Ձեր վստահելի աղբյուրը

Շինարար Վարուժան Չիթչյանը 2008 թվականից ժառանգական գույքը բաժանելու համար դատական քաշքշուկների մեջ է և արդեն հասցրել է տիրապետել հայաստանյան օրենսդրությանը, անգամ Վճռաբեկ դատարանի նախադեպային որոշումներին: Երեք եղբայրներ իրենք իրար մեջ չեն կարողացել կիսել ժառանգություն հասած սեփական տունը և փորձել են հարցը լուծել դատական կարգով: Սակայն դատական երկարատև քաշքշուքի ընթացքում եղբայրներից մեկը` շինարար Վարուժան Չիթչյանը, հայտնաբերել է, որ Հայաստանում գործում է «հսկայական փողով փորձագիտական եզրակացություն տվող փորձագետների մի ամբողջ ոհմակ»:

Panorama.am-ին ներկայացնելով խնդիրը, Վարուժան Չիթչյանն ասաց, որ բնակարանն այժմ բաժանված է եղբայրների միջև, սակայն փորձագետների սխալ եզրակացության հիման վրա, փորձում են իր մասնաբաժինը ևս վերցնել: Իսկ փորձագիտական եզրակացություն տվել է, որքան էլ տարօրինակ է, գործունեության լիցենզիա չունեցող «Էքսպերտ լաբորատորիա» ՍՊԸ-ն: «Այս լաբորատորիան փորձաքննություն անցկացնելու իրավասություն չունի, քանի որ գործունեության լիցենզիա չունի», -պնդում է Չիթչյանը:

Լաբորատորիայի գործունեության լիցենզիան դադարեցվել է ՀՀ կառավարությանն առընթեր անշարժ գույքի կադաստրի պետական կոմիտեի նախկին նախագահ Մանուկ Վարդանյանի 2008 թվականի դեկտեմբերի 9-ի N 08-391-L հրամանով, որտեղ նշվում է, որ ««Լիցենզավորման մասին» ՀՀ օրենքի համաձայն, «Էքսպերտ լաբորատորիա» ՍՊԸ-ի «Անշարժ գույքի գնահատում» գործունեության ԱԳ N0034 լիցենզիայի ուժը կորցրած ճանաչել և դադարեցնել գործունեությունը»: «Էքսպերտ լաբորատորիա» ՍՊԸ-ի տնօրենը Լևոն Ավագյանն է, որի որդին ևս ունի անշարժ գույքի գնահատման լաբորատորիա և կոչվում է «Ավագյան Ռիելթի» ՍՊԸ, որը նույնպես, մեր զրուցակցի խոսքով, զբաղվում է «ապօրինի փորձաքննությամբ»:

Փորձագիտական եզրակացությունը տվել է նույն ՍՊԸ-ից փորձագետ ներկայացած Արման Արսենյանը, որը, ըստ Չիթչյանի, աշխատում է նաև ԳԱԱ Փորձաքննությունների ազգային բյուրոյում: Բյուրոյի լրատվական ծառայության պատասխանատու Լանա Մշեցյանը Panorama.am-ին տեղեկացրեց, որ Արման Արսենյան անունով շինարարության ոլորտի փորձագետ իսկապես, աշխատում է բյուրոյում, և նա որևէ այլ տեղ համատեղության կարգով չի աշխատում, թեպետ օրենքը չի արգելում այդ կարգով աշխատելը:

Այս փորձագետի կողմից տրված կեղծ եզրակացության փաստի առթիվ Ոստիկանության Քանաքեռ-Զեյթունի քննչական բաժնում դեռ 2010-ի նոյեմբերին հարուցվում է քրեական գործ` Քր. Օր.-ի 338 հոդվածի 1-ին մասի հատկանիշներով` «քրեական կամ քաղաքացիական գործով փորձագետի կողմից ակնհայտ կեղծ եզրակացություն տալը», որը սակայն, 2011-ի հունիսին կարճվում է հանցակազմի բացակայության պատճառաբանությամբ: Սա հաստատեց նաև Լանա Մշեցյանը: Մինչև գործը կարճելը, սակայն, Չիթչյանի խոսքով, 2011-ի փետրվարին «Էքսպերտ լաբորատորիա» ՍՊԸ-ի տնօրենը զանգել է իրեն ու սպառնացել: «Սպառնալիքով հայտարարեց, որ դադարեցնեմ իմ հարցապնդումները, այլապես ինքը գիտի իմ տան տեղը», -նշում է Չիթչյանը:
ՍՊԸ-ի տնօրենի մյուս սպառնալիքը, թե «ինչ ուզում ես արա, ոչնչի չես հասնելու», Չիթչյանին ենթադրել են տալիս, որ «ընկերության անօրինական գործողությունները հովանավորվում են»:

Հարուցված քրեական գործի կարճումը, սակայն, իր պայքարից հետ չի պահել քաղաքացուն, և նա հայցով դիմել է Ավան և Նոր Նորք վարչական շրջանի ընդհանուր իրավասության դատարան «Էքսպերտ լաբորատորիա» ՍՊ ընկերության օրենքի խախտմամբ կատարած գործողությունը ոչ իրավաչափ ճանաչելու, տրված եզրակացությունը ակնհայտ կեղծ ու առոչինչ ճանաչելու պահանջով: Դատական նիստը նշանակված է հունիսի 22-ին:

«Ո՞վ է ղեկավարում փորձագիտական եզրակացությունը բիզնես դարձրած այս փորձագետների ոհմակը», -հռետորական հարց է հնչեցնում Վարուժան Չիթչյանը և միաժամանակ նշում ենթադրյալ ղեկավարներին. «Դրանք դատախազության պաշտոնյաներ են»: