Ձեր վստահելի աղբյուրը

Panorama.am-ի զրուցակից «Բարգավաճ Հայաստան» կուսակցության մամլո խոսնակ Տիգրան Ուրիխանյանը ներկայացրեց այն փաստարկները, որոնց համադրումը ենթադրել է տալիս, որ ԱԺ վաղվա արտահերթ նիստում ԲՀԿ խմբակցությունը դեմ կքվեարկի կառավարության գործունեության ներկայացվելիք ծրագրին:

-Պարոն Ուրիխանյան, այսօր որոշո՞ւմ եք կայացրել դեմ քվեարկել վաղը ներկայացվելիք Կառավարության գործունեության ծրագրին:
-Ըստ էության որոշում չենք կայացրել, այլ հնչեցրել ենք կոնկրետ խնդիրներ և եզրակացությունն, ըստ իս, բոլորի մոտ արդեն հասունացել է:

-Այլ կերպ ասած` ինչպես գրում են ԶԼՄ-ները` վաղը ԲՀԿ-ն դեմ կքվեարկի, որովհետև դժվար թե մեկ օրում Ձեր հնչեցրած խնդիրները լուծում ստանան:
-Դա ձեր եզրակացությունն էր:

-Լավ, պարոն Ուրիխանյան, այդ դեպքում խնդրում եմ ներկայացրեց, թե ի՞նչ խնդիրներ եք տեսնում այս ծրագրում:
-Առաջնայինն այն է, ինչի մասին մենք քանիցս խոսել ենք` վերապահումներ ունենք իրատեսականության հետ և այն կաբինետի, որը պետք է այն իրականացնի: 14.8 տոկոսի հասնող տնտեսական անկման քաղաքականություն վարած կառավարությունը, հատկապես կառավարության ղեկավարը վերանշանակվել է, ինչի հետ կապված եզրակացությունները թողնում եմ ընթերցողներին:
Հաջորդիվ. այն ռիսկերը, որ բերված են ծրագրի վերջում վերափոխում եմ ժողովրդական խոսքի ու ստացվում է` «եթե այսպես լինի, ապա ծրագիրը չի իրականացվի», այսինքն` բերված են այնպիսի ռիսկեր, որ միանշանակ հենց այդպես էլ լինելու է. խոսքը վերաբերում է դոլարի փոխարժեքին, գունավոր մետաղներին, տրանսֆերտներին, արտաքին ազդեցությանը և այլն: Ասել է թե` ամբողջ այդ ծրագիրը որևէ բան նշանակել չի կարող, քանի որ վերջում կառավարությունն ասում է, որ եթե եղավ այսպես ( իսկ այդպես լինելու է և սա բացառապես բոլոր փորձագետների գնահատականն է): Եվ եթե դա այդպես է, ապա այդ ծրագիրը առ ոչինչ է հենց այսօր, ամենասկզբից:

Կոնկրետացնեմ. Կրթություն, արտաքին քաղաքականություն, տնտեսության զարգացում, երիտասարդական քաղաքականություն, էներգետիկ անվտանգություն` բոլոր ոլորտները, որոնց հետ կապված մենք խնդիրներ ենք տեսնում թվարկելը նույնիսկ անիմաստ է: Վաղը այս ամենի հետ կապված խմբակցության անդամները հանդես կգան ելույթներով… Գիտեք ինչ կա՞, միգուցե և վաղվա բացատրությունները տեսականորեն և պատասխանները ինչ-որ ազդեցություն ունենան մեր եզրակացության վրա: Բայց ինչպես հենց Դուք ասացիք` տեսականորեն սա կարելի է ենթադրել, բայց գործնականում….

-Ծրագիրը ներկայացնելիս նշվում էր, որ այն կապահովի տարեկան 5-7 տոկոս տնտեսական աճ, աղքատության ցուցանիշների նվազում և այլն: Այս ամենին, փաստորեն, չեք հավատում:
-Եվ սա ասում է այն կառավարությունը, որը նմանատիպ ծրագիր էր ներկայացրել … Գիտեք, որ կարդում ես ծրագիրը, այնպիսի պահեր կան, երբ թվում է, որ նախորդ ծրագրից որոշ բաներ «copy-paste» են արվել, այդպիսի հատվածներ կան: Ինչևէ, տնտեսական աճի մասին ասում է այն կառավարությունը, որը 15 տոկոսի հասնող տնտեսական անկո՞ւմ է ապահովել մեր երկրի համար: Ինչպե՞ս հավատաս:

-Այդ դեպքում գնահատեք, խնդրում եմ, նախորդ կառավարության գործունեության ծրագիրը, որտեղ ԲՀԿ-ն ուներ նախարարական պորտֆելներ:
-Տեղի է ունեցել տնտեսական անկում և ոչ թե աճ: Իսկ ԲՀԿ-ն կառավարության մաս էր շա~տ փոքր պատասխանատվության տիրույթում, որովհետև եթե վերցնենք կառավարության մաս կազմող գերատեսչությունները և եթե հաշվենք քանի նախարարություն կար, այսպես ասենք, «Բարգավաճ Հայաստանի» ենթակայության տակ, ընդ որում հաշվի առնելով, որ մեկ նախարար ունենալ ու սրան զուգահեռ բազմաթիվ այլ կուսակցական պատկանելիություն ունեցող տեղակալներ և այլն, ինչը նշանակում է, որ ԲՀԿ-ն ամբողջությամբ չէր ստանձնել պատասխանատվությունը… Մի խոսքով` նախարարություններ կան, որ ԲՀԿ-ական նախարար ունենալով փայլուն արդյունք են ցույց տվել….

-Օրինակ ո՞րը:
- Այդ հարցը կարող եք տալ վարչապետին, ով երեկ այդ մասին խոսում էր… Օրինակ` Սպորտի և երիտասարդության նախարարությունը :

-Բայց Ձեր նշած նախարարությունը առանցքային չէ:
-Առանցքային էր քաղաքական մեծամասնություն կազմող կուսակցության ներկայացուցիչների մասնակցությունը մի քանի անգամ գերակշռող մասով և այսքանով, կարծում եմ, ամեն ինչ ասված է (հավանաբար` խոսքը ՀՀԿ-ական փոխնախարարների մասին է -Լ.Խ.): Մի փոքր էլ չակերտներն ու փակագծերը բացելով ասեմ` անշուշտ մեզ բավարար չի էլ եղել մասնակի, փոքրիկ այս մասնակցությունը ու դրա հետ մեկտեղ կիսել ամբողջական պատասխանատվությունը «պռավալների» համար:

-Պարոն Ուրիխանյան, իսկ չունեք այնպիսի մտայնություն, որ վաղը Ձեզ կմեղադրեն նրանում, որ դեմ եք կառավարության ծրագրին, քանի որ ԲՀԿ-ն այս կառավարման ձևավորմանը մաս չկազմեց:
-«Բարգավաճ Հայաստան» կուսակցությունը դեմ է եղել և դրա համար էլ հրաժարվել է նախարարական պորտֆելներից և սա ոչ թե մեղադրանք է, այլ ուղղակի կապ մեր որոշումների ու քայլերի: Մենք դեմ ենք եղել, անհամաձայնություն ենք ունեցել և դրա համար էլ հրաժարվել ենք համատեղ կառավարման մեջ մտնել: