Ձեր վստահելի աղբյուրը

5-րդ գումարման Ազգային ժողովի խորհրդարանական գրեթե բոլոր խմբակցությունները արդեն ունեն իրենց ծրագրերը և ընդհանուր պատկերացում` ինչով են զբաղվելու խորհրդարանական աշխատանքի ընթացքում: Բացի այդ, խմբակցությունները խոստանում են ակտիվ աշխատել. սեպտեմբերին մեկնարկող խորհրդարանի նստաշրջանը խոստանում է հետաքրքիր լինել:

Արտախորհրդարանական ընդդիմությունից խորհրդարանական ընդդիմության կարգավիճակ ստացած Հայ Ազգային կոնգրես խմբակցության անելիքները շատ են լինելու` «իմփիչմենթից» սկսած մինչև աշխատավարձի բարձրացում: ՀԱԿ խմբակցության ղեկավար Լևոն Զուրաբյանն ասում է, որ «Ժողովրդի շահերից բխող օրենքներ» են մշակելու, իսկ նույն խմբակցության անդամ Հրանտ Բագրատյանն էլ իր ֆեյսբուքյան էջում մանրամասնում է` ինչ օրինագծեր է ներկայացնելու խորհրդարանի դատին:

Տպավորություն է, թե նրանք գործելու են իրարից անկախ, բայց ինչևէ, այդ օրինագծերը, ըստ Բագրատյանի, 50-ն են լինելու ու վերաբերելու են Հայաստանի հասարակական-տնտեսական կյանքի տարբեր ոլորտներին: Ահա դրանցից մի քանիսը. ՀՀ-ում նվազագույն աշխատավարձը 72.500 դրամ դարձնելու մասին, ԽՍՀՄ խնայբանկի ավանդների չփոխհատուցված մնացորդը պետական պարտք ձևակերպելու և պարտատոմսեր բաժանելու մասին, 2009-2010թթ գյուղացիների վարկային պարտքերի տոկոսների վճարումները պետական բյուջեից և առևտրային բանկերի պահուստներից փոխհատուցելու մասին, Միջին աշխատավարձի, նվազագույն աշխատավարձի և միջին կենսաթոշակի կապի մասին, ԱԱՀ վերադարձի ուշացման դեպքում տուգանքների մասին, Կապիտալի արտահանման հարկի մասին, Շքեղ մեքենաների, նկարների, գերթանկարժեք առարկաների, իրերի ու արվեստի գործերի, անձնական կամ մասնավոր օգտագործման փոքր ինքնաթիռների, ուղղաթիռների, լողացող միջոցների բարձրացված հարկման մասին, Այլընտրանքային մաքսային ծառայության մասին, Խաղատներում պետական ներկայացուցիչների մասին, Կառավարությանը հարկային արտոնություններ տալուց զրկելու մասին, «Հայաստան» ներդրումային հիմնադրամ ստեղծելու և «Հայաստան» հիմնադրամի ու համահայկական բանկի գործունեությունը դադարեցնելու մասին, Այլընտրանքային դատարանների մասին և այլն: «Կփորձեմ հասցնել բարձրացնել այդ հարցերը», -իր էջում գրել է Բագրատյանը:

Այս ամենից զատ, ՀԱԿ խմբակցությունը պատրաստվում է բարձրացնել նաև նախագահ Սերժ Սարգսյանի պաշտոնանկության հարցը: Իսկ թե հատկապես ե՞րբ կամ ի՞նչ հերթականությամբ, Զուրաբյանը չի կարող ասել: «Դրա համար պետք է քաղաքական ճիշտ պահը ընտրել», -նկատում է նա: Իսկ «քաղաքական ճիշտ պահը» Զուրաբյանի պատկերացմամբ, այն է, որ ապահովի պատգամավորների առավելագույն աջակցություն: «Հնարավոր է, որ Հայաստանում ստեղծվի մի քաղաքական իրավիճակ, երբ մեր նախաձեռնությանը կմիանան բազմաթիվ պատգամավորներ և ամբողջական ֆրակցիաներ», -նշում է Զուրաբյանը:

Մեծամասնություն կազմող Հանրապետական խմբակցությունում թեթև են վերաբերում պաշտոնանակության հարցը բարձրացնելու մասին ՀԱԿ-ի մտադրությանը: «Թեթև պետք է տանել իրենց պլանները, որովհետև նախընտրական տարի է», -ասում է Ազգային ժողովի փոխնախագահ Էդուարդ Շարմազանովը՝ ընդգծելով, որ «իմփիչմենթի» գործընթացի մասին հայտարարելն ու այն բարձրացնելը, այն էլ ՀԱԿ-ի կողմից նորություն չէ: «Բնական է` ընդդիմությունը պետք է քննադատի, իսկ իշխանությունն էլ պետք է աշխատի: Կզարմանայի, եթե ՀԱԿ-ը գար Հայաստանի Ազգային ժողովում գովեր կառավարությանը, իշխանություններին, իրենք խնդիր ունեն ավելի ռադիկալ ու ավելի հեղափոխական երևալ»-նշում է Շարմազանովը:

Իսկ ի՞նչ է անելու Հանրապետականը. ԱԺ փոխխոսնակն ասում է, որ իրենք իրագործելու են խորհրդարանական ընտրություններում հասարակությանն առաջարկած ծրագիրը: «Մենք այդ ծրագրով հասել ենք ժողովրդի վստահությանը և այդ ծրագիրն էլ կյանքի ենք կոչելու խորհրդարանում», -ասում է Էդուարդ Շարմազանովը:

«Օրինաց երկիր» խմբակցությունը, ինչպես վստահեցնում է խմբակցության ղեկավար Հեղինե Բիշարյանը, աշխատելու է «շատ ակտիվ, ինչպես նախկին խորհրդարանում»: Ասում է, թե նախորդ գումարման խորհրդարանում 200-ից ավելի օրենքներ են հեղինակել ու խոստանում շարունակել նույն ոչով: Խորհրդարանի աշխատանքների մեկնարկային նստաշրջանում «Օրինաց երկիր»-ը առաջնահերթությունը տալու է ավանդների վերադարձման շարունակականության, կրթության և առողջապահության համակարգի մատչելիությունը ապահովման հարցերին: «Բայց մեր կողմից բարձրացվելիք հարցերը բավական շատ են», -շտապում է նկատել ՕԵԿ-ական պատգամավորը:

Պասիվ չի լինի նաև «Բարգավաճ Հայաստան» խմբակցությունը: Ավելին, բացի Հայաստանի խորհրդարանից, այս խմբակցության անդամները օգտագործելու են նաև միջազգային խորհրդարանների հարթակները. ԲՀ խմբակցության քարտուղար Նաիրա Զոհրաբյանն է վստահեցնում: «Արդեն իսկ մեր փորձագետներին տրված է հնարավորություն մեր պատգամավորների հետ միասին աշխատել նախագծերի վրա, որոնք մենք սեպտեմբերյան նստաշրջանում կներակայացնենք խորհրդարանին», -ասում է Նաիրա Զոհրաբյանը` ընդգծելով, որ դրանք առնչվում են տնտեսական, գյուղատնտեսական, մշակութային ոլորտներին: ՀԱԿ-ի նախաձեռնելիք «իմփիչմենթ»-ի գործընթացին միանալ «Բարգավաճ Հայաստան» խմբակցությունը չի պատրաստվում: «Մենք մեր առանձին քաղաքական գիծն ունենք: «Բարգավաճ Հայաստան»-ը արդեն հայտարարել է, որ ինքը գործելու է կառուցողական դաշտում», -ընդգծում է տիկին Զոհրաբյանը:

Խորհրդարանում ակտիվ է աշխատելու նաև «Ժառանգություն» խմբակցությունը, խոստանում է խմբակցության ղեկավար Ռուբեն Հակոբյանը: Ճիշտ է առայժմ չեն հստակեցրել խորհրդարանում աշխատանքային ծրագիրը, բայց վստահ են, որ գործելու են «ընդդիմադիր դաշտում»: «Թե ինչ ծրագրեր կներկայացնենք, բնականաբար ժամանակ ունենք, այդ ծրագրերը կճշտենք: Միանշանակ է, որ մենք գործելու ենք ընդդիմադիր դաշտում: Այս ընթացքը բավականին ակտիվ է լինելու, նկատի ունենալով այն, որ առջևում նախագահական ընտրություններ են: Բնականաբար մեր գործողությունները, մեր գործունեությունը կհամապատասխանեցնենք, առկա քաղաքական իրավիճակին ընդդիմադիր դաշտում», -ասում է Ռուբեն Հակոբյանը: Հաշվի առնելով այն, որ «Ժառանգություն»-ը գործելու է «ընդդիմադիր դաշտում», պարոն Հակոբյանից հետաքրքրվեցինք` հնարավո՞ր է միանան խորհրդարանական մյուս ընդդիմությանը և «իմփիչմենթի» հարց բարձրացնեն: «Ես ձեզ խորհուրդ կտամ` դուք մեզ ոչ մեկին մի ցիտեք, թե ով, ինչ է ասում: Մենք առանձին քաղաքական ուժ ենք, ինչ որոշենք, այն էլ կանենք», -կոշտ պատասխանեց Ռուբեն Հակոբյանը:

Այս պահի դրությամբ ոչինչ հայտնի չէ ԱԺ Դաշնակցություն խմբակցության գործողություններում: Դաշնակցություն խմբակցության անդամ Արծվիկ Մինասյանն ասում է, որ խորհրդարանում իրենց գործունեության ծրագիրը դեռ նոր պետք է քննարկեն:

Բայց մինչ աշնանային նստաշրջանի աշխատանքների մեկնարկը, առաջիկա օրերի ընթացքում սպասվում է կառավարության գործունեության ծրագրի քննարկումը: Քննարկմանը ներկա են լինելու խորհրդարանի բոլոր 6 խմբակցությունները: