Ձեր վստահելի աղբյուրը

Կառավարության գործունեության հնգամյա ծրագրի դրույթներից մեկն ասում է հետևյալը (դժվար է այս պահին ասել ամրագրում)` «Ապահովել 5-6 տարեկան երեխաների համար նախադպրոցական կրթության առնվազն 90 տոկոսով հասանելիություն»: Այսինքն, ինչպես նախօրեին ԱԺ ամբիոնից հայտարարեց ՀՀ վարչապետ Տիգրան Սարգսյանը` կառավարությունը նպատակադրվում է հասանալի դարձնել նախադպրոցական կրթությունը:

Իսկ ի՞նչ իրավիճակ է այսօր կոնկրետ հասցեագրված այդ ոլորտում և քանի տոկոս են կազմում երեխաները, որ դուրս են մնացել նախադպրոցական կրթությունից. «Իրականում տարիներ առաջ մենք անմխիթար իրավիճակ ունեինք նախադպրոցական կրթության ոլորտում` 90-ականներին կամ մասնավորվեցին, կամ առհասարակ ավերվեցին մանկապարտեզները և արդյունքում Հայաստանի շուրջ 600 համայնքներում ուղղակի գոյություն չունեին նախադպրոցական կրթության հաստատություններ: 2008թ-ին մեկնարկեց Համաշխարհային բանկի աջակցությամբ մի ծրագիր, որի նպատակն էր ստեղծել նախակրթարաններ և որը ոչ միայն ապահովեց կրթական ծրագրեր երեխաների համար, այլև լուծեց որոշ սոցիալական ծրագրեր»,- Panorama.am-ի հետ զրույցում ասաց Կրթության և գիտության նախարար Արմեն Աշոտյանը:

Նախարարը տեղեկացրեց, որ անցած տարիների ընթացքում այդ ծրագիրն իրականացվել է հանրապետության յոթ մարզերում, այս տարի ևս երեք մարզերում կիրականացվի, իսկ արդեն հաջորդ տարի` 2013թ-ին նախարարությունը Երևանի քաղաքապետարանի հետ կանդրադառնա ծրագրին. «Ինչ վերաբերում է ցուցանիշին, ապա եթե նախկինում այն 28 տոկոս էր կազմում, այսօրվա դրությամբ շեշտակի իրավիճակը բարելավվել է և ունենք շուրջ 65 տոկոսի ծածկույթ: Բայց պետք է խոստովանեմ, որ սա էլ բավարար չէ և այն ցուցանիշը, որի մասին հայտարարեց վարչապետը` 90 տոկոսի ծածկույթը մեզ հնարավորություն կտա ապահովել հավասար մեկնարկային հնարավորություններ կրթության, հետևաբար ապագայի համար ` անկախ երեխայի բնակվայրից, ընտանիքի սոցիալական վիճակից և այլն»,-նշեց նախարարն ու ավելացրեց, որ հայտնի փաստ է` որքան լավ է երեխան սկսում կրթվել, այնքան լավ է հետո իրեն դրսևորում կրթության այլ աստիճաններում:

Հիշեցնենք, կառավարության հնգամյա գործունեության ծրագրից կրթությանը վերաբերող պարբերությունը. «21-րդ դարում մրցունակ պետություն նշանակում է կրթված հասարակություն։ Պետությունը յուրաքանչյուր քաղաքացու համար ստեղծելու է կրթության հնարավորություն` անկախ նրա սոցիալական վիճակից և տարիքից։ Ուշադրության կենտրոնում ենք պահելու կրթության որակը։ Երաշխավորված նվազագույն իննամյա կրթությունից անցում ենք կատարելու երաշխավորված անվճար տասներկուամյա, ներառյալ մասնագիտական, կրթությանը։
Անապահով խավերի համար կրթությունը դարձնելու ենք անվճար՝ ներառյալ բարձրագույնը։ Յուրաքանչյուր առաջին դասարանի աշակերտի տրամադրելու ենք անվճար համակարգիչ։ Բուհերը պետք է դառնան ժամանակակից հասարակության հենքը` միավորելով գիտությունը, դասավանդումը և նորարարական արտադրությունը։ Վերանայվելու է բուհական ընդունելության համակարգը՝ աստիճանաբար վերացնելով ընդունելության քննությունները։ Այսինքն, բուհ ընդունվելը կլինի հեշտ, ավարտելը` դժվար։ Գիտության ժամանակակից ենթակառուցվածքների ստեղծման նպատակով, համալսարանների և գիտահետազոտական ինստիտուտների հետ համատեղ, նորարարությունների և հետազոտությունների ոլորտներում շարունակվելու են իրականացվել պետական ներդրումներ»: