Ձեր վստահելի աղբյուրը

2010 և 2011թ-ին Հայաստանի մանկատներն ունեցել են 32-ական շրջանավարտներ, 2012թ-ին` 19 շրջանավարտ: Այս մասին Panorama.am-ին հայտնում են ՀՀ Աշխատանքի և սոցիալական հարցերի նախարարությունից, ուր հարցում էինք ուղղել` քանի՞ շրջանավարտ են ունեցել հայաստանյան մանկատները վերջին երկու-երեք տարում, արդյոք նախարարությունն ունի վիճակագրություն այն մասին, թե որտե՞ղ են շրջանավարտներն այսօր, ինչո՞վ են զբաղվում, ովքե՞ր են, որ բարձրագույն կրթություն են ստանում և արդյոք տեղավորվել են աշխատանքի:

Նախարարությունը թվային վիճակարությունը ներկայացրել է չորս մանկատան մասով` «Զատիկի» (որն արդեն ցերեկային խնամքի կենտրոն է), Գավառի, Վանաձորի և Գյումրիի:

Շրջանավարտներ-շահառուներ. Ո՞վ է ստացել բնակարան
1991-2012թթ-ին «Զատիկ» մանկատունն ունեցել է 157 շրջանավարտ, Գավառի մանկատունը 230, Վանաձորի մանկատունը` 81, Գյումրին 29-ը, իսկ «ՍՈՍ»-ը ընդամենը 1 շրջանավարտ:

Սակայն մանկատան ոչ բոլոր շրջանավարտներն են, որ շահառու են հանդիսանում և հնարավորություն ունեն բնակարան ստանալ պետությունից: Այդպես, 1991-2012թթ. ընկած ժամանակահատվածում «Զատիկի» 157 շրջանավարտներից միայն 142-ն են, որ շահառու են հանդիսանում ` 47-ն արդեն ստացել են, իսկ 95-ը դեռ սպասում են իրենց հերթին (բնակարանին):

Նույն ժամանակահատվածում Գավառի 230 շրջանավարտներից միայն 187-ն են շահառու, որից 97-ը ստացել են, 90-ը դեռ սպասում են:
Վանաձորի մանկատան 81 շրջանավարտներից միայն 74-ն են շահառու հանդիսանում` 11-ը ստացել են, 63-ը դեռ սպասում են:

Գյումրիի մանկատան 29 շրջանավարտներից միայն 7-ն են բնակարան ստացել, 22-ը հերթի են: Եվ միայն «ՍՈՍ»-ն է, որ ունեցել է մեկ շրջանավարտ-շահառու և նա ստացել է բնակարան:

Նախարարությունը տեղեկացնում է նաև, որ մանկատները 2013թ-ին 20 շրջանավարտ կունենան և նույն չափով պոտենցիալ շահառուներ:

Այլ կերպ ասած, այսօրվա դրությամբ իրենց բնակարանին են սպասում 270 շահառուներ:

Ինչ վերաբերում է Մարալիկի սոցիալական տան շահագործմանը, որի գործընթացն արդեն շուտով մի տարի է, ինչ ձգձգվում է, ապա Panorama.am-ին տեղեկացնում են, որ շահագործման արդյունքում Գյումրիի 22 շահառուներ կտեղափոխվեն բնակարան ստացածների շարք և կմնա բնակարանի սպասող ընդամենը 248 շահառու:

Իսկ մյուսնե՞րը. Ի՞նչ կարգավիճակում են բնակարան չստացած շահառուները

Աշխատանքի և սոցիալական հարցերի նախարարությունը արձագանքել է նաև մեր այն հարցին, թե արդյոք իրենք տեղյակ են, թե ինչո՞վ են զբաղվում շրջանավարտներն այսօր, կարճ ասած` ի՞նչ կարգավիճակ ունեն նրանք:

Ըստ այդմ, «Աջակցություն և խորհրդատվություն մանկատան շրջանավարտներին» ծրագրի 2003 - 2012թթ. բնակարան չստացած շահառուների կարգավիճակի քանակական պատկերը հետևյալն է. ամուսնացած են շրջանավարտներից 73-ը, ամուսնալուծված` 16-ը: Մանկատան շրջանավարտների մեծ մասն ունի երկու երեխա` 47-ը և միայն 4-ն են, որ ունեն 3 և ավելի երեխա:

Շրջանավարտներից միայն 41-ն են, որ ունեն մշտական բնակության վայր` բնակվում են ծնողի, ազգականի, ամուսնու կամ կնոջ ծնողների հետ: Մինչդեռ 96-ը բնակվում են վարձով:

Ծայրահեղ անհանգստացնող է այն շրջանավարտների թիվը, որոնք վարում են անօթևան կյանք (բնակվում են ժամանակավոր վայրերում, աշխատավայրում կամ հանրակացարանում)` այդպիսիք 85-ն են, մինչդեռ ևս 49-ին հանգիստ կարելի է դասել անօթևանի կարգավիճակին, քանի որ 49-ից 30-ը շարունակում են ապրել մանկատներում (տեղ չգնալու պատճառով) և 19-ն էլ տարբեր հասարակական կազմակերպություններում:

18 շրջանավարտ այսօրվա դրությամբ, ժամկետային զինծառայող են, ևս 5-ը` պայմանագրային: Մշտական աշխատանքով ապահովված է ընդամենը 17 շրջանավարտ, մինչդեռ 101-ը աշխատում են ժամանակավոր սկզբունքով, իսկ 104-ն էլ առհասարակ գործազուրկ են:

Ունենք նաև արտագնա աշխատանքի մեկնած մանկատան 19 շրջանավարտ, մեկը կալանավայրում է, իսկ ևս 6-ի մասին որևէ տեղեկություն նախարարությունը չունի: