Ձեր վստահելի աղբյուրը

ԲՀԿ ղեկավարությունը պետք է բացատրի իր մի շարք անդամներին, որ որոշակի ժամանակ հետո իրենք կրկին տիրապետելու են իշխանական ռեսուրսներին: Անդրադառնալով ԲՀԿ շուրջ ծավալվող զարգացումներին panorama.am-ի հետ զրույցում նման տեսակետ հայտնեց քաղտեխնոլոգ Կարեն Քոչարյանը:

«Երբ կուսակցությունը՝ ինքը իրենով ավելի շատ միտված է դեպի  նյութականը, այլ ոչ թե գաղափարի, բնականաբար, հրաժարվելով այդ նյութական ռեսուրսներից որոշակի փուլում պետք է բախվեր դժվարությունների հետ: Փաստ է, որ ԲՀԿ-ին բարդ ժամանակներ են սպասվում: Ներկայումս հենց ամենաբարդ իրավիճակն է»,- նշեց Կ. Քոչարյանը:

«ԲՀԿ-ն իշխանական բուրգ էր, որում մեկ ակնթարթում բոլորը զրկվեցին իրենց ռեսուրսներից: Այստեղ խնդիրը Գագիկ Ծառուկյանը չէ: Խնդիրը այն մարդիկ էին, որոնք եկել էին կուսակցություն, որպեսզի մոտ լինեն այդ ռեսուրսներին: Ներկայումս այդ մարիկ կանգնած են այդ ռեսուրսները կորցնելու փաստի առջև: ԲՀԿ ղեկավարության առջև խնդիր է դրված այս մարդկանց բացատրել և հույս ներշնչել, որ իրենք վերդառնալու են այդ ռեսուրսներին, ասենք՝ նախագահական ընտրություններից հետո: Եթե ԲՀԿ ղեկավարությունը կարողացավ ապահովել այդ լավատեսական ակնկալիքը, ապա պառակտում չի գնա, իսկ եթե ոչ` պառակտումն անխուսափելի է»,-նշեց Կարեն Քոչարյանը՝ հավելելով, որ այդ դեպքում ԲՀԿ-ից «կլինի սարսափելի քանակությամբ արտահոսք»:

Քաղաքագետի կարծիքով, լիովին իրատեսական է դեպքերի այնպիսի զարգացումը, որոնց դեպքում ԲՀԿ-ն կրկին կմիանա իշխանական կոալիցիային: «Եթե հնարավոր էր, որ ԲՀԿ դուրս գա կոալիցիայից, ապա ինչո՞ւ հնարավոր չէ, որ այն կրկին վերդառնա այնտեղ»,- նշեց Կարեն Քոչարյանը:

Ըստ բանախոսի, քաղաքագիտական տեսանկյունից ԲՀԿ ներկայումս ընդդիմություն է, քանի որ չի տիրապետում ոչ մի իշխանական ռեսուրսի: Սակայն հանդիսանո՞ւմ է արդյոք ԲՀԿ-ն իրական ընդդիմադիր ուժ թե ոչ՝ պարզ կդառնա այս կուսակցության խորհրդարանական գործունեությունից: «ԲՀԿ-ն մինչ օրս չի հայտարարել, որ ընդդիմություն է: Եթե ԲՀԿ-ն ընդդիմադիր դաշտի հետ քվեարկի, օրինակ՝ չընդունի Կառավարության ծրագիրը, ուրեմն ընդդիմություն է: Եթե հաստատեն Կառավարության ծրագիրը, ուրեմն իրականում ընդդիմություն չեն»,- ասաց Կ Քոչարյանը: