Ձեր վստահելի աղբյուրը

Սպորտի և երիտասարդության փոխնախարար, «Հայոց արծիվներ» հայրենասիրական հասարակական կազմակերպության առաջնորդ Խաչիկ Ասրյանն այս օրերին, ինչպես և ողջ հայությունը, ուշադրությունը սևեռել է հայ-ադրբեջանական սահմանի լարված իրավիճակին: Անգամ պատրաստվում է ՀՀ նախագահ Սերժ Սարգսյանին այս կապակցությամբ մի նախաձեռնություն ներկայացնել, որի մասին էլ Panorama.am-ը զրուցեց Խ.Ասրյանի հետ:

-Պարոն Ասրյան, սահմանում դարձյալ անհանգիստ է, թշնամին դիվերսիոն ակտիվ գործունեություն է ցուցաբերում: Ինչպե՞ս կմեկնաբանեք ստեղծված այս իրավիճակն ու այդ ակտիվությունը:

- «Հայոց արծիվների» հիմնադրման 2.5 տարիների ընթացքում կազմակերպված բազմաթիվ միջոցառումներում միշտ նշել եմ Հայաստանի աշխարհագրական դիրքի, հորինված ադրբեջանցի ղեկավարների կողմից հնչող ռազմատենչ հայտարարությունների վտանգը` ընդգծելով դրանց պարտվողական հոգեբանությունը: Միաժամանակ ես միշտ ընդգծել եմ հայոց ազգային բանակի, հայ զինվորի ու սպայի հաղթանակած ոգին ու հորդորել հասարակությանը, հաշվի առնելով այդ ամենը, միասնական լինել: Հայ ժողովուրդը միշտ պետք է համախմբված լինի Ազգային բանակի, հայոց նախագահի և ՀՀ եռամիասնության շուրջ:
Հաշվի առնելով վերջին ողբերգական միջադեպերը, ես կցանկանայի հանգստության ու զգոնության կոչեր ուղղել մեր ժողովրդին ու պարզապես շեշտել` ոչինչ իրականում չի փոխվել. ադրբեջանցին նույն վախկոտ ադրբեջանցին է ու փախնող թշնամին, պարզապես յուրաքանչյուրս պետք է գիտակցի, որ հատկապես այս ժամանակահատվածում պետք է համախմբված լինենք ու լինենք հայ զինվորի կողքին:

-Ձեր բոլոր հրապարակային ելույթներում ու հարցազրույցներում միշտ շեշտում եք նաև, որ ադրբեջանական կողմի ստոր սադրանքներին հայկական կողմը պետք է ու տալիս է համարժեք պատասխան: Տեսնո՞ւմ եք դա նաև այս դեպքերի կոնտեքստում:
-Հայաստանը ` ի դեմս ՀՀ նախագահի, միշտ եղել է խաղաղության կողմնակից, բայց ազգային բանակը նման սադրանքներին միշտ էլ կոշտ պատասխան է տվել, տալիս է և տալու է: Եվ վերջին միջադեպը բացառություն չէ:

-Նմանատիպ դեպքերի ֆոնին Ադրբեջանը միշտ բարձրաձայնում է իր բանակի մարտունակության մասին: Համեմատելի՞ են հայկական ու թշնամու բանակները:
-Որևէ համեմատություն անցկացնելն ուղղակի ծիծաղելի է: Արդեն քսան տարի ակտիվ առնչություն ունեմ Ազգային բանակի հետ, այցելել եմ գրեթե բոլոր զորամասերը, անձամբ ճանաչում են գրեթե ողջ հրամանատարական կազմը և վստահ կարող եմ ասել` հայկական բանակը իր մարտունակությամբ, իր պատասխանատվությամբ ու հավատարմությամբ տարածաշրջանում ամենամարտունակն է: Առանց ավելորդ բառերի` սա է մեր բանակի ճշմարտացի բնորոշումը:
Ինչ վերաբերում է ադրբեջանական բանակին, ապա դժվարությամբ եմ այն բանակ անվանում, քանի որ խոսքը զուտ ստորաբաժանումների կամ զինված խմբավորումների մասին է: Կարո՞ղ եք համեմատել կայացած ազգային բանակը խմբավորումների հետ:

-Այսօր շատ է խոսվում սրված իրավիճակի պատերազմի վերածվելու վտանգի մասին: Տեսնո՞ւմ եք նման հեռանկար:
-Հրադադարից հետո մենք միշտ գտնվել ենք ոչ պատերազմ, ոչ խաղաղություն ժամանակավոր այդ հատվածում և ավելի քան վստահ եմ, որ յուրաքանչյուր հայ սա շատ լավ գիտակցում է: Կրկնում եմ` վերջին իրադարձությունները, նկատի ունեմ և Հայաստանի և Լեռնային Ղարաբաղի սահմանների ոտնձգությունները բազմաթիվ անգամ տեղի են ունեցել: Միջադեպերը եղել են ու կան, այլ խնդիր է, որ բոլորս էլ մեծ ցանկություն ունենք, որ այլևս չլինեն: Բայց ինքս էլ շատ լավ գիտակցելով մեր աշխարհագրական դիրքը, կարծում եմ նման միջադեպերը կարող են շարունակական լինել:

-Այսինքն իրական պատերազմի վտանգ Դուք այսօր չե՞ք տեսնում:
-Իհարկե չեմ տեսնում: Բայց եթե անկեղծ լինեմ, ապա կասեմ հետևյալը. Աստված տա պատերազմ երբևէ չլինի, բայց եթե այն անխուսափելի է, ապա ես կգերադասեի, որ այն լիներ հենց այսօր և ոչ թե բաժին հասներ մեր եկող սերունդներին: Ավելի քան վստահ եմ, որ այն հորինված ադրբեջանցիների համար կլինի վերջինը :

-Լրատվամիջոցներից տեղեկացանք, որ նախաձեռնել եք ու պատրաստ եք 2 հազար նվիրյալների հետ մեկնել սահման, եթե հանրապետության նախագահը դրա թույլտվությունը տա: Դա իսկապես այդպե՞ս է:
-Ուզում եմ հարցին հարցով պատասխանել` եթե նման իրավիճակում ոչ «Հայոց արծիվները», ապա ո՞վ պետք է լինի ազգային բանակի ու հայ զինվորի կողքին, առաջին գծում: Հայրենասիրական հասարակական մեր կազմակերպության հիմքում հենց այդ գաղափարն է ընկած և զարմանալի կլիներ, եթե նման նախաձեռնությունով հանդես չգայինք: Կազմակերպությանը կամավոր հիմունքներով անդամագրվել է ավելի քան 25 հազար մարդ և նրանցից յուրաքանչյուրը, վստահեցնում եմ, պատրաստ են այդ քայլին: Այսօր ունենք 2 հազարանոց խումբ, որ պատրաստակամ է թեկուզ և վաղը մեկնել առաջին գիծ: Համապատասխան խնդրանք-դիմումով դիմելու ենք ՀՀ նախագահ Սերժ Սարգսյանին, Հայաստանի գլխավոր հրամանատարին, որպեսզի մեզ հնարավորություն տրվի կանգնել մեր զինվորների կողքին և հենց նա կորոշի նախաձեռնության ընթացքը:

-Պարոն Ասրյան, շրջանառվող խոսակցությունների համաձայն Ձեզ հնարավոր է գործադիրում նախարարի պաշտոնի նշանակեն: Ո՞րն է այս պահին Ձեզ համար ավելի կարևոր` նախարարի պորտֆելը, թե՞ ՀՀ ու ԼՂՀ սահմանների պաշտպանությունը:
-Միանշանակ` սահմանների պաշտպանությունը: Վստահ եմ, որ գործադիրում ցանկացած պաշտոնի նշանակումը նման իրավիճակում որոշակի ժամանակ կարող է սպասել, բայց հայրենիք-պետության սահմանների պաշտպանությունը երբեք չի կարող սպասել, անգամ մեկ րոպե: