենակետերից մեկի ուղղությամբ, ինչի արդյունքում հայկական կողմից, նախնական տեղեկություններով, 3 զինծառայող զոհվել է, ևս 5ը՝ վիրավորվել են:

«Իսկ ի՞նչ ասել է պատերազմի շանտաժ: Ակնհայտ է, որ վերջին տարիներին արցախյան հակամարտության կարգավորման բանակցային գործընթացում Բաքուն պատերազմը չվերսկսելը ներկայացնում է իբրև իր կողմից արված հնարավոր առավելագույն փոխզիջում: Ամենայն հավանականությամբ, պատերազմի շանտաժի խաղաքարտը Բաքվում ցանկանում են խաղարկել նաև Քլինթոնի այցի ընթացքում:

Մասնավորապես պետքարտուղար Քլինտոնի այցից առաջ դիվերսիաների իրականացումը կարելի է որակել իբրև Բաքվի կողմից «պատերազմը վերսկսելու վճռականության» ցուցադրություն, որի նպատակն է հանդես գալ «պայման թելադրողի» դերում»,- ասաց Դ. Ջամալյանը:

Ըստ փորձագետի՝ այս տեսակետից միանգամայն հավանական պետք է համարել նաև այն, որ ալիևյան վերնախավը այս կերպ փորձում է ստուգել «պատերազմի շանտաժի» հանդեպ ամերիկյան կողմի հնարավոր ռեակցիան:

«Պետքարտուղար Քլինթոնն անթույլատրելի համարեց լարվածության էսկալացիան, ինչը խոստացավ կրկնել նաև Բաքվում: Փաստը մնում է փաստ, որ պետքարտուղարի Երևանում գտնվելուն զուգահեռ ադրբեջանական լրահոսում հայտնվեցին տեղեկություններ, որոնցում փորձ էր արվում տեղի ունեցածը ներկայացնել իբրև մեր զինծառայողների միջև միջանձնային կոնֆլիկտի հետևանք:

Այդուհանդերձ տվյալ դեպքում հարկ է ֆիքսել հետևյալը. մեր դիրքապահ ստորաբաժանումները կասեցրել և ետ են մղել ադրբեջանական դիվերսիոն խմբերի հարձակումը»,- նշեց նա:

Փորձագետի խոսքերով՝ մեր հանրությունը պետք է հստակ գիտակցի. առաջին գծում բանակն իր գործառույթն իրականացրել է՝ ցավոք, մեզ համար ծանր կորստների գնով:

«Եվ թերևս ամենակարևորը. մեր երկրի Զինված ուժերի գերագույն-գլխավոր հրամանատարը, պաշտպանության նախարարը բազմիցս հայտարարել են, որ թշնամու և ոչ մի սանձարձակություն անպատասխան չի մնալու: Հատկապես ընդգծենք. խոսքը ոչ թե պարզունակ վրեժխնդրության, այլ թշնամուն զսպելու գործուն մեխանիզմի մասին է, այնպիսի պատասխանի մասին, որը կլինի իրադրությանը համարժեք՝ միաժամանակ Ադրբեջանում հանրային ռեզոնանս առաջացնելու ունակ կորուստներ ենթադրող, այնպիսի պատասխանի մասին, որի հետևանքով ալիևյան վարչակազմի այս նախահարձակ ագրեսիան ադրբեջանական հասարակության կողմից ընկալվի իբրև վտանգավոր արկածախնդրություն: Սա է թշնամուն զսպելու միակ ելքը»,- ասաց Դ. Ջամալյանը:

Այնուհետև փորձագետը հավելեց. «Այո՛ Ադրբեջանում հանրային կարծիքը հաշվի առնելու մշակույթ գոյություն չունի: Այնուամենայնիվ, միաժամանակյա մեծաթիվ կորուստների ապակայունացնող պոտենցիալն անգամ այստեղ հաշվի չառնել չեն կարող: Ասվածի ապացույցը Ադրբեջանի ՊՆ-ի մեզ քաջ հայտնի պրակտիկան է. սեփական մեծաթիվ միաժամանակյա կորուստները հանրությանը ներկայացնել մաս-մաս, երեք-չորս օրվա ինտերվալով՝ միաժամանակ խեղաթյուրելով մերոնց կողմից ոչնչացված ասքյարների մահվան իրական հանգամանքները: Առավել քան վստահ եմ, որ առաջիկայում մենք կրկին պաշտոնական Բաքվի այդ պրակտիկայի ականատեսը կլինենք»: