Ձեր վստահելի աղբյուրը

Տոկիոյից Վիետնամ, այն էլ գիշերը՝ հակասությունն ու տարբերությունն ավելի քան ակնհայտ են: Մարած լույսերով, մի-մի լուսասյուներով Հանոյը ավելի շատ «պատերազմ, նապալմ, Ամերիկայի հետ կռված, հաղթած, թե չէ... երկիր» բառերն էր պտտում մտքերում, քան թե ասենք՝ «հեռավոր երկիր, մայրաքաղաք, լավ է այնտեղ, ուր մենք չկանք…»:

Առավոտյան անհամբեր էինք քաղաքը տեսնել լույսով ու մարդկանցով:
Մինչ Հայաստանի նախագահ Սերժ Սարգսյանը հայկական պատվիրակության հետ կժամաներ Զոհված հերոսների հուշարձանին ծաղկեպսակ դնելու, հետաքրքիր է հետևել, թե ինչպես են այդ արարողությանը պատրաստվում վիետնամցիները (Տես նկարները):

 

Զոհված հերոսներին հարգանքի տուրք մատուցելուց հետո, հայկական պատվիրակությունը մասնակցում է Հո Շի Մինի դամբարանին ծաղկեպսակ զետեղելու արարողությանը: Այնուհետև տեղի ունեցավ Հայաստանի Հանրապետության Նախագահ Սերժ Սարգսյանի Վիետնամի Սոցիալիստական Հանրապետության նախագահ Թրուոնգ Սանգի հետ հանդիպումը:
Ողջույնից հետո հայկական պատվիրակությունը մասնակցում է ընդլայնված նիստին, իսկ ԶԼՄ-ների ներկայացուցիչները սպասում են նախագահների հայտարարությանը և փաստաթղթերի ստորագրմանը. Առաջ ընկնելով ասեմ, որ ստորագրվեցին ՀՀ ԱԳՆ և ՎՍՀ ԱԳՆ միջև համագործակցության մասին արձանագրություն, դիվանագիտական կամ պաշտոնական անձնագրեր ունեցող մուտքի արտոնագրի պահանջից ազատելու մասին համաձայնագիր, ՀՀ կառավարության և ՎՍՀ կառավարության միջև տնտեսական, առևտրական, գիտական և տեխնիկական համագործակցության մասին համաձայնագիր:

Կարծում եմ հասարակ աչքի համար հետաքրքիր է Վիետնամը ոչ միայն այս փաստաթղթերի ստորագրման շրջանակներում. Ում հետ համագործակցել, ինչպես են ապրում, ինչ են հիշում Սոցիալիստական Վիետնամի Հանրապետությունում Սոցիալիստական Հայաստանից, ինչպես են ապրում,...  ոչ պակաս հետաքրքիր է հաստատ:

Ասեմ, որ սպասասրահում կառավարության պաշտոնյաները և վիետնամցի ԶԼՄ ներկայացուցիչները միայն հագուստով էին տարբերվում իրարից. բոլորն էլ ուշադիր ուսումնասիրում էին մեզ, քննարկում: Որքան զուսպ էին ճապոնացիները շփման մեջ, այնքան «հայավարի» են վիետնամցիները: Ինձ համար անսպասելի էր՝ ես կարծում էի, որ այդքան երկար ու դաժան պատերազմ անցած վիետնամցիները շատ ավելի փակ կլինեն, բայց՝ չէ: Ի դեպ՝ պաշտոնյաներից իրենց տեղերը, որ հենց հովացվող սարքերի մոտ էին, զիջեցին մեզ, ու մեկը հարցրեց ինձ՝ «կան սպինիգ ինգլինգ»: Ես մի անգամ էլ հարցրեցի, հետո մտածեցի ու հասկացա, որ հարցնում են՝ կարո՞ղ եմ անգլերեն խոսել: Որոշեցի, որ ամենախելամիտը «ոչ» ասելն է, քան գլուխկոտրուկներ լուծելը, ինչից հետո նա հասկացող տեսքով ասաց՝ ա, Ղազախստան: Սկզբում զարմացա, հետո երբ անցնում էինք փողոցներով, հասկացանք, որ Ղազախստանից էլ հյուրեր ունեն Հանոյում ու «ինգլինգ» չանողին ղազախ էին համարել...

Ուրեմն հաստատ ունենք հարաբերությունների վերականգնման խնդիր. Մենք կարծես քսան տարում /այդքան է Հայաստանի Հանրապետության ու ՎՍՀ-ի միջև դիվանագիտական հարաբերությունների տարիքը/ հասցրել ենք մոռանալ իրար:

Ի դեպ, մի դիտարկում էլ՝ ճապոնացիների համեմատ վիետնամցիները ավելի սիրուն երևացին մեզ, թեև ամերիկյան ֆիլմերում ու
մուլտֆիլմերում հակառակ ստանդարտներ են:

Նկարներում` «Բարեկամական կապերին սպասելիս...» 

«Հայկական պատվիրակությունը, ՀՀ նախագահ Սերժ Սարգսյանի գլխավորությամբ, Վիետնամում է»

Արձանագրությունների ու համաձայնագրերի ստորագրումից հետո երկու երկրների նախագահները դիմեցին ԶԼՄ ներկայացուցիչներին, հաստատելով փաստաթղթերի ստորագրման հետ կապված իրենց գոհունակությունը և դիվանագիտական, գիտական, առևտրա-տնտեսական ոլորտներում համագործակցության հաստատման ու ընդլայնման պատրաստակամությունը:

Վիետնամի նախագահ Թան Սանգը հայտնեց, որ բարձր են գնահատում Հայաստանի Հանրապետության նախագահ Սերժ Սարգսյանի առաջին այցը Վիետնամ: Փոխանցեց իրենց ցանկությունը բոլոր հնարավոր ոլորտներում համագործակցության հաստատման մասին: Նշեմ, որ իմ տպավորությամբ` ընդգծվեց հենց առևտրա-տնտեսական ոլորտը: Նախագահ Թան Սանգը հայտնեց նաև, որ ընդլայնված նիստում պայմանավորվածություն է ձեռք բերվել հայ և վիետնամցի գործարարների մեջ համագործակցային կապերի հաստատման մասին:

Նախագահ Սարգսյանը իր հերթին ավարտված բանակցությունները գնահատեց հաջող: Գոհունակություն հայտնեց, որ ՎՍՀ-ն աստիճանաբար, բայց հաստատուն բարելավում է իր դիրքերը: Շնորհակալություն հայտնեց, որ ՎՍՀ նախագահը կառուցողական մոտեցում է ցուցաբերել տարածաշրջանային այնպիսի հարցերում, որոնք շատ կարևոր են Հայաստանի համար: Նախագահ Սարգսյանը ափսոսանք հայտնեց, որ հնարավոր է և ժամանակ է բաց թողնվել այս քսան տարվա մեջ ու կարևորեց դիվանագիտական կապերի հաստատումը: Ավելին՝ նախագահը հայտնեց, որ կստեղծվի միջկառավարական հանձնաժողով տնտեսական կապերի հաստատման հարցերի համար:

Նախորդիվ` Պաշտոնական-ճամփորդական փորձեր
*  Սևից մինչև սպիտակի բոլոր գույները. Տոկիոն` ինչպես որ է՝ ծայրահեղությունների ներդաշնակություններ (լուսանկարներով)

*  Երբ արևը ծագում է Գրինվիչից ինը ժամ հետո. Ճապոնիան առանց արևային ակնոցների. Սենդայ

* ՀՀ նախագահին հանձնվեց «Ժողովուրդների բարեկամության» պատվոգիր և շնորհվեց համալսարանի պատվավոր դոկտորի կոչում (նաև` հանդիպում կայսեր հետ)