Ձեր վստահելի աղբյուրը

Երևանում այսօր մեկնարկեց «Smart Country-թվային լուծումներ ինովացիոն տնտեսության համար» խորագիրը կրող 5-րդ ամենամյա ԴիջիԹեք Բիզնես ֆորումը, որին մասնակցում էին ՀՀ վարչապետ Տիգրան Սարգսյանը, էկոնոմիկայի նախարար Տիգրան Դավթյանը, Ինֆորմացիոն Տեխնոլոգիաների Ձեռնարկությունների Միության գործադիր տնօրեն Կարեն Վարդանյանը, «ԱրմենՏել» ընկերության գլխավոր տնօրեն Իգոր Կլիմկոն:

Տիգրան Սարգսյանը ֆորումի բացմանը նշեց, որ այս ավանդական ֆորումն արդեն իր ուրույն տեղն է զբաղեցնում տեղեկատվական տեխնոլոգիաների զարգացման ոլորտում, քանի որ բացառիկ հարթակ է ստեղծում, որում հանդիպում են բնագավառի գիտակները` մի կողմից հանրությանը ներկայացնելով հաշվետվություն իրենց ձեռքբերումների մասին, մյուս կողմից ծանոթանում են գործընկերների հաջողությունների հետ, կազմակերպում փորձի փոխանակում:

«Ցանկանում եմ մեր երկրի համար արձանագրել այն կարևորագույն փաստը, այն է, որ մեր ժողովրդական տնտեսությունը ձեռք է բերում իր համար բնական և բնականոն տեսք: Տարածշրջանում երկարաժամկետ առումով Հայաստանն այլընտրանք չունի քան ձևավորել գիտալիքահեն տնտեսություն, որի համար մեկ ռեսուրսը ինտելեկտն է, կրթված մարդիկ, և ՏՏ-ի արագ զարգացումը դրա վառ ապացույցն է»,- նշեց վարչապետը:

Անդրադառնալով Համաշխարհային բանկի վերջին զեկույցին, որտեղ նշված է, որ Հայաստանը մրցունակության առումով վեց քայլ առաջ է անցել, նշեց, որ կարևոր փաստ է նաև, որ մեր երկիրը համաշխարհային ֆինանսատնտեսական ճգնաժամից դուրս է եկել ուժեղացած:

«Վերլուծաբաներն ի նկատի ունեին այն, որ մեր տնտեսությունը ավելի դիվերսիֆիկացված է քան 2008-ին, և այդ առումով նրա դիմադրողականությունն էապես բարձրացել է: Կարող ենք արձանագրել, որ այդ գործում իր կարևոր դերակատարությունն ունի նաև ՏՏ ոլորտը, որը նույնիսկ 2009 թվականին, երբ մենք ունեցանք լրջագույն խնդիր շինարարության ոլորտում, որտեղ արձանագրվեց 42 տոկոսանոց անկում, ՏՏ բնագավառում այդ տարի արձանագրեցինք 27 տոկոսանոց աճ»,- ընդգծեց Տ.Սարգսյանը և հավելեց, որ այդ աճի տեմպերը վերջին 5 տարիների ընթացքում եղել են կայուն:

Արդյունքում, ըստ նրա, ՏՏ ոլորտում այսօր զբաղվածների քանակը հավասար է հանքահումքային ոլորտում զբաղվածների քանակին, իսկ աշխատավարձերի մակարդակը ավելի բարձր է: Տ.Սարգսյանի խոսքերով` սա կարևոր հանգամանք է, քանի որ տեղեկատվական տեխնոլոգիաները բարձրացնում են արտադրողականությունը տնտեսության բոլոր ճյուղերում, ինչը բնականաբար ենթադրում է, որ ունենալու ենք ավելի դիվերսիֆիկացված հզոր տնտսություն, որը պետք է պատրաստ լինի նոր մարտահրավերների:

Տ.Սարգսյանը կարևորեց նաև ֆորումի մասանկիցների և այցելուների քանակի աճը: «Լսելով նաև ոլորտի ամփոփ ցուցանիշները, պատկերացում ենք կազմում, թե քանի նոր ընկերություններ են ստեղծվել այս ոլորտում: Այդ նորաստեղծ ընկերությունների զարգացման ուղին կարողանում ենք այս տարիների ընթացքում տեսնել` հասկանալու համար, թե ինչ հարաբերական առավելություններ ունի այս ոլորտը և ինչ խոչընդոտներ դեռևս կան»,- ասաց նա:

Նշվեց նաև, որ վարչապետի գլխավորությամբ գործում է ՏՏ զարգացման խորհուրդ և ոլորտի ներկայացուցիչները հնարավորություն ունեն կառավարության անդամներին ներկայացնել հիմնական խնդիրները, որոնք լուծման կարիք ունեն: Գործադիրի ղեկավարի խոսքերով` իրենք բոլոր ջանքերը գործադրում են այդ խնդիրներն օպերատիվորեն լուծելու համար: «Կարծում եմ նաև այս երկխոսությամբ է պայմանավորված այն հանգամանքը, որ այս ոլորտը ՀՀ-ում զարգանում է առաջանցիկ տեմպերով՝ համեմատ մեր բոլոր հարևանների»,- շեշտեց Տ.Սարգսյանը:

Վարչապետը նաև տեղեկացրեց, որ եթե 5 տարի առաջ ինտերնետ սպառողների քանակով, ինտերնետի գնով, հասանելիությամբ, տարածվածությամբ և ենթակառուցվածքներով զիջում էինք մեր հարևան պետություններին, ապա այսօր այս բոլոր ցուցանիշներով Հայաստանը տարածաշրջանում առաջինն է: «Սա կարևոր նվաճում է Հայաստանի տնտեսության համար»,- ասաց Տ.Սարգսյանը:

Նշենք, որ Դիջիտեք բիզնես ֆորումի կազմակերպիչն է Ինֆորմացիոն Տեխնոլոգիաների Ձեռնարկությունների Միությունը (ԻՏՁՄ), գլխավոր գործընկերն է «ԱրմենՏել» ընկերությունը (ապրանքանիշը Beeline): Միջոցառումն անց է կացվում ՀՀ վարչապետի բարձր հովանու ներքո և ԱՄՆ Միջազգային զարգացման գործակալության Ձեռնարկությունների զարգացման և շուկայի մրցունակության (USAID EDMC) ծրագրի աջակցությամբ: