Ձեր վստահելի աղբյուրը

Վերնիսաժում «Արմյանսկի տեռորիզմ»-ը վաճառելու և ադրբեջանական քարոզչություն անելու մեղադրանքով 4 տարվա ազատազրկման դատապարտված Սպարտակ Ակոջյանի պաշտպան Էդվարդ Չինարյանը բողոքարկել է Կենտրոն և Նորք Մարաշ վարչական շրջանների ընդհանուր իրավասության դատարանի վճիռը Վերաքննիչ դատարանում է: Գործն արդեն մեկ անգամ լսվել է, իսկ երկրորդ նիստը տեղի է ունենալու հունիսի 25-ին: Այդ մասին Panorama.am-ի թղթակցի հետ զրույցում տեղեկացրեց ինքը՝ փաստաբան Չինարյանը:

Panorama.am-ը ավելի վաղ անդրադարձել էր այս գործին և տեղեկացրել, որ դատաքննությամբ պարզվել էր, որ Սպարտակ Ակոջյանը Թբիլիսիում գտնվող Ադրբեջանի դեսպանատան հարակից տարածքում գործով չպարզված անձից ձեռք է բերել ադրբեջանական` հակահայկական քարոզչական ձեռնարկ հանդիսացող` հայ ժողովրդի և Հայաստանի Հանրապետության վերաբերյալ զրպարտիչ տեղեկատվություն պարունակող, «Արմյանսկի տեռորիզմ» վերնագրով, 1991 թվականին ռուսերենով հրատարակված 10 հատ ֆոտոալբոմ, որոնցում Լեռնային Ղարաբաղի բնակչության ինքնապաշտպանական գործողությունների առանձին դրվագներ ներկայացված են որպես «խաղաղ ադրբեջանցիների» նկատմամբ հայկական «հանցավոր խմբավորումների» կողմից իրականացված ահաբեկչական գործողություններ, իսկ 1970-1980 թվականների ընթացքում տարբեր երկրներում թուրք դիվանագետների և ներկայացուցչությունների նկատմամբ իրականացված ահաբեկչական գործողությունները վերագրված են «հայկական ահաբեկչական ուժերին»:

2011թ. ապրիլի 21-ին ամբաստանյալ Ս. Ակոջյանը այդ ֆոտոալբոմներից 7 հատը Վրաստանից իր հետ տեղափոխել է Հայաստան և ապրիլի 23-ին փորձել է դրանք վաճառել Երևանի «Վերնիսաժ» կոչվող տոնավաճառի տարածքում` գրքավաճառների հատվածում, որի ընթացքում գրքավաճառների և այցելուների ներկայությամբ հայտարարություններ է արել «հայկական ահաբեկչության» առկայության և այն հիմնավորող իր կողմից վաճառվող ֆոտոալբոմում արտացոլված «փաստերի» վերաբերյալ` դրանց բովանդակությունը բացատրելով իրեն մոտեցող ու ֆոտոալբոմով հետաքրքրվող անձանց:

Դատարանում Սպարտակ Ակոջյանն իրեն առաջադրված մեղադրանքում մեղավոր չէր ճանաչել` պատճառաբանելով, որ հայ ժողովրդի ազգային արժանապատվությունը նվաստացնելուն ուղղված գործողություններ չի կատարել, այլ ուղղակի ցանկացել է գիրք վաճառել:

Դատարանի որոշմամբ, Ակոջյանը ապրիլի 25-ին մեղավոր էր ճանաչվել ՀՀ քրեական օրենսգրքի 226-րդ հոդվածի 2-րդ մասի 1-ին կետի հատկանիշներով՝ «Ազգային, ռասայական կամ կրոնական թշնամանք հարուցելուն, ռասայական գերազանցությանը կամ ազգային արժանապատվությունը նվաստացնելուն ուղղված գործողությունները հրապարակայնորեն կատարելը» և դատապարտվել 4 տարի ազատազրկման:

Փաստաբանը պնդում է, որ իր պաշտպանյալի պատիժը «շատ խիստ է»: «Ակոջյանը այն չի արել, ինչ մեղադրանք առաջադրված է նրա նկատմամբ»,-panorama.am-ին ասաց փաստաբանը` նկատելով, որ մնացած գնահատականների մասին կարող ենք լսել դատական նիստի ընթացքում: