Ձեր վստահելի աղբյուրը

«Գայան, հլը իջի բուֆետ, կմեռնես… տենց բան կյանքումդ տեսած չես լինի` սաղ մինիստրները մի սեղանին նստած հաց են ուտում… Իջի, ախչի, բան չի մնա ուտես»,- խորհրդարանի միջանցքում`  աշխատասենյակներից մեկի դռնից գլուխը ներս մտցրած ինչ-որ կին գործընկերուհուն այսպես էր հրահրում իջնել ԱԺ ճաշարան ու ականատեսը լինել հիրավի պատմական այդ իրադարձությանը:

Եվ իսկապես` նման տեսարան ԱԺ ճաշարանում վաղուց չէր եղել, քանի որ նախարարները, եթե գալիս են խորհրդարան, ապա կոնկրետ ինչ-որ հարցի քննարկման շրջանակում և կամ ԱԺ-Կառավարություն ավանդական հարցուպատասխանի ժամանակ. թե մեկի, թե առավել ևս երկրորդի դեպքում նրանք ժամանակ (հասկանալ նաև ցանկություն) չեն ունենում համտեսել ճաշարանային ուտեստները:

Իսկ այսօր, երբ կառավարությունը ողջ կազմով առավոտյան ժամը 10-ից խորհրդարանում թերևս պարապ նստած էր, քանի որ այդ ժամից սկսած մինչ այս պահը միայն վարչապետ Տիգրան Սարգսյանն է իշխում ամբիոնում (կառավարության հնգամյա գործունեության ծրագիրը ներկայացնելուց հետո նրան բառիս բուն իմաստով հարցախեղդ էին անում ընդդիմության ու այլընտրանք հանդիսացող ԲՀԿ անդամները), նախարարներին այլ բան չէր մնում, քան օգտվել ԱԺ ճաշարանից… կամ էլ սոված մնալ:

Եվ այսպես` այսօր ԱԺ բուֆետում անշլագ էր: Գրեթե բոլոր խմբակցություններն ամբողջական կազմով պարբերաբար մտնում ու դուրս էին գալիս բուֆետ` փորձում ազատ սեղան գտնել, հնարավորինս նստել ոչ «ոտի տակ», քանի որ, ինչպես նկատեցինք ԲՀԿ-ական պատգամավորները` Վարդան Օսկանյանը, Գուրգեն Արսենյանը, ինչպես նաև ՀԱԿ-ական Նիկոլ Փաշինյանը ու էլի ընդդիմադիր պատգամավորներ հաց ուտելուն զուգահեռ քննարկում էին, թե ինչ են ասելու վարչապետին ընդմիջումից հետո շարունակվելիք նիստում ու հատկապես` ինչ պատասխան են նրանից ակնկալում:

Ի դեպ նշենք, որ երբ նորընտիր ԱԺ պատգամավորները առաջին օրը ներկայացան ԱԺ և դեռևս աշխատասենյակները նրանց բաշխված չէին, հենց ճաշարանը դարձավ այն վայրը, որտեղ հստակ երևաց, թե քանի թևի է բաժանված մասնավորապես «Բարգավաճ Հայաստանը»:

Այդպես, Վարդան Օսկանյանն ու Գուրգեն Արսենյանը թե այդ օրը, թե նաև այսօր անբաժան էին իրարից ու քիթ-քթի տված ճաշարանի սեղանի շուրջ անդադար ինչ-որ բաներ քննարկում, իսկ երիտասարդ թևն էլ `Վահան Բաբայանը, Վահե Էնֆիաջյանը մի քանի սեղան այն կողմ էին միասին:

Անշուշտ այսօրվա ամենահետաքրքիր ու զարմանալի իրադարձությունը նախարարների ներկայությունն էր բուֆետում` միանգամից տասներկու նախարար նստել էր մի սեղանի շուրջ: Եվ միայն ԲՀԿ….ներողություն` անկուսակցական Սպորտի և երիտասարդության նորանշանակ նախարար Հրաչյա Ռոստոմյանն էր, որ այդ սեղանից հեռու էր, ԲՀԿ-ական ընկերների շրջապատում:

Նախարարներն այնպիսի ներկայություն էին ապահովել, որից հետո բուֆետի ողջ ճաշացանկը դատարկվեց ու շատերը, նույնիսկ ՀՀԿ խմբակցության ղեկավար Գալուստ Սահակյանին ուղեկցող որոշ պատգամավորներ, որոնք բավականին ուշ իջան ճաշարան, այդ ճաշացանկից ընտրելու իրավունքից ուղղակի զրկվեցին ու ստիպված եղան բավարարվել նրանով, ինչ մնացել էր: Իսկ ավելի կոնկրետ` գրեթե ոչինչ էլ չէր մնացել: Որոշ ժամանակ անց էլ ուղղակի խուճապ սկսվեց բուֆետի դատարկ «դախլաների» դիմաց հերթի կանգնած կիսասոված պատգամավորների մոտ և «ի՞նչ ուտել» հարցը միանգամից հետ մղեց բոլոր այլ հարցերը: Խուճապը կանխելու նպատակով խոհանոցից խոստացան փլավ շուտ սարքել-բերել, սակայն այդ շուտը ոնց էլ լիներ մի ժամ կտևեր և որոշ օրենսդիրներ որոշում կայացրեցին ճաշարան վերադառնալ իրենց փլավի ետևից հաջորդ ընդմիջմանը ` «Մեկ ա էսօր ստեղ ենք» սկզբունքով:

Բացի ճաշացանկից դատարկվել էր նաև սեղանի պարագաների համար հատկացված տարածքը ու լրագրողները պատգամավորների հետ միասին ստիպված էին երկար սպասել, մինչ այս պարագայում ամենաերջանիկներին գոնե պատառաքաղ կտրամադրվի. ոմանք նույնիսկ, ժամանակ սղության պատճառով, այդքան համբերություն չունեցան ու ստիպված էին պիցցան համտեսել գդալով:

Ազգային Ժողովի ճաշարանը միշտ եղել է այն վայրը, որը թե պատգամավորները, թե լրագրողները համարել են դեպքերի, մարդկանց ու իրադարձությունների էպիկենտրոն. այստեղ պետք չէ ընդդիմություն կամ իշխանություն խաղալ ու անգամ, եթե հինգ րոպե առաջ նիստերի դահլիճում իրար հետ թեժ բանավեճ էր` բուֆետում արդեն ընկերովի հաց են կիսում: Այստեղ կարելի է տեսնել, թե որ պատգամավորն է գծուծ ու «գրեչկայով» փլավ պատվիրելուց հետո անգամ 20 դրամանոց մանրին է սպասում ու վերցնում, կամ էլ տեսնել, թե ինչպես է Սամվել Ալեքսանյանը (լֆիկ Սամոն), ով հազվադեպ է իջնում ճաշարան 10-20 հազարանոցներ շռայլում մեկ գավաթ սուրճ ըմպելու դիմաց… մի խոսքով` բուֆետը Ազգային Ժողովի թերևս ամենակարևոր վայրն է ու իրադարձությունների էպիկենտրոնը: