Ձեր վստահելի աղբյուրը

Ադրբեջանն ուզում է ցույց տալ, որ էական դեր ունի տարածաշրջանում և նման դիրքով հույս ունի Արևմուքից զիջումներ կորզել։ Նման կարծիք այսօր ասուլիսի ժամանակ հայտնեց պատմական գիտությունների թեկնածու Էդգար Հովհաննիսյանը:

Ըստ բանախոսի` Ադրբեջանը ձգտում է շեղել Արևմուտքի ուշադրությունը երկրում մարդու իրավունքների ահագնացող խախտումներից, ինչպես նաև ապահովել Ալիևյան գերդաստանի՝ իշխանության ժառանագականության շարունակականությունը: «Արևմուտքը տուրք է տալիս այս ամենին հիմնականում ոչ թե խաղաղության պահպանման, այլ նավթային շահերի համար», - ասաց նա:

Պատմաբանի կարծիքով` Ադրբեջանի սպառազինումը պայմանավորված է ոչ միայն Արցախյան հիմնահարցի չլուծված լինելու գործոնով: «Ադրբեջանը բազմաթիվ խնդիրներ ունի գրեթե բոլոր իր հարևանների հետ. ոչ միայն Հայաստանի ու Արցախի, այլև Իրանի, Վրաստանի, Թուրքմենստանի և նույնիսկ Ռուսաստանի հետ, ուստի խնդրի ռազմական լուծումը նրան չի կարող ձեռնտու լինել»,-նշեց նա, վստահություն հայտնելով, որ թեև պատերազմը չի ավարտվել, բայց ակտիվ ռազմական գործողություններ չեն լինի, քանի որ «պատերազմ սկսում են, այլ ոչ թե ցուցադրական ելույթներ անում»։

Անդրադառնալով Հայաստանի ու Արցախի սահմաններում ադրբեջանական զինուժի ակտիվացման վերջին դեպքերին, Է. Հովհաննիսյանը նշեց, որ կապում է դրանք ԱՄՆ պետքարտուղար Հ.Քլինթոնի և ԵԱՀԿ գործող նախագահ Է.Գիլմորի այցերին: Բանախոսի կարծիքով, ակնհայտ է, որ ներկայումս Արևմուտքի հետաքրքրվածությունն այդ խնդրի նկատմամբ ավելի է մեծացել։ Ըստ բանախոսի` նման եզրակացությունների համար հիմք է հանդիսանում այն, որ այս երկու բարձրաստիճան պաշտոնյաների խոսքում հիմնական շեշտը դրվում էր ղարաբաղյան խնդրի վրա։

«Նախ` Քլինթոնի այցը, որի առանցքը դարձավ ղարաբաղյան հարցի քննարկման խնդիրը, ապա` Գիլմորինը, ով հայտարարեց, որ իր այցի հիմնական հարցը Ղարաբաղի խնդիրն է և մի շարք ուշագրավ հայտարարություններով հանդես եկավ. հայտարարեց, որ հարցն ունի խաղաղ լուծում, դա նաև Քլինթոնն ասաց, նաև` որ պետք է մեխանիզմներ գտնվեն, որպեսզի հետաքննություն իրականացվի սահմանային խախտումների նկատմամբ, այսինքն` խոսվում է մեղավորներին պատժելու մասին», - ասաց նա:

Բանախոսը նշեց, որ այնքան էլ լավատես չէ այն առումով, որ հնարավոր կլինի գտնել այդ մեխանիզմները, որովհետև «ՄԱԿ-ի անվտանգության խորհրդի անդամ Ադրբեջանը բազմիցս սպառնալիք է հանդիսացել տարածաշրջանային անվտանգությանը»: